SURA' MED IBRANI HINUNG EN, ASEL MATE
O' ERNU MI
1
Fede' Taurat o' Hukung ho seilal sano' lalaman med nano' ernu ba ho' eh am ho e' re eng, sobo e' sano' sari na ernu ho o' lalaman a' bul nene horoba, a' lorang tofang ba ham ho, supi puin mahen few tun a' ri an, supi ho' a' bung am sobo, sari hukung hoo, e' supi a' no' a' no' ham nene.
2
Mang fede' honi so hee, ma'a' na ernu a' lorang med meng eh ho e' panen nene am, fede' a' no' bolang minu' le, honife nameno' nun ba a' ome panen eh hoo, supi doc ho u sahol nene am?
3
Honi sobo, mahen few o' pa' fit ho' meng o' om homi, supi o' doc tofang tun a' ri an ho, supi a' how sona uma.
4
Fede, nub lote med a' bib lote o' fui ho, puin doc luh few sah.
5
Honie, Kristus ho' pali' mate hoo ta honi hee, Sa ubangho,
"Na ernu a' lorang, med o' hir o' pa' ho, om e' uma nene,
sobo bo' mate nu A utaro' med Nere eng am;
6
Na ernu a' lorang o' dor ta dang a'pew ei,
med na ernu alorang o' dor ta puin doc luh ei ho,
om e' uma nene.
7
No' Na ubang ho, Ho' oro Nari:
Nei nara ham ho, a' ra hul sura' kol meng om homi eh,
Na ho' honie, Ei om, med Ei amang pa' ho Na a' no' lame, Lahtal.
8
Kristus ubang, " Na ernu ba med Lahtal en, dang a' pew ei, med a' lorang puin doc luh ei nun ho, Om e' uma nene,med Ara ham homi A e' u i' nung nene"(Taurat o' Hukung a' ta ain med Lahtal en).
9
Sa foil ubang, "Ho' oro Nari. Na ho' honie, Ei om med Ei i' nung ho Na panen". Horo, Yesus o' aai
nang luh few, honi puin o' mialo ho a' no' kufa'.
10
Sa u i' nung horoba, Yesus Kristus min ho lol pi bolang med, Sa min minu'le, sobo Sa fetang sam so em.
11
Imam pir nunu so karesang fednu ei panen sel a' ri an, sariho supi na ernu med Lahtal en ei ho panen ham, sariho puin doc luh few sah;
12
sobo Kristus Sa min tabang doc a' hal e' re eng, Sa min minu, Sa fetang so em, Sa Lahtal a' tang tani lol ho mimieh,
13
no' hee, O' falefang ernu Sa med se om pilang o' sel ho a' da nang.
14
Min minu ho, Kristus puin supi ba Sa a' no' bolang am ho a' no' no' a' no' ham sam em so em ho a' meng.
15
Roh Bolang di sano' tei name ta'hol ta ma eh fa na hoo ei a' ra ham, fede' o' ubang ho,
16
"Ho' oro pahap ba, maa sari sel hoo a' lai honi hee, Na No serang tofang a' ra panen, Lahtal a' mang pa':
" Na No hukung ernu med supi om mimeng,
no' hee Na hul
med supi o' tanut ho mimeng".
17
No' hee, Sa foil uta,
"Supi o' doc ernu Na sibung pain,
med supi o' a' ri ing fail ernu Na e' uma nene am."
18
Fed hoo, mang fede' ampo med na ernu barpi a' ra ham ho utaro' no'am honi hee, min tabang puin doc luh few ho a' ai am.
LAHTAL O' LAP MA
19
Honife, no di ail bar,Yesus min o' fui her ho puin tano' kufa', honie mid Bang om Somi Bolang ho lemid hee pi baroc nene am,
20
sari se' bur habar med fetang ba Yesus during ten ho napah habu horo lol, sariho Yesus o' bo,
21
fede' piri ho'o, pi Imam Matenu a' ra am, med Sari horo Lahtal O' Bang ho uaneng,
22
honife ma, pi tom a' bul, udume afeng om mi, pi fa Lahtal O' lap fa, fede' tom tah a' ri ing fail ho a' no' bolang am, med bo' mate hodi sei bolang a' bul ho puin lam bolang am.
23
Ma honie pi udume o' a' tino' bit am ho, pi a' puin dume, fede' Lahtal ba tapaha' ho, Sa tei ma eh tei alepang,
24
ma pi se' bur lap, tau tatang ta, tari ukarang med na o' no' tofang fe panen,
25
med pi lubung pi ta u' nung, tara ao'me ham ham ho, pi haai u tel hi' telet nene, mang fede' name oinu panen eh honi e'.
Honi sobo ma pi tano' kufa' ham ham, o' mi tata i a' hol hee, Lahtal O' sel ho mang fanang ta eh.
HA' AI LAHTAL LAFANG
26
Sobo, mang fede' pi a' hol nene pain honie pi doc so panen eh, sobo na a' bul ei a' raham pi a' hol med am, ho hee nanu med o' dor ta puin doc ernu luh few ho a' ai am.
27
Sodai a' ra eh ho, a'da nang, honi sobo a' bul a' hal lap, med afail mate talol puin Lahtal o' falelfang ernu a' mine ei ho ubaroc.
28
Name pir alo eme pir tow ba, ta'hol ta ma eh ei mateng pa' a' ta ain, ano horo Musa o' Hukung a' lol a' ta ain nene honi hee, hukung a' mine med, sobo e' sah ukarang a' ai.
29
Mang fede' honiso hee, name ba Lahtal Ai tatoh talame, med fui upaha' ba puin a' no' bolang am ho sa a' no' nasah,no'hee Lahtal Roh med en ho sa e' bit eng el honi hee, maa hukung somi tarofe ho sa e' med nene?
30
Fede, Sari Aiho pi a' pong a' hol, Sa ubang ho,
"A'bor den a' ra Natang om mi; a' bor den ho Na u a' ta ain te' eng. Sa foil ubang, Lahtal So serang uhu' utimba."
31
Mang fede' pi muj Lahtal Fetang a' tang om lehel honi hee, tafah aloil empir moi pir.
BAROC NENE MED PA' BALA HO UGARIANG
32
Honi sobo, sel hair o' talai am ho uma, i kufa ara med no' hee, i karesang baleta om mi ho, maar mahip tarofe itefang sobo, iri tahang.
33
Seh seh honi hee, name iebit, tofang a' pong a' dang homi name iri beh,
seh seh hee, name ba maar mahip a' hol asel name beh par o' rupa honiho, iridi a' ra om mi.
34
Name sapiri mi hodi, i ukarang, i na ernu name utot ukalaping hee, iom sanang ipano' puin med en, fede' i a' hol sariho, iei kafac so em a' ra.
35
Honife,ha'ai iudume ho a' hel few e'fede', iudume ho kafac mate fit ho'.
36
Fede' dume tapar imed, honie puin Lahtal nabafe u i'nung ho ubaleta honie, nabafe Sa u ipaha' am ho imed. "
37
Fede, "E' lufang nene am,
Sari Ai ho' eh hoo, o' selmi Sa ho' ibung, foil a' luil nene.
38
Fede, No name a' bul ho fetang, asel udume.
Sobo mang fede' sa baroc sol holong honi hee, No laman e' aiho u i' nung nene.
39
Piri hoo name sol holong fa min med ei name nene,
honi sobo piri hoo name o' udume a' ra honie puin laman ugariang.