SURA' MED IBRANI HINUNG EN, ASEL MATE
O' MI TI' EINU
1
O' mitata, taro' alap a'ome ei a' raham ho, a' ra sura' pah om dimi, med eleme bolang a' ra pali' mate ta.
2
Fede' horo ei ba, Lahtal o' dup ho utaro': luling lol ho, lampu ai, meja, med roti a' de ei a' ra homi, sari hoo o' ubang hee, eleme bolang.
3
Napah habu mate haleng puin bang om ha' o' mi alo a' mot mi ho, dup o' ha taden a'ra homi, o' ubang hee, bang om somi bolang,
4
sari eleme homi, dor kaai nu a' ra homi, sari dor hoo name masfe a' ten honie ta na manem a' pew ei, med Paha' taro' o' pati' ho masfe name a' ten hodi a' ra homi. Sari pati' om ho, mako mas nu roti mi eh, Harun o' dopang ba u hali ho, med foi halal pa' alo ba paha' tahul ho, a'ra mi eh.
5
E' mota ho, name a' fitang ta lel madal pir alo Tel no' ham ho bu' ang eh, sobo fed hoo, umateng a' no' lel barpi feho, o' sel mi dai.
6
Barpi utaro' oh an no' honi hee, imam hinung mid dup om o' aai nang ho lemid honie, a' ome Lahtal a' ra ham ho ubaleta sei masing.
7
Honi sobo, sei lal imam mate horo solo mid dup om o' mi alo ho lemid no', sari hodi, tun nu hee minu sobo, foi a' ra huil mid dup om ho lemid, honie a' bole
Lahtal en, sariho med so bo' mate e' re eng, sobo med doc tofang ba sibung a' lol serang buhuin panen am hodi e' re eng.
8
Roh Bolang utara mateng ubangho, bang om bolang dai a' ra eh honi hee, se' bur bang om somi bolang lemid ei ho, e' sari during dai,
9
sari na hoo, zamang fed o' upapain. Na ernu ba a' lorang a' bole nun hodi e' puin name a' ome ernu om ho ano' no' a' no' an nene,
10
fede' na' de sei na fe a' ra hamow, med bo' mate doc ulam o' panen a' ten sam mong sel habar ho'ma o' sel ho mimeng.
A'OME SURA' HABAR OM MI
11
Sobo, Kristus ho' Sano' Imam Mate med nano' ernu ho' eh ho e' re eng honi hee, Sa E' leme Bolang mimate med so mino' ham horo lol mid; sari hoo nameno' a' tang so ukaresang nene, med e' a' ten a' home nu nene.
12
Sa mid Bang om So mi bolang lemid minu sam so em a' meng, Sa e' nub a' bib o' foi puin mid nene sobo, Sa So foi horo a' ra huil mid,honie puin tiling mana so em ho med.
13
Mang fede' sapi lote med a' bib lote o' fui tabi', med sapi ow ai o' maru med name doc a' hal e' re eng ho puin so bo' mate a' no' bolang no',
14
foil mita honi hee Kristus O' fui, sariho ai ba Roh so em lol So Bo' a' lorang a' no' min tabang bolang med Lahtal en, honi puin panen a' ten o' a' ai ba iom mi ho a' no' bolang honie, i Lahtal ba fetang asel horo ubaleta.
15
Asel horo ei soba, Kristus Sano' paha' habar ho o' sabanta honie, supi ba Lahtal o' lofe am ho, sei kafac so em ba Sa u paha' am ho med; fede' min ba ang nu a' ra, puin supi o' tetang hasu ba supi paha' a' ai nang homi panen ho mana a' hi' am.
16
Mang fede' namenu so na ernu abole namenu en o' sura' a' ra, honi hee min uil a' ra ai sura' panen homi.
17
Fede' na a' lorang o' sura' ho name o' a' tino' bit mang fede' ai sura' panen ho min am; sobo ai sura' panen ho dai fetang eh hee, sari sura' ho o' kufa' a' ai.
18
Horo soba, taro' nife paha' a'ai nang ho a' no' lame sah, fede' fui e' uher nene.
19
Fede, parenta ernu ba Taurat o' hukung om mi ho Musa med Israel hinung a' ra mateng no' hee, Sa sapi ai md a' bib ai o' fui med sei a' ra ta' unung. No' hee sa napah ten med ti a' bale to' ang fe puin fui ho med Sura' Taurat u a' lil, med serang buhuin nun sobarpi,
20
sa ubang ho, "Ho'oro paha' ho o' fui ba Lahtal u iri parenta honie, i a' lol a' ta ain.
21
Musa di sari na horo panen, Dup Bolang med o' na ernu ba a'ome om mi hee puin ukaresang ei ho, sobarpi Sa fui med u a' lil.
22
Taurat o' hukung a' ta ain hee, na ernu e' dai sobarpi fui puin a' no' bolang, sobo fui uher nene honi hee o' ampo a' ai.
YESUS KRISTUS HOROFE, MIN TABANG PUIN DOC LUH
23
Honife, na ernu ba mang fede' Sorga o' lalaman honi nun ho, u'il u'il sari na hoo puin a' no' bolang, sobo na ernu tong Sorga miho, min tabang so mino' fe puin a' no' bolang.
24
Fede, Kristus e' Bang Om So mi bolang ba nameno' satang puin a' ten ho lemid nene, fede' sari hoo, o' a' bulta horo fe o' upapain, sobo Sa Sorga om fe lemid, honie fed hoo, Sa a' ra tong Lahtal a' pong a' dang homi eh ho med tere eng.
25
Kristus di So Bo' ho a' lorang ta lame lol nene, mang fede' imam mate ba u'il mid Bang om so mi Bolang lemid tun a' ri an, sa fui a' ra huil mid sobo, e' ei fui nene.
26
Mang fede' honi so hee, pali' mate mang a' ten honi hee, Kristus u'il maar mahip a' hol ta lame lol.
Honi sobo, Kristus So Bo' mate utub minu'le sam so em zamang o' a' muj hoo mi, Sa So Bo' fe a' lorang puin doc tofang ho luh.
27
Mang fede' nameno' ba utub honie min minu' le no' hee, a' bul a' hal lap a' dang homi toh,
28
Kristus di honi, Sari ho name a' lorang minu' le honie name tofang o' doc ho fan, no' Sa ho' o' mi alomi ho, Sa e' doc fan uho' nene sobo, name ba a'da -- nang eh ho, Sa il luling fit ho supi en.