(Yesus Mangutus Murid-Murid-Nyo) ¹ Dan, Yesus mamanggil kaduo bolas murid-Nyo jugo mangasih orang tu kuaso atas roh-roh najis, untuk mangusir roh-roh itu dan untuk manyombuhkan sagalo macam kasakitan. ² Inilah namo-namo kaduo bolas Rasul tu : "Nan partamo, Simon nan disobut Petrus, dan Andreas sodaronyo, dan Yakobus anak Zebedeus, dan Yohanes sodaronyo, ³ Filipus dan Bartolomeus, Tomas, dan Matius si pangutip pajak, Yakobus anak Alfeus dan Tadeus, ⁴ Simon orang Zelot dan Yudas Iskariot nan mangkhianati Yesus. ⁵ Yesus mangutus kaduo bolas Rasul tu dan mamarintahkan orang tu, "Jangan pogi kajalan bangso-bangso lain ato masuk kadalam kota Samaria. ⁶ Malainkan pogilah kapado domba-domba nan tasosat dari antaro umat Israel. ⁷ Dan, salamo kamu pogi, baritokanlah dengan bacakap, "Karajoan Surgo dah dokat. ⁸ Sombuhkanlah nan sakit, hidupkanlah nan mati, tahirkanlah nan kusta dan usirlah roh-roh ta'un. Kamu manarimo dengan cumo-cumo, kasihkanlah jugo dengan cumo-cumo. ⁹ Tak usah pala kamu mambawak omas, ato perak, ato tembago dalam ikat pinggangmu, ¹⁰ Ato tas dalam parjalanan ato duo potong baju, ato sandal, ato tongkat, korno, saorang pakorjo, pantas mandapat makanan. ¹¹ Dan, dikota ato desa manopun nan kamu masuki, salidikilah siapo nan layak didalamnyo dan tinggallah disanan sampe kamu barangkat. ¹² Pas kamu mamasuki rumah tu, ucapkanlah salam. ¹³ Dan kolok rumah tu layak, biarlah dame sejahtromu turun atasnyo, tatapi kolok tidak, biarlah dame sejahtromu tu balek ka kamu. ¹⁴ Dan, siapo sajo nan tak manarimo kamu ato tak ondak mandongar cakap mu, pas kamu kaluar dari rumah ato kota tu, kebaskanlah dobu kakimu. ¹⁵ Aku mangatokan nan sabotulnyo samo kamu, kolok waktu hari panghakiman, tanah Sodom dan Gomora akan lobih tolap mananggungnyo dari pado kota tu." ¹⁶ "Tengoklah, Aku mangutus kamu kayak domba ka tongah-tongah sarigalo, Karono tu, jadilah cerdik macam ular dan tulus macam burung-burung merpati. ¹⁷ Akan tatapi, bahati-hatilah samo orang-orang, karono orang tu ondak manyorahkan mu samo Sanhedrin dan akan mancambukmu di sinagoge-sinagoge orang tu. ¹⁸ Dan, kamu akan dibawak ka dopan para panguaso dan para rajo demi Aku, sabage kasaksian untuk orang tu dan untuk bangso-bangso lain. ¹⁹ Namun, pas orang tu manyorahkan kamu, tak usah pala khawatir kek mano ato antah apo nang ondak kamu cakapkan, karono, saat tu jugo, akan dikasihkan samo kamu apo nan ondak kamu cakapkan, ²⁰ Korno, bukan kamu nan bacakap, malainkan Roh Ayahmu nan bacakap di dalam kamu. ²¹ Nan basodaro akan saling manyorahkan pado kamatian, dan ayah samo anaknyo, dan anak-anak akan malawan para orang tuo dan mambunuh orang tu. ²² Kamu akan dibonci samo satiap orang karono namo-Ku, tatapi orang nan batahan sampe akhir akan disalamatkan, ²³ Pas orang tu manganiayo kamu dalam satu kota, larilah kakota nan laen. Aku cakapkan nan sabotulnyo samo kamu, kolok kamu tak akan salose malewati kota-kota Israel sampe Anak Manusio datang. ²⁴ Murid tak malobihi gurunyo, kek gitu jugolah hamba tak malobihi tuannyo. ²⁵ Cukuplah kolok murid manjadi kayak gurunyo, dan hamba manjadi kayak tuannyo. Kolok orang tu manyobut tuan rumah itu Beelzebul, batapo lobih buruk lagi kapado anggota kaluargonyo." ²⁶ "Karono tu, janganlah kamu takut samo orang tu, karono tak ado apopun nan tatutup nan tak akan diungkapkan, ato nan tasambunyi nan tak akan dikatahui. ²⁷ Apo nan Aku katokan samo kamu dalam kagolapan, katokanlah itu dalam torang. Dan, apo nan kamu dongar dibisikkan ditalingamu, baritokanlah diatas atap rumah. ²⁸ Tak usah pala takut samo orang tu nan mambunuh tubuh tatapi nan tak tolap mambunuh jiwo, tatapi, lobih takutlah samo Dio nan tolap mamusnahkan jiwo maupun tubuh di narako. ²⁹ Bukannyo duo ekor burung pipit dijual untuk satu duit? dan tak ado saekor pun dari burungtu akan jatuh katanah diluar kahondak Ayahmu. ³⁰ Sampek, rambut kapalomu pun samuonyo tahitung. ³¹ Karono tu, usah pala takut, kamu tu lobih banilai dari pado banyak burung pipit." ³² "Jadi, satiap orang nan mangakui Aku didopan manusio, Aku jugo akan mangakui dio di dopan Ayah-Ku nan ado di Surgo. ³³ Sabaliknyo, siapo nan manyangkal Aku di dopan manusio, Aku jugo akan manyangkal dio di dopan Ayah-Ku nan ado di Surgo. ³⁴ "Usah bapikir kolok Aku datang ondak mambawak pardamean di bumi. Malainkan, Aku ni datang mambawak Podang. ³⁵ Korno, Aku datang ondak mamisahkan laki-laki dari ayahnyo, anak parampuan dari omaknyo, manantu parampuan dari omak martuonyo. ³⁶ Dan, musuh sasorang adolah dari anggota kaluargonyo. ³⁷ Siapo nan Lobih mangasihi ayah ato omaknyo dari pado Aku, tak layak samo-Ku, dan siapo nan lobih mangasihi anak laki-laki ato anak parampuannyo dari pado Aku, tak layak samo-Ku. ³⁸ Dan, siapo nan tak mamikul salibnyo dan mangikuti Aku, tak layak samo-Ku. ³⁹ Siapo nan mampartahankan nyawonyo akan kahilangan nyawonyo, dan siapo nan kahilangan nyawonyo demi Aku, akan mandapatkannyo. ⁴⁰ "Siapo nan manarimo kamu, manarimo Aku, dan, Siapo nan manarimo Aku, manarimo Dio nan mangutus Aku. ⁴¹ Siapo Nan manarimo Nabi dalam namo nabi, akan manarimo upah nabi. Dan, siapo nan manarimo orang bonar dalam namo orang bonar akan manarimo upah orang bonar. ⁴² Dan, Siapo nan mangasih minum samo salah satu dari orang-orang nan kocik ni, kolok pun hanyo sacangkir air dingin dalam namo saorang murid, Aku katokan nan sabotulnyo samo kamu, dio tak akan kahilangan upahnyo."