(Yesus Mangampuni Dan Manyombuhkan Saorang Lumpuh) ¹ Satolah masuk ka parahu, Yesus manyobrangi dano dan tibo di kota-Nyo sandiri, ² Dan, tengoklah, orang tu mambawak samo Dio saorang lumpuh nan tabaring ditompat tidur. Pas manengok iman orang tu, Yesus bacakap samo orang lumpuh tu. "Toguhkanlah hatimu , anak-Ku, dosomu dah diampuni." ³ Torus tu, tengoklah, babarapo orang Ahli Taurat bacakap dalam atinyo, "Orang ni manghujat Allah!" ⁴ Tak taunyo Yesus tau isi pikiran orang tu, kato-Nyo, "Mangapo pulak kamu bapikir nan jahat dalan ati kau? ⁵ Nan manolah nan lobih mudah diucapkan, 'Doso-doso kau dah diampuni, ato bacakap, ' Bangunlah dan bajalanlah? ⁶ Biar kalian tau, kolok dibumi ni, Anak Manusio mampunyoi kuaso untuk mangampuni doso." Kamudian, Yesus bacakap samo orang lumpuh tu, "Bangunlah, angkatlah tompat tidurmu, dan baleklah kau karumahmu!. ⁷ Mako, dio bangun dan balek karumahnyo. ⁸ Namun, pas orang banyak manengok hal ni, orang tu manjadi tacongang dan mamuliokan Allah nan mangasi kuaso macam tu samu manusio. (Matius Pangutip Pajak, Mangikuti Yesus) ⁹ Pas Yesus pogi dari situ, di tengok-Nyo lah saorang nan di panggil Matius tongah duduk di tompat pangutipan pajak, torus, Yesus bacakap samo dio, "Ikutlah Aku." dan, Matius pun badiri dan mangikut Yesus. ¹⁰ Pas waktu Yesus duduk makan didalam rumah tu, tengoklah, banyak pangutip pajak dan orang-orang badoso datang, trus duduk dan makan basamo Yesus dan murid-murid-Nyo. ¹¹ Dan, pas orang-orang Farisi manengok hal ni, orang tu bacakap samo murid-murid-Nyo, "Mangapo pulak gurumu makan basamo pangutip pajak dan orang-orang badoso?" ¹² Tak taunyo, pas Yesus mandongar hal tu, backaplah Dio, "Orang nan sehat tak mambutuhkan tabib, malain nan sakitlah nan mambutuhkan tabib. ¹³ Namun, pogilah dan palajarilah apo artinyo ni, "Aku mangingini belas kasihan, bukannyo parsombahan,' karono Aku datang bukan ondak mamanggil nan elok, malainkan orang-orang badoso." ¹⁴ Kamudan, murid-murid Yohanes datang samo Yesus dan batanyo, "Mangapo kami dan orang-orang Farisi malakukan puaso? tatapi murid-murid-Mu tak bapuaso?" ¹⁵ Dan, Yesus bacakap samo orang tu, "Bisanyo agaknyo para pangiring pangantin badukocito salamo pangantin laki-laki masih basamo-samo dengan orang tu?, akan tatapi, akan tibo waktunyo pas pangantin laki-laki tu diambil dari orang tu, dan barulah orang tu akan bapuaso." ¹⁶ Tak ado saorang pun nan manambalkan kain nan baru pado pakaian nan lamo, karono tambalan tu akan manguyak pakean nan lamo dan makin bosarlah kuyaknyo. ¹⁷ Dan jugo, tak ado orang nan manuang anggur nan baru kadalam kantong kulit dan lamo, kolok kek gitu, kantong kulit tu pasti akan kuyak, dan anggurnyopun akan tumpah, dan kantong kulitnyo pun hancur. Ekoknyo, orang tu manyimpan anggur nan baru tu kadalam kantong kulit nan baru jugo, sahinggo, kaduonyo tapaliharo. ¹⁸ Samantaro Yesus mangatokan hal-hal ni samo orang tu, tengoklah, saorang pamimpin rumah ibadah datang manyombah-Nyo dan bacakap, "Anak parampuanku baru sajo mati, kuraso, datanglah dulu dan lotakkanlah tangan-Mu ka atasnyo, bak hidup dio balek." ¹⁹ Trus, Yesus bangkit dan mangikuti dio, murid-murid-Nyo pun ikut samo Dio. ²⁰ Dan, tengoklah, saorang parampuan nan dah mandarito pandarahan salamo duo bolas tahun, mandokati Yesus dari balakang dan manjamah ujung jubah-Nyo. ²¹ Karono parampuan tu bacakap samo dirinyo sandiri, "Kolok ku sontuh sajo jubah-Nyo, pasti aku sombuh," ²² Tak taunyo, Yesus babalik dan manengok'i parampuan tu, trus bacakap, "Toguhkanlah hatimu anak-Ku, iman mu dah manyombuhkanmu." saat tu jugo, sombuhlah parampuan tu. ²³ Pas sampek lah Yesus di rumah kapalo rumah ibadah tu dan manengok para paniup seruling dan orang banyak nan bising. ²⁴ Dio bacakap, "Pogilah, karono tak matinyo anak parampuan ni, nan tatidurnyo dio," dan, orang tu pun manggolak'i-Nyo ²⁵ Namun, pas orang banyak tu dah diusir kaluar, Yesus masuk, trus mamegang tangan anak tu, dan anak parampuan tu pun bangun. ²⁶ Dan, barita ni tasobar ka saluruh daerah tu. ²⁷ Pas Yesus pogi dari situ, duo orang buto mangikuti Dio sambil batariak-tariak, "Kasihanilah kami, Anak Daud," ²⁸ Satolah Dio mamasuki rumah tu, kaduo orang buto tu mandatangi Dio, trus Ditanyak Yesuslah ka orang tu, "Parcayonyo kamu, kolok aku tolap malakukan hal ni?" orang tu pun manjawab, "Ya, Tuhan!" ²⁹ Kamudian Yesus manjamah mato orang tu, kato-Nyo, "Jadilah samo kalian manurut iman kalian." ³⁰ Dan, tabukolah mato orang tu, trus, Yesus mangingatkan orang tu dengan tegas, "Tengok kalian, jangan sampe ado orang nan tau tontang hal ni" ³¹ Tak taunyo, orang tu kaluar dan manyobarkan berita tontang Yesus ka saluruh daerah tu. ³² Satolah kaduo orang itu kaluar, tengoklah, orang-orang mambawak samo Yesus saorang nan bisu nan dirasuki Ta'un. ³³ Sasudah roh ta'un tu diusir, orang bisu tu pun bacakap. Orang banyak tu pun manjadi taheran-heran dan bakato, "Hal macam ni bolum paronah nampak di Israel." ³⁴ Sayangnyo, orang-orang Farisi bacakap, "Dio mangusir roh-roh jahat pakek kuaso roh-roh jahat jugo. ³⁵ Dan, Yesus pogi mangalilingi samuo kota dan desa sambil mangajar di sinagoge-sinagoge orang tu. dan mambaritokan Injil Karajoan, jugo manyombuhkan sagalo panyakit dan kasakitan. ³⁶ Pas Yesus manengok orang banyak tu, Dio maraso kasihan samo orang tu, karono orang tu lotih dan talantar macam domba-domba tanpa gambalo. ³⁷ Kamudian Dio bacakap samo murid-murid-Nyo, "Sasungguhnyo, banyak nan di panen, tatapi pakorjo-pakorjonyo sadikit. " ³⁸ Korno tu, mintaklah samo Tuhan nan mampunyoi Panenan, bak dikirmkan-Nyo pakorjo-pakorjo nan ondak mamanen.