¹ Pas Yesus salose mangasih parintah samo kaduo bolas murid-Nyo, Dio pogi dari sanan untuk mangajar dan bacaramah di kota-kota orang tu. (Yesus dan Yohanes Pambabtis) ² Kinin, pas Yohanes, nan ado di panjaro, mandongar pakorjoan-pakorjoan Kristus, dio mangirim posan malalui murid-muridnyo. ³ Dan batanyo samo Dio, "Apo Engkaunyo nan akan datang tu? ato apo harus manunggu nan laen nyo kami?" ⁴ Yesus manjawab dan bacakap samo orang tu, "Pogi dan kasihtahukan lah samo Yohanes apo nan dah kamu tengok dan apo nan dah kamu dongar. ⁵ Nan buto manengok, nan lumpuh bajalan, nan sakit kusta ditahirkan, nan mati dibangkitkan, dan kapado nan miskin diberitakan Injil. ⁶ Dan, diborkatilah orang nan tak kacewa samo-Ku ⁷ Dan, Satolah orang tu pogi, Yesus mulai bacakap, samo orang banyak tontang Yohanes, "Apo nan ondak kamu tengok di padang balantaro? sabatang buluh nan digoyang angin? ⁸ Kamu pogi ondak manengok apo? saorang nan bapakean halus? orang tu nan bapakean halus tu ado diistano-istano rajo. ⁹ Untuk aponyo kamu pogi? ondak manengok nabi? ya, Aku katokan ni samo kamu, bahkan dio lobih bosar dari pado saorang nabi. ¹⁰ Karono, diolah orangnyo nan dah tatulis : 'Tengoklah!, AKu mangirim utusan-Ku mandahului-Mu. Dio nan akan mamparsiapkan jalan bagi-Mu dihadapan-Mu ¹¹ Aku bacakap nan sabotulnyo samo kamu, diantaro orang tu nan dilahirkan samo parampuan, tak pornah muncul orang nan lobih bosar dari pado Yohanes Pambabtis. Akan tatapi, nan paling kocik dalam Karajoan Surgo, lobih bosar dari pado dio. ¹² Sojak zaman Yohanes pambabtis sampek kinin, Karajoan Surgo mandarito kakorasan, dan orang-orang nan kojam tu malakukannyo dengan paksa. ¹³ Karono, samuo Nabi dan Hukum Taurat banubuat sampe zaman Yohanes. ¹⁴ Dan, kolok kamu mau manarimonyo, diolah Elia nan akan datang tu.' ¹⁵ Siapo nan mampunyoi talingo untuk mandongar, ondaknyo dio mandongar! ¹⁶ Namun, pake apolah ondak Kubandingkan generasi ini? Orang tu macam kayak anak-anak kocik nan duduk ditompat-tompat umum, nan mamanggil kawan-kawannyo. ¹⁷ Dan bacakap, 'Kami maniupkan saruling untuk mu, tatapi kamu tak manari. Kami manyanyikan lagu dukocito, tatapi kamu tak baduko.' ¹⁸ Karono Yohanes datang tanpo makan jugo tanpo minum, dan orang tu bacakap, "dio karasukan roh jahat" ¹⁹ Akan tatapi, pas Anak Manusio datang, trus makan, dan minum, dan orang bacakap, 'Tengoklah, saorang nan rakus dan pamabuk, kawan para pangumpul pajak dan orang-orang badoso.' Akan tatapi, hikmat dibotulkan samo parbuatannyo." ²⁰ Kamudian, Yesus mulai mencela kota-kota tompat Dio malakukan paling banyak mukjizat karono orang tu tak batobat. ²¹ "Calakolah kamu, Khorazim! Calakolah kamu, Betsaida!, Korno, kolok mukjizat-mukjizat nan dah tajadi diantaro kamu jugo tajadi di Tirus dan Sidon, orang tu dah lama batobat dengan bapakean kabung dan abu. ²² Akan tatapi, Aku kasihtaukan ka kamu, kolok pas waktu panghakiman, Tirus dan Sidon akan lobih tolap mananggungnyo dari pado kamu. ²³ Dan, kamu, Kapernaum, mungkinnyo agaknyo kamu ditinggikan sampe ka langit? Tidak, kamu akan diturunkan kadunio orang mati, karono, kolok mukjizat-mukjizat nan dah tajadi diantaro kamu tu, tajadi di sodom, kota tu akan totap ado sampe kinin, ²⁴ Akan tatapi, Aku katokan hal ni samo kamu, kolok pas waktu hari panghakiman, tanah Sodom akan lobih tolap mananggungnyo dari pado kamu. ²⁵ Pas waktu tu Yesus bacakap, "Aku mamuliokan Engkau, ya Ayah, Tuhan atas langit dan bumi, kolok Engkau marondokkan samuo ni dari orang-orang nan bijaksano dan pande, dan mangungkapkannyo samo anak-anak kocik. ²⁶ Ya, Ayah, Karono kayak itulah nan bakonan di hadapan-Mu. ²⁷ Sagalo sasuatu dah disorahkan samu-Ku oleh Ayah-Ku. Dan, tak saorang pun nan mangonal Anak, salain Ayah: tak saorang pun mangonal Ayah salain Anak dan stiap orang nan di kahondaki sang Anak untuk mangungkapkannyo. ²⁸ Datanglah kapado-Ku, samuo nan lotih losu dan baboban borat, dan Aku ondak mangasih kau kalogaan. ²⁹ Pikullah kuk nan Kupasang, dan balajarlah dari-Ku karono Aku lomah lombut, dan kamu akan mandapatkan katonangan dalam jiwomu. ³⁰ Karono, kuk nan Kupasang tu mudah dan boban-Ku enteng."