¹ Kinin, sudaro-sudaro, awak samuo ondak bak klen mangaroti tontang borkt Allah nang udah dibagikan ka jamaat-jamaat di Makedonia. ² bahwasanyo dalam banyaknyo ujian pandaritoan, kalimpahan sukocito jugo bosarnyo kamiskinan orang tu udah balimpohan dalam kakayoan katulusan hati orang tu. ³ Awak basaksi kolo orang tu mambagi sasuai samo kasanggupan orang tu sandiri. ⁴ Orang tu motan mamimta samo kami buek borkat untuk mangambek bagian dalam palayanan orang-oarang suci. ⁵ Dan, inilah nang dikrojokan orang tu, tak macam nang kami harapkan, mulo-mulo orang tu mambagikan diri orang tu sandiri kepado Allah, baru tu kepado kami oleh karono kahondak Allah. ⁶ Jadi, kami dosak si Titus, macam mano nang udah dimulokannyo, bgitu pulolah dio akan manyalosekan karojoan borkat ni diantaro klen. ⁷ Tapi, samo kek kau bakalimpohan dalam sagalo hal, dalam iman, parkataan, pangatahuan, sagalo usaho, dan dalam kasih kau tu kepado kami, ondaknyo jugolah kau bakalimpohan dalam borkat ni. ⁸ Tak lah aku cakakapkan ini macam parintah, tapinyo bauk buek manguji motannyo orang laen tontang kaiklasan kasih kau tu. ⁹ Karono, kau tau borkat Tuhan kita Yesus Kristus, kalo pun Dio kayo, Dio rela manjadi miskin domi kau bak supayo kamiskinan-Nyo, kau manjadi kayo. ¹⁰ Dan, awak mambagikan pandapat awak, parkaro ni adolah buek kauntungan kau, nang sataon nang lalu, ko bakannyo mangorjokannyo, tapi jugo memanag ondak mangorjokannyo. ¹¹ Jadi sakarang, salosekan jugolah karojoan itu bak sapadan samo karelaan kau ondak manyalosekan apo nang udah ado samo kau. ¹² Kerono, kolo udah sadio ondak mambagi, pambagian itu akan ditarimo, dasarnyo korono apo nang dipunyo sasaorang, bukannyo badasar apo nang tak ado samo dio. ¹³ Parkaro ni bukannyo ondak mangentengkan orang laen dan mambobani kalian, tapinyo bak ado kasaimbangan. ¹⁴ Biarlah kalobihan nang ado samo kau tu mancukupka kakurangan orang tu bak kalobihan nang di orang tu jugo mancukupkan kakurang dikau. Jadinyo ado kasaimbangan. ¹⁵ Kek nang ado tartulis di Kitab Suci, "Orang nang mangumpulkan banyak, tidak balobihan jugo orang nang mangumpulkan sadikit, tak kakurangan." ¹⁶ Tapi, basyukur kapado Allah nang mambuek dalam hati Titus kamotanan nang samo nang ado di aku untuk kau. ¹⁷ Karono, dio tak cumo manarimo saran kami, tapinyo kasungguhan nang motan, dio datang kepado kau karono kahondak dio sandiri. ¹⁸ Basamo Titus, kami mangkirim sudaro nang disanjong diantaro samuo jamaat dalam parkaro pambaritoan Injil. ¹⁹ Tak cumo itu sajo, dio jugo dihunjuk samo jamaat-jamaat bak pogi basamo kami dalam palayanan borkat ni, nang kami karojokan bak mambuek kamuliaan samo Tuhan jugo buek manunjukkan karelaan kami. ²⁰ Motan kami hati-hati bak tak ado orang nang mancola kami dalam parkaro pambagian bosar nang udah kami atur. ²¹ Barusaho kami mambuek apo nang botul, tak cumo dalam panengokan Tuhan, tapi jugo dalam panengokan manusio. ²² Dan, basamo orang tu, kami mangkirimkan sudaro kami nang udah banyak kami tes dan tarbukti nang rajinan dalam banyak parkaro, talobih lagi kinin dio samakin rajin korono dio punyo kayakinan nang bosar samo kau. ²³ Kinin mangonai si Titus, dio tu pasangan jugo kawan sakorjoku nang akan batuah buek awak. Mangonai sudaro-sudaro kito nang laen, orang-orang tu utusan jamaat-jamaat buek Kristus. ²⁴ Jadi, kasi tengok samo orang tu, di dopan jamaat-jamat, bukti cinto kau jugo kabanggaan kami samo kau.