¹ " Waspadolah dalam malakukan kawajiban agamo kau di hadapan manusio, jangan jongon maksud untuk diliek samo sidak. Jiko damikian, kau indak nakkan manarimo upoh dari Ayahkau na di surga. ² Karano itu, katiko kau mangagi sadakko, jangan mambunyikan tarompet dihadapan kau sakiro urang-urang munafik lakukan di sinagoge-sinagoge jongon dijalan-jalan supayo sidak dipuji urang lain. Ambo mangatokan na sabananyo kapado kau bahwo sidak ala manarimo upahnyo. ³ Akan tatapi, katiko kau nandak mangagi sadakko, jangan padiakan tangan kida kau tau apo na tangan kanan kau pabuek, ⁴ supayo sadakko kau tu tasondok dan Ayahkau na maliek na tasondok tu akan mangagikan upoh kapado kau." AJARAN TANTANG BADOA ⁵ "Dan, katiko kau badoa, jangan sakiro urang-urang munafik karano sidak sukko tagak jongon badoa di sinagoge -sinagoge jongon disudut-sudut jalan supayo diliek urang lain. Ambo mangatokan na sabanayo kapado kau, sidak ala manarimo upohnyo. ⁶ Akan tatapi, katiko kau badoa, masukklah kadalam kamar kau jongon tutuplah pintunyo, dan badoalah kapado Ayahkau na ado ditampek tasondok, mako Ayahkau na maliek na tasandok tu akan mangagikan upoh kapado kau. ⁷ Jongon katiko kau badoa, jangan manggunokan kato-kato na indak ado artinyo, sakiro na dilakukan urang-urang na indak manando Allah, sabab sidak mangiro jongon banyaknyo kato-kato, sidak akan didangakan. ⁸ karano itu, jangan sakiro sidak Ayahkau manau apo na kau pabuek sabalum kau mamintak kapado-Nyo. ⁹ Badoalah damikian, Ayah kami na di surga, dikuduskanlah namo-Kau. ¹⁰ Datanglah karajaan-Kau, jadilah kahandak-Kau di bumi sakiro di surga. ¹¹ Agikanlah kami, pado hari ko, makkanan kami na sacukkupnyo. ¹² Dan, ampunilah kasalahan-kasalahan kami, sakiro kami pun mangampuni urang-urang na basala kapado kami. ¹³ Dan, janganlah mambaok kami kadalam pancuboan, tatapi lapekanlah kami dari na jahek. Karano Kaulah Sang Pampunyo Karajaan, jongon kuaso, jongon kamuliaan sampe salamo-lamonyo. Amin.' ¹⁴ Karano jiko kau mangampuni kasalahan-kasalahan urang lain, Ayah surgawikau pun akan mangampunikau. ¹⁵ Akan tatapi, jiko kau indak mangampuni kasalahan-kasalahan urang lain, Ayahkau pun indak nakkan mangampuni kasalahan-kasalahan kau." PARILAKKU KATIKO BAPUASO ¹⁶ "Jongon, katiko kau bapuaso, jangan murung sakiro urang munafik karano sidak mangubah mukkonyo supayo diliek sadang bapuaso samo urang lain. Ambo mangatokan na sabananyo kapado kau bahwo sidak ala manarimo upohnyo. ¹⁷ Akan tatapi, kau, katiko bapuaso, minyakilah kapalo kau jongon basulah mukko kau ¹⁸ supayo puaso kau indak diliek urang, tatapi samo Ayahkau na barado di tampek na tasondok. Jongon, Ayahkau na maliek pabuatan kau na tasondok tu akan mambalenyo kapado kau." KUMPUKANLAH HARTO DI SURGA ¹⁹ "Jangan manimbun untuk dirikau sorang harto di bumi, tampek ngengat jongon karek marusak, dan tampek pancilok mambongkar sarto mancilok. ²⁰ Akan tatapi, kumpukan untuk dirikau sorang harto di surga, tampek ngengat jongon karek indak marusak dan tampek pancilok indak mambongkar sarto mancilok. ²¹ Karano ditampek hartokau barado, disitu pulo hatikau barado." ²² " Mato iyolah palito badan. Jadi, kok matokau elok, sadonyo badankau akan manjadi tarang. ²³ Akan tatapi, jiko matokau jahek, saluruh badankau akan panuh kagalapan. Jadi, kok tarang na saharusnyo ado padokau iyolah kagalapan, batapo pakketnyo kagalapan tu." ²⁴ "Indak ado urang na dapek malayani dou tuan karano inyo akan mambanci tuan na saincek jongon mangasihi na lain, ato inyo akan satio kapado tuan na saincek jongon manyapelekan na lain. Kau indak dapek malayani Allah dan mamon." JANGAN KAU RISO ²⁵ "Sabab itulah Ambo bacakkap kapado kau, jangan riso tantang hidup kau, apo na akan kau makkan ato apo na kau minum. Damikian juo tantang badankau, apo na akan kamu pakke. Indakkah hidup labi panting daripado makkanan, dan badan daripado pakkean? ²⁶ Lieklah pipik-pipik di langik na indak manabur, indak manuai, dan indak mangumpakan ka dalam lumbung, tatapi Ayah surgawikau mangagi sidak makkan. Indakkah kau labi bahargo daripado sidak? ²⁷ Siapakah di antaro kau na karano riso dapek manamabah sahasta pado usionyo? ²⁸ Dan, tantang pakkean, mangapo kau riso? Parhatikan bungo bakung di padang, macammano sidak tumbuh, sidak indak bakarajo jongon indak mamintak, ²⁹ tatapi Ambo mangatokan kapado kau bahwo Salomo dalam sagalo kamuliaanyo pun indak bapakkean sakiro salah saincek dari bungo-bungo tu. ³⁰ Jadi, jiko rumput dipadang, na ado hari ko jongon barisuk dilantingkan ka dalam parapian, Allah mandandaninyo sadamikian rupo, indakkah talabi lai kau, hai kau na kurang iman? ³¹ Karano itu, jangan kau riso jongon bacakkap, 'Apo na nandak kami makkan?', ato 'Apo na nandak kami minum?', ato 'Apo na nandak kami pakke?' ³² Sabab, bangsa-bangsa lain mancari-cari sadonyo ikko jongon Ayah surgawikau tahu bahwo kau mambutuhkan sadonyo ikko. ³³ Akan tatapi, carilah duluan Karajaan dan kabenaran-Nyo, dan sadonyo itu ditambahkan kapado kau. ³⁴ Jadi, jangan riso tantang hari barisuk karano barisuk hari akan marisokan dirinyo sorang. Cukuplah suatu hari jongon kasusahannyo sorang."