¹ Katiko maliek urang banyak tu, Yesus naik ka ate bukkik. Dan, satala Inyo duduk, murid-mudrid-Nyo datang kapado-Nyo, ² Dan, Inyo mambukkak mulut-Nyo dan mangajar sidak, cakkap-Nyo, ³ "Dibarkatilah urang na miskin dalam roh sabab sidak mampunyoi karajaan Surga. ⁴ Dibarkatilah sidak na badukkocito sabab sidak akan dihibur. ⁵ Dibarkatilah urang na lembut hatinyo sabab sidak akan mawarisi mawarisi bumi. ⁶ Dibarkatilah sidak na lapa jongon haus akan kabenaran sabab sidak akan dikanyangkan. ⁷ Dibarkatilah sidak na babale kasihan sabab sidak akan manarimo bale kasihan. ⁸ Dibarkatilah sidak na bersih di dalam hati sabab sidak akan maliek Allah. ⁹ Dibarkatilah sidak na mambaok dame sabab sidak akan disabut anak-anak Allah. ¹⁰ Dibarkatilah sidak na disikso dami kabenaran sabab sidak na mampunyoi Karajaan Surga. ¹¹ Dibarkatilah kau apobilo urang mancela kau jongon manyikso kau, dan mangatokan sagalo maccam pakatoan jahek tahadok kau jongon fitnah karano Ambo. ¹² Basukocito jongon bagambirolah karano gadang upah kau di surga karano baitulah sidak manganianyo paro nabi sabalum kau." GARAM JONGON TARANG DUNIO ¹³ "Kau iyolah garam dunio, tatapi kok garam tu manjadi hambar, jongon apo inyo diasinkan? Inyo indak baguno samo sakkali salain untuk di campakkan jongon dipijak-pijak samo manusio." ¹⁴ "Kau iyolah tarang dunio. Kota na talatak di ate bukkik indak dapek di sondokkan. ¹⁵ Urang-urang pun indak manyalokan palito jongon malatakkannyo di bawah gantang, malainkan di ateh kakki palito, dan inyo manarangi sadonyo na ado di dalam rumah. ¹⁶ padialah tarangkau bacahayo jongon caro na samo supayo sidak dapek maliek parilaku-parilaku kau na elok jongon mamuliokan Ayah kau na di surga." PANGGANAPAN HUKUM TAUREK JONGON KITAB PARO NABI ¹⁷ "Jangan bapikki bahwa Ambo datang mantiadokan Hukum Taurek ato kitab paro nabi. Ambo datang bukan untuk mantiadokannyo malainkan untuk mangganapinyo. ¹⁸ Ambo mangatokan na sabananyo kapado kau, sampe langik jongon bumi balalu, indak ado saincek iota ato saincek coretan pun na akan hilang dari Hukum Taurek sampe sadonyo di ganapi. ¹⁹ Karano itu siapo na mantiadokan salah saincek dari parinto-parinto taketek ko dan mangajar urang lain untuk malakukan hal na samo, inyo akan disabut na taketek dalam Karajaan Surga. Namun, siapo na malakukan parintoh-parintoh tu dan mangajarkan nyo akan disabut gadang dalam Karajaan Surga. ²⁰ Sabab, ambo mangatokan kapado kau jiko kabenaran kau indak labih elok daripado kabenaran ahli-ahli Taurek jongon urang-urang Farisi, kau samo sakkali indak nakkan masuk ka dalam Kerajaan Surga. MANGANAI URANG NA BERANG KAPADO SODARONYO ²¹ Kau ala mandanga na dikatokan kapoda nenek moyang kito, 'Jangan mambunuh,' jongon 'Siapo na mambunuh patut dibaok ka pangadilan.' ²² Akan tatapi, Ambo mangatokan kapado kau bahwa siapo pun na berang kapado saudaranyo patut barado dalam hukuman, jongon siapopun na bacakkap kapado sodaronyo, ' Kau dollak,' patut barado di mukko Mahkamah Agamo, jongon siapo pun na bacakkap, 'Kau dollak,' patut barado dalam api narakko. ²³ Karano itu, jiko kau mampasembakan pasembahan kau diate altar, dan disinun kau taringek bahwa sodaro kau mampunyoi sasuatu tahadok kau, ²⁴ tinggakanlah pasembahan kau tu dimukko altar dan pailah untuk talabi dahulu didamekan jongon sodaro kau, satala itu kambalilah jongon pasembakan pasembahan kau. ²⁵ Salakke mungkin, badamelah jongon urang na manudu kau salagi kau dalam pajalanan basamonyo supayo jamgam panuduh kau tu manyerahkan kau kapado pagawenyo, dan kau di dijobloskan ka dalam panjaro. ²⁶ Ambo mangatokan na sabananyo kapado kau, kau ndak nakkan pana kalua dari sinun sampe kau mamba'i sen na tarakhir." URANG NA BAZINO ²⁷ "Kau ala mandanga bahwo dikatokan, 'Jangan bazino.' ²⁸ Akan tatapi, Ambo mangatokan kapado kau bahwo satiok urang na mamandangi saurang padusi jongon manginginkannyo, inyo ala bazino jongon padusi tu didalam hatinyo. ²⁹ Kok mato kanan kau mambuek kau badoso, cukkilah mato kau tu dan campakkanlah. Sabab, labi elok kau kahilangan salah saincek anggota tubu kau daripado saluruh tubu kau dicampakkan ka dalam narakko. ³⁰ Dan, jiko tangan kanan kau mambuek kau badoso, bala dan campakkanlah tangan kau tu karano labi elok kau kahilangan salah saincek dari anggota tubu kau daripado saluruh tubu kau dicampakkan ka dalam narakko. ATURAN TANTANG PACAREAN ³¹ Ala dikatokan: siapo na mancarekan bininyo harus mangagi surek care kapado bininyo tu. ³² Akan tatapi, Ambo mangatokan kapado kau bahwa satiok na mancarekan bininyo, kacuali karano zino, inyo mambuek bininyo bazino. Dan, siapo na manikka jongon padusi na ala dicarekan tu, inyo juo bazino. MANGANAI SUMPAH ³³ Sakkali lai, kau ala mandanga na dikatokan kapado nenek moyang kito, 'Jangan basumpa palsu, tatapi panuhilah sumpa kau tu di hadapan Tuhan.' ³⁴ Namun, Ambo bacakkap kapado kau: jangan sakkali-kali kau basumpa, elok dami surga karano sura iyolah tahta Allah, ³⁵ atopun dami bumi karano bumi iyolah tumpuan kakki-Nyo, atopun dami Yerusalem karano itu iyolah kota Sang Rajo Gadang. ³⁶ Jangan juo kau basumpa dami kapalo kau karano kau indak dapek mambuek sahale rambut pun, putih ato hitam. ³⁷ Namun, handaklah pakatoam kau, iyo kok iyo, indak kok indak,karano na salabihnyo dari itu barasal dari si jahek. MANGANAI PAMBALEAN ³⁸ Kau ala mandanga apa na ala dikatokan, 'Mato tukka mato jongon gigi tukka gigi.' ³⁹ Namun, ambo mangatokan kapado kau jangan malawan na jahek, malainkan siapo na manampa mukko kanan kau, sodorkan kapadonyo mukko kau na lain tu. ⁴⁰ Dan, jiko sasaurang handak manuntut kau jongon mangambik baju kau, agikan pulo jubah kau kapadonyo. ⁴¹ Dan siapo na mamakso kau bajalan 1 mil, bajalanlah basamonyo sajauh 2 mil. ⁴² Agilah kapado urang na mamintak kapado kau dan jangan manulak orang na nandak maminjam darikau." KASIHILAH MUSUH KAU ⁴³ " Kau ala mandanga na difirmankan, 'Kaihilah sasamo kau,' jongon bancilah musuhkau,' ⁴⁴ Namun, ambo bacakkap kapado kau, kasihilah musuh-musuh kau dan badoalah bagi urang-urang na manganiayo kau, ⁴⁵ jongon damikian kau dapek manjadi anak-anak Ayahkau na di surga karano Inyo manarbitkan matohari-Nyo bagi urang jahek dan na elok, jongon manurunkan hujan bagi na benar jongon na indak benar. ⁴⁶ Sabab, kok kau hanyo mangasihi urang-urang na mangasihi kau, upoh apo na kau dapekkan? Indakkah pangumpu pajak pun malakukan hal na samo? ⁴⁷ Dan, jiko kau mambari salam hanyo untuk kapado sodaro-sodaro kau, apo labinyo pabuatan kau? Indakkah urang-urang na indak manando Allah pun babuek baitu? ⁴⁸ Karano itu, kau harus manjadi sampurno, sakiro Ayahkau na di surga adalah sampurno."