¹ "Jangan manghakimi supayo kau indak dihakimi. ² Karano jongon panghakiman na kau gunokan untuk manghakimi, kau akan dihakimi, dan jongon ukkuran na kau gunokan untuk mangukku akan diukkukan kapado kau. ³ Dan, mangapo kau maliek serpihan kayu dimato sodarokau, tatapi indak mangatahui balok na ado dimato kau sorang? ⁴ Ato, maccammano biso kau bacakkap kapado sodaro kau, 'Padia ambo mangaluakan serpihan kayu tu dari matokau,' tatapi liek, ado balok dimato kau sorang? ⁵ Hei, urang munafik, kalukan dulu balok tu dari matokau, dan kamudian kau akan maliek jongon jale untuk mangaluakan seroihan kayu dari mato sodarokau. ⁶ Jangan mambarikan barang na kudus kapado anjing-anjing, jangan pulo malanting mutiaro kau ka mukko babi supayo sidak indak mampijak-pijak tu jongon kakkinyo dan babalik mancabik-cabik kau." MINTAKLAH, CARILAH, JONGON TOKKOKLAH ⁷ "Mintaklah, dan hal tu akan diagikan kapado kau. Carilah, dan kau akan mandapek. Tokkolah, dan hal tu akan dibukkokan kadikau. ⁸ Sabab, satiok urang na mamintak,inyo manarimo, dan urang na mancari akan mandapekkan, dan inyo na manokkok akan dibukkokan. ⁹ Ato, siapokah dari antaro kau, jiko anaknyo mamintak roti akan mangagi batu kapado anaknyo tu? ¹⁰ Ato, jiko anaknyo mamintak lauk, inyo indak nakkan mangagikan ula kapado anaknyo tu, indak? ¹¹ Jadi, jiko kau na jahek tau maccammano mangagi anak-anakkau pambarian-pambarian na elok, talabi lai Ayahkau na di surga, Inyo akan mangakikan na elok kapado sidak na mamintak kapado-Nyo." HUKUM NA TARUTAMO ¹² "Karano itu, sagalo sasuatu na kau nandak urang pabuek kapado kau, damikian pulo kau pabuek kapado sidak karano ikkolah isi Hukum Taurek jongon kitab paro nabi." JALAN MANUJU KAHIDUPAN ¹³ " Masuklah malalui gerbang na sampik karano lawelah gerbang dan luaslah jalan na manuju kapado kabinasoan, jongon ado banyak na masuk lewat inyo. ¹⁴ Sabab, sampiklah gerbang dan saseklah jalan manuju kapado kahidupan, jongon saketek na manamukonnya." PARINGEKAN TANTANG NABI-NABI PALSU ¹⁵ " Namun, waspadolah tahadok nabi-nabi palsu na datang kapado kau jongon bapakkean domba, tatapi sabananyo sidak iyolah sarigalo-sarigalo na buas. ¹⁶ Dari buahnyolah kau akan manando sidak. Dapekkah urang mangumpukan buah-buah anggur dari samak-samak duri jongon buah-buah aru dari tumbu-tumbuhan baduri? Damikian pulo, satiok batang na elok manghasilkan buah na elok, tatapi batang na indak elok manghasilkan buah na indak elok. ¹⁸ Batang na elok indak mungkin manghasilkan buah na indak elok, dan batang na indak elok indak mungkin manghasilkan buah na elok. ¹⁹ satiok batang na indak manghasilkan buah na elok akan ditabang dan dicampakkan ka dalam api. ²⁰ Jadi, dari buah-buahnyo kau akan manando sidak. ²¹ Indak sadonyo urang na bacakkap kapado-Ambo, 'Tuhan, Tuhan,' akan masuk kadalam Karajaan Surga, malainkan inyo na malakukan kahandak Ayah ambo na di surga. ²² Pado hari tu, banyak urang akan bacakkap kapado-Ambo, 'Tuhan, Tuhan, indakkah kami bernubuat dalam namo-Kau, jongon mambuek banyak mukjizat dalam namo-Kau?' ²³ Lalu, Ambo nandak manyatokan kapado sidak, 'Ambo indak pana manando kau! Enyahlah dari-Kau, kau na mangkarajokan kasalahan!''' Mandanga jongon Malakukan ²⁴ "Karano itu, sadonyo urang na mandanga pacakkapan-pacakkapan-Ambo ko jongon malakukannyo akan manjadi sakiro urang bijaksano na mambangun rumahnyo di ate batu. ²⁵ Lalu, turunlah hujan jongon datanglah banjir, dan angin batiup manimpok rumah tu, dan rumah tu indak di runtuhkan karano ditagakkan di ate batu. ²⁶ Dan, satiok urang na mandanga pacakkapan-Ambo ko jongon indak malakukannyo akan manjadi sakiro urang dollak na mambangun rumahnyo di ate kasik. ²⁷ Lalu, turunlah hujan dan datanglah banjir, jongon angin batiup manimpok rumah tu, dan rumah tu runtuh, dan gadang bana karusakannyo." ²⁸ Katiko Yesus salase mangatokan hal-hal ko, urang banyak tacangan-cangang samo pangajarann-Nyo, ²⁹ karano inyo mangajar sidak sabage urang na bakuaso, jongon indak sakiro ahli-ahli Taurek sidak.