¹ Yesus mangecek, "Jongon sasungguhnyo, Ambo mangatokan kapado kau, urang nan masuk ka kandang domba jongon indak malalui pintu, malaikan jongon mamanjik malalui jalan lain, urang itu adolah pancuri dan perampok. ² Akkan tatapi, urang nan masuk mamalui pintu, innyo adolah gembala domba. ³ Baginyo, panjago pintu mambukkokan pintu, dan domba-domba mandanga suaronyo dan innyo mangimbo domba-dombanyo sandiri jongon namo sidak, sarto manuntun sidak ka lua. ⁴ Sasudah mangaluakan sadonyo dombanyo, innyo bajalan di depan sidak dan domba-dombanyo akkan mangikkuti innyo karano sidak manando suaronyo. ⁵ Urang asing indak akkan sidak ikkuti, tatapi sidak akkan lari dari padonyo karano sidak indak manando surao urang-urang asing." ⁶ Parumpamaan itulah nan dikatokan Yesus kapado sidak, tatapi sidak indak mangerti apo nan baru sajo Yesus katokan kapado sidak. ⁷ Oleh saba b itu, Yesus mangecek lai kapado sidak, "Sasungguhnyo, Ambo mangecek kapado kau Ambolah pintu ka dumba-domba itu. ⁸ Sadonyo urang nan datang sabalum Ambo adolah pancuri dan parampo, tatapi domba-domba indak madanga sidak. ⁹ Ambolah pintu. Jiko sasaurang masuk malalui Ambo, innyo akkan di salamekkan dan kalua masuk, sarto mandapek kan padang rumput. ¹⁰ Pancuri datang hanyo untuk mancuri, mambunuh dan mambinasokan; Ambo datang supayo sidak mamilikki hidup, dan mamilikkinyo sacaro balimpah. ¹¹ Ambolah gembala nan baik; gembala nan baik mangagikan nyawa-Nyo bagi domba-domba. ¹² Saurang upahan, bukkan saurang gembala, nan bukkan pamilik domba-domba itu, maliek srigala datang, innyo maninggakan domba-domba itu dan lari; serigala itu akkan manerkam dan mancerai-beraikan domba-domba itu. ¹³ Innyo lari karano innyo saurang upahan dan indak paduli pado domba-domba itu. ¹⁴ Ambolah gembala nan baik. Ambo manando domba-domba-Ambo dan domba-domba-Ambo manando Ambo ¹⁵ samo maccam Ayah manando Ambo dan Ambo manando Ayah; dan Ambomangagikan nyawa-Ambo bagi domba-domba itu. ¹⁶ Ambo juo mampunyoi domba-domba lain nan bukkan dari kandang ikko; Ambo harus mambawo sidak juo, dan sidak akkan mandanga suaro-Ambo; dan sidak akkan manjadi satu kawanan jongon sabua gembala ¹⁷ Karano ikkolah Ayah mangasihi Ambo, sabab Ambo mangagikan nyawa-Ambo supayo Ambo dapek mangambiknyo kambali. ¹⁸ Indak saurang pun ala mangambiknyo dari-Ambo, malainkan Ambolah nan mangagikannyo manurut kahendak-Ambo sandiri. Ambo mampunyoi hak untuk mangagikan nyawa-Ambo, dan ambo juo mampunyoi hak untuk mangambiknyo kambali. Ikkolah parintah nan Ambo tarimo dari Ayah-Ambo." ¹⁹ Sakkali lai, ado parpecahan di antaro urang-urang Yahudi karano pangecekan Yesus itu. ²⁰ Banyak dari sidak nan mangecek, "Innyo karasukan roh jahek dan manjadi manggilo. Mangapo sidak mandangakan Innyo?" ²¹ Nan lain mangecek, "Itu bukkan pangecekan saurang nan karasukan roh jahek mambukko mato urang buto?" YESUS DAN AYAH ADOLAH SABUA ²² Pado waktu itu, hari rayo Penahbisan balangsung di Yesrusalem. Saat itu musim dingin, ²³ dan Yesus sadang bajalan di Bait Allah, yaitu di Serambi Salomo. ²⁴ Lalu, urang-urang Yahudi bakumpul mangelilingi Innyo dan mangecek kapado-Nyo, "Barapo lamo lai Kau mambiakan jiwa kami bimbang? Jiko Kau Kristus, katokanlah tarus tarang kapado kami." ²⁵ Yesus manjawab sidak, "Ambo ala mangatokan kapado kau tatapi kau indak piccayo. Pakarejoan-pakarejoan nan Ambo lakkukan dalom namo Ayah-Ambo, itu lah nan mangagikan kasaksian tantang Ambo. ²⁶ Akkan tatapi, kau indak piccayo karano kau indak tamasuk domba-domba-Ambo. ²⁷ Domba-domba-Ambo mandangakan suaro-Ambo, Ambo manando sidak dan sidak mangikkuti Ambo. ²⁸ Ambo mangagikan hidup kekal kapado sidak indak akkan panah binaso; dan tak saurang pun dapek marebut sidak dari tangan-Ambo. ²⁹ Ayah-Ambo nan ala mangagikan sidak kapado-Ambo, labih gadang dari pado sadonyo, dan indak ado saurang pun dapek marebut sidak dari tangan Ayah. ³⁰ Ambo dan Ayah adolah sabua." ³¹ Sakkali lai, urang-urang Yahudi mangambik batu untuk malantingi Yesus. ³² Akkan tatapi, Yesus mangecek kapado sidak, "Ambo ala manunjukkan kapado kau banyak pakarejoan baik dari Ayah, pakarejoan manokah dari antaronyo nan mambuek kau nandak malantingi Ambo jongon batu?" ³³ Urang-urang Yahudi itu manjawab Innyo, "Bukkan karano suatu pakarejoan baik kami nandak malantingi Kau jongon batu malainkan karano hujat; dan karano Kau saurang manusio, manjadikan diri-Kau Allah." ³⁴ Yesus manjawab sidak, "Bukkankah tatulis dalom Kitab Taurat, 'Ambo ala bafirman, Kau adolah Allah'? ³⁵ Jiko Allah manyebut sidak nan manarimo firman itu 'allah', padahal Kitab Suci indak bisa di batalkan, ³⁶ apokah kau mangatokan tantang Innyo nan ala Ayah kuduskan dan utus ka dalom dunia, 'Kau manghujat', karano Ambo mangecek kapado kau, 'Ambo adolah Anak Allah'? ³⁷ Jiko Ambo indak malakkukan pakarejoan-pakarejoan Ayah-Ambo, jangan piccayo kapado-Ambo. ³⁸ Akkan tatapi, jiko Ambo malakkukan pakarejoaan-pakarejoan itu, meskipun kau indak piccayo kapado-Ambo, piccayolah akkan paarejoan itu supayo kau tau dan mangerti bahwa Ayah di dalom Ambo, dan Ambo di dalom Ayah." ³⁹ Sakali lai, sidak mancubo manangkap Yesus, tatapi Innyo lape dari sidak. ⁴⁰ Lalu, Yesus pai lai manyubarangi sungai Yordan manuju ka tampek Yohanes partamo kali mambabtis dalu dan Yesus tingga di sinun. ⁴¹ Banyak urang datang kapado-Nyo dan mangecek, "Meskipun Yohanes indak malakkukan satu tando ajaib pun, tatapi sadonyo nan dikatokan Yohanes tantang Urang ikko benar." ⁴² Dan, banyak urang manjadi piccayo kapado-Nyo di sinun.