Bahkann parjanjian nan lamo pun barisi tantang paraturan ibadah dan tampek kudus nan ado di bumi. ² Karano damikianlah Kemah Allah dipersiapkan: bagian luar, nanpadonyo tadapek palito, meja, dan roti sajian, disabut Tampek Kudus. ³ Di balakkang tirai kaduo adolah kemah nan di sabut Ruang Mahakudus, ⁴ di tampek itu tadapek altar padupaan nan tabuek dari ame dan Tabut Parjanjian nan saluruh sisinyo di lapisi ame. Di dalom tabut itu tadapek sabuah kendi ame nan baisi manna, tongkat Harun nan panah batunas, sarto duo lempeng batu parjanjian. ⁵ Di atenyo, ado duo kerub kamuliaan nan manaungi Tutup Pandamaian, tatapi saat ikko bukkanlah waktu tepat untuk mambicarokannyo sacaro tarinci. ⁶ Satalah sadonyo itu diparsembahkan sademikianrupo, paro imam masuk ka bagian partamo dari kemah itu sacaro rutin, untuk malakkukan palayanan ibadah kapado Allah. ⁷ Akkan tatapi, hanyo imam gadang sajo nan dibolehkan masuk kabagian kaduo dari kemah itu, itu pun hanyo satahun sakali, dan mambawo darah untuk di parsembahkan kapado Allah damikiannyo sandiri dan dami dosa-dosa umat nan dilakkukan tanpo sangajo. ⁸ Roh Kudus manyatokan kapado kito bahwo jalan manuju Ruang Mahakudus balum tabukko salamo Ruang Kudus masih ado, ⁹ hal itu adolah kiasan manganoi zaman ikko. Damikian juo babagai pangagian dan kurban-kurban nan di parsembahkan indak dapek manyampurnakan nurani urang-urang nan baribadah, ¹⁰ sabab hanyo bakaitan jongon makkanan, minuman, dan ritual pambasuhan untuk tubuh jasmani nan balakku hinggo tibonyo waktu pambaharuan. IBADAH DALOM PARJANJIAN NAN BARU ¹¹ Namun, katiko Kristus datang sabagai Imam Gadang ate hal-hal baik nan akkan datang, Innyo masuk malalui Tampek Kudus na labih gadang nan labih sampurno; nan indak di buek oleh tangan manusio dan bukkan lah suatu ciptaan. ¹² Innyo masuk ka Ruang Mahakudus satu kali untuk salamonyo, bukkan jongon mambawo darah kambing jantan dan darah anak sapi, tatapi jongon mambawo darah-Nyo sandiri sahinggo mandapekkan panabusan nan kekal. ¹³ Sabab, jiko pamercikan darah kambing jantan, dan sapi jantan, dan juo abu anak sapi batino kapado urang nan najis dapek manyucikan tubuh jasmani sidak, ¹⁴ Labih-labih lai darah Kristus, yaitu Innyo nan malalui Roh nan kekal mampersembahkan diri-Nyo sabagai kurban nan indak bacacat kapado Allah untuk manyucikan hati nurani kau dari pabuean sio-sio supayo kau dapek malayani Allah nan hidup. ¹⁵ Untuk alasan ikkolah Kristus manjadi Parantaro dari pajalanan nan baru supayo sidak nan ala di imbo Allah biso manarimo warisan kekal nan ala dijanjikan-Nyo; sabab sabuah kamatian ala tajadi unntuk manabus sidak dari palanggaran-palanggaran nan sidak lakkukan di bawah parjanjian nan partamo. ¹⁶ Jiko ado surat wasiat, mako harus ado kamatian dari urang nan mambueknyo. ¹⁷ Sabab, surat wasiat hanyo balakku jiko urang nan mambueknyo ala mati; surat itu indak mamiliki kuaso salamo urang nan mambueknyo masih hidup. ¹⁸ Itulah sababnyo, mangapo parjanjian partamo pun indak balakku tanpo kurban darah. ¹⁹ Sabab, sasudah Musa mangagitaukan satiok parintah dalom Hukkum Taurat kapado umat Israel, innyo mangambik darah anak sapi dan kambing lalu mancampurkannyo jongon air. Dan manggunakan kain wol merah sarto sabatang hisop, innyo mamarcikkannyo pado Kitab Taurat dan pado sadonyo umat ²⁰ sambil mangecek, "Ikkolah darah dari parjanjian nan ala Allah parintokkan untuk kau taati." ²¹ Jongon caro nan samo, Musa juo mamarcikkan Kemah Suci dan sadonyo parlengkapan nan digunokan dalom ibadah jongon darah. ²² Manurut Hukkum Taurat, hampir sagalo sasuatu harus di sucikan jongon darah, dan tanpo adonyo panumpahan darah, indak akkan ado pangampuan. YESUS KRISTUS ADOLAH KURBAN PANGHAPUS DOSA ²³ Karano itu sagalo sasuatu nan malambangkan hal-hal surgawi sangat parlu di sucikan jongon hal ikko, tatapi sagalo sasuatu nan di surga di sucikan jongon kurban nan labih baik. ²⁴ Sabab, Kristus indak masuk ka dalam Ruang Mahakudus nan dibuek oleh tangan manusio, nan hanyolah tiruan dari nan sasungguhnyo, tatapi Innyo masuk kadalam surga itu sandiri dan kini barado di hadapan Allah demi kito. ²⁵ Kristus juo indak mampersembahkan diri-Nyobakali-kali, maccam imam gadang nan harus masuk ka Ruang Mahakudus dari tahun ka tahun jongon mambawo darah nan bukkan darahnyo sandiri. ²⁶ Jiko damikian, Kristus harus mandarito barulang kali sajak dunia diciptokan. Akkan tatapi, Kristus hanyo manyatokan diri-Nyo satu kali salamo-lamonyo pado zaman akhir ikko dami manghapus dosa, jongon caro mampersembahkan diri-Nyo sandiri. ²⁷ Maccam manusio, nan ditantukan untuk mati satu kali sajo dan sasudah itu manghadap panghakkiman, ²⁸ damikkian juo Kristus; Innyo hanyo satu kali sajo untuk mananggung dosa banyak urang, dan akkan datang untuk kadua kali nyo bukkan untuk mananggung dosa, malainkan untuk mambawo kasalamatan bagi sidak nan manantikan Innyo.