¹ Oleh karano itu, salamo janji untuk masuk ka tampek pambarantian-Nyo masih balakku, kalo-kalo ado di antaro kito nan gagal mandapekkan janji itu. ² Memang batul, kabar baik ala di baritokan kapado kito, saparti juo ala di baritokan kapado sidak, nan tatapi barito nan sidak danga itu indak manguntungkan sidak karano indak di satukan jongon iman urang-urang nan mandangakannyo. ³ Karano kito nan piccayo, akkan masuk ka tampek pambarantian itu, maccam nan dikatokan-Nyo "Ambo basumpah dalom marah-Ambo: 'Sidak indak akkan panah masuk ka tampek pambarantian-Ambo,"' Mazmur 95: 11 maskipun pakarejoan Allah ala salase sajak panciptoan dasar dunia ikko. ⁴ Sabab, dalom sabuah nas, Allah babicaro damikian tantang hari ka- tujuh, "Pado hari katujuh, Allah bahanti dari sadonyo pakarejoan-Nyo." ⁵ Akkan tatapi, saparti nan ala dikatokan Allah, "Sidak indak akkan masuk ka tampek pambarantian-Ambo." ⁶ Jadi, masih ado kamungkinan untuk sabagian urang masuk ka tampek pambarantian, dan ado sabagian urang nan sabalumnyo ala mandanga kabar baik, tatapi gagal masuk karano katidaktaan sidak. ⁷ Jadi, sakali lai Allah manetapkan satu hari tatentu nan di sabut "hari ikko", nan ala di katokan malalui Daud jauh sabalumnyo, "Pado hari ikko, jiko kau mandanga suaro-nyo, janganlah karekan hatikau maccam dalom." Mazmur 95:7-8 ⁸ Sabab, jiko Yosua ala mangagi sidak tampek pambarantian, mako Allah indak akkan lai mangecek tantang suatu hari lain di kamudian hari. ⁹ Jiko damikian, mako masih ado pambarantian pado hari Sabat untuk umat Allah. ¹⁰ Untuk sidak nan ala masuk ka tampek pambarantian Allah, sidak juo ala baristirahat dari pakarejoannyo, maccam nan Allah lakkukan dari pakarejoan-Nyo. ¹¹ Karano itu, marilah kito bajuang untuk masuk ka tampek pambarantian itu sahinggo tak saurang pun jatuh karano mangikuti contoh katidaktaatan nan samo. ¹² Sabab, firman Allah itu hidup dan bakuaso, dan labih tajam daripado pedang bamato duo mano pun. Firman itu manusuk jauh sampe mamisahkan jiwa dan roh, antaro sendi san tulang sumsum, sarto sanggup manilai pikkiran dan kahendak hati kito. ¹³ Indak ado suatu makhluk pun nan basambunyi dari pandangan-Nyo. Sabaliknyo, sagalo sasuatu talanjang dan tak tasambunyi dari mato-Nyo. Kapado-Nyolah kito harus mangagi patanggung jawaban ate sadonyo nan kito lakkukan. Yesus Kristus adolah imam Gadang Kito ¹⁴ Karano kito mampunyoi Imam Gadang Agung nan ala naik ka surga, yaitu Yesus, Anak Allah, marilah kito tarus bapegang taguh pado pangakkuan kito. ¹⁵ Sabab, kito indak mamilik Imam Gadang nan indak dapek mamahami kalemahan-kalemahan kito, tatapi kito mampunyoi Imam gadang nan ala di cuboi dalom sagalo hal, samo maccam kito, tatapi innyo indak badoso. ¹⁶ Karano itu, jongon kayakkinan, marilah kito datang manghampiri takhta anugrah supayo kito manarimo baleh kasihan dan manamukan anugrah untuk manolong kito, katiko mambutuhkan nyo.