¹ Katiko kito mampunyoi banyak saksi nan mangalilingi kito maccam awan, marilah kito mainggakan sadonyo beban dan dosa nan manjarek kito dan balari jongon tekkun pado parlombaan nan di sadiokan di hadapan. ² Bialah mato kito tatuju pado Yesus, Sang pancipto dan mayampurnakan iman kito, nan dami sukkocito nan ala ditatapkan bagi-Nyo, rela mananggung salib dan mangabaikan kahinaan salib itu. Dan, kini, Innyo duduk di sabalah kanan takhta Allah. ³ Ingeklah akkan Yesus, nan tabah manghadopi parmusuhan dari urang-urang badosa sahinggo jiwa kau indak manjadi letih dan putus aso. ALLAH ITU MACCAM SAURANG AYAH ⁴ Dalom parjuangan kau malawan dos, kau balum sampe manumpahkan darah kau. ⁵ Dan, apokah kau ala malupokan nasihat nan diagikan kapado kau sabagai anak-anak? "Hai anak ambo, jangan anggap enteng didikan Tuhan, dan jangan maraso ketek hati katiko kau ditegur-Nyo ⁶ Sabab, Tuhan manghajar urang nan dikasihi-Nyo, dan mancambuk urang nan ditarimo-Nyo sabagai anak." Amsal 3:11-12 ⁷ Kau harus batahan dami didikan itu karano itu bararti Allah sadang mamparlakkukan kau sabagai saurang anak; lai pulo anak maccam apokah nan indak dididik oleh ayahnyo? ⁸ Jiko kau indak panah saharusnyo ditarimo oleh sadonyo anak, kau adolah anak haram, bukkan anak nan sah. ⁹ Salain itu, kito mamiliki ayah-ayah di dunia ikko nan mandidik kito, dan nan kito hormati; jiko damikian, bukkankah kito harus labih manundukkan diri kapado Ayah ate sagalo roh dan ate hidup? ¹⁰ Sabab, jiko ayah nan ado di dunia ikko manghajar kito untuk waktu nan singkek badasarkan caro nan sidak anggap paling baik, Ayah nan ado di surga manghajar kito demi kabaikan kito sandiri sahinggo kito mamparoleh bagian dalom kakudusan-Nyo. ¹¹ Sadonyo didikan, pado saat diagikan, memang indak manyanangkan dan manyakitkan, Akkan tatapi, sasudah itu akkan manghasilkan buah kabenaran nan mangagi damai sajahtaro kapado sidak nan ala di latih oleh didikan itu. PARHATIKANLAH CARO HIDUP KAU ¹² Sabab, itu kuekkanlah tangan kau nan lemah dan lutuk kau nan goyah, ¹³ bueklah jalan nan lurus bagi kakki kau sahinggo tangke kakki nan lemah indak manjadi lumpuh, tatapi disambuhkan. ¹⁴ Kaja lah pardamaian jongon sadonyo urang, dan kaja lah kakudusan sabab tanpo kakudusan, indak dapek maliek Tuhan. ¹⁵ Pastikan supayo jangan ado saurang pun nan kahilangan anugrah Allah; pastikan juo supayo jangan ado akar paik nan tumbuh dan manimbulkan masalah sahinggo mancemari banyak urang. ¹⁶ dan, pastikanlah supayo jangan ado nan babuek cabul atau indak suci maccam Esau nan manjual hak kasulungannyo dami samangkuk makkanan. ¹⁷ Sabab kau tau bahwa di kamudian hari, katiko Esau manginginkan warisan berkat, innyo ditolak dan indak ado lai kasempatan untuk batobat sakkalipun innyo mancarinyo jongon mancucurkan air mato. ¹⁸ Sabab kau indak datang kapado gunung nan bisadi santuh, kapado api nan manyalo-nyalo, atau kapado kagalapan, kakelaman, dan badai. ¹⁹ kau pun indak datang kapado suaro tarompek, dan kapado suaro nan pangecekkannyo mambuek paro pandanganyo mamohon jongon sangat supayo pangecekan itu indak di kecekkan lai kapado sidak. ²⁰ sabab sidak indak dapek tahan mandanga parintah nan diagikan. " Bahwa jiko saekkor binatang sakkalipun nan mayantuh gunung itu, mako binatang itu harus di lantingi batu sampe mati." ²¹ Dan sademikan mangerikannyo pandangan itu sampe-sampe Musa pun mangecek, "Ambo gemetar katakkutan." ²² Namunn, kau ala datang ka Gunung Sion, dan ka kota Allah nan hidup, Yesrusalem surgawi, dan kapado malaikat nan indak tahitung jumlahnyo, ²³ kau ala datang kapado parkumpulan gadang jemaat nan tadiri dari anak-anak sulung Allah nan tadaftar di surga, kapado Allah, Hakkim ate sadonyo urang, dan kapdo roh urang-urang benar nan ala disampurnakkan. ²⁴ Kau ala datang kapado Yesus, parantaro parjanjian nan baru, dan kapado darah nan di percikkan, nan babicaro labih baik dari pado darah Habel. ²⁵ Pastikanlah supayo jangan kau manolak Innyo nan babicaro. Karano jiko sidak nan manolak Innyo nan mangagi paringean dari bumi sajo indak dapek malapekan diri, mako kito pun indak akkan dapek malapekan diri dari Innyo nan mangagi paringean dari surga. ²⁶ Dulu, suaro-Nyo mangguncang bumi, tatapi kini Innyo bajanji, "Namun, sakkali lai Ambo indak hanyo akkan mangguncangkan bumi tatapi juo surga." ²⁷ Ungkapan "sakali lai" manunjukkan tatang pamusnahan hal-hal nan dapek digoyangkan yaitu sadonyo nan ala diciptokan, supayo hal-hal nan indak digoyangkan indak dapek tingga tatap. ²⁸ Karano itu, sasudah kito manarimo karajaan nan indak tagoyangkan marilah kito manunjukkan raso syukur jongon mampersembahkan ibadah nan layak kapado Allah, nan di sartoi kakaguman, ²⁹ sabab Allah kito adolah api nan manghanguskan.