¹ Taruslah mamaliharo kasih parsaudaraan! ² Ingeklah salalu untuk mangagi tumpangan kapado urang-urang asing karano jongon malakkukan hal itu, babarapo urang ala manjamu malaikat-malaikat tanpo sidak sadari. ³ Ingelah urang-urang nan dipanjarokan saolah-olah kau dipanjarokan basamo sidak, ingeklah juo urang-urang nan dianiayo sabab kau pun barado didalom tubuh. ⁴ Parkawinan harus dijunjung jongon panuh hormat oleh sadonyo urang, dan jagolah ranjang parkawinan supayo tatap murni, sabab Allah akkan manghukkum nan cabul dan paro pazina. ⁵ Jauhkanlah hidup kau dari cinta uang, dan cukupkanlah diri kau jongon apo nan ado kau milikki sabab Innyo sandiri mangecek: "Ambo indak akkan maninggalkan kau dan indak akkan panah mangabaikan kau." Ulangan 31:6 ⁶ Jadi, kito dapek mangecek jongon panuh kayakkinan: " Tuhan adolah panolong ambo, dann ambo indak akkan takkut. Apo nan dapek dilakkukan urang tahadap ambo?" Mazmur 118:7 ⁷ Ingeklah paro pamimpin kau, sidak nan ala mangajarkan firman Tuhan kapado kau. Parhatikonlah hasil dari caro hidup sidak, dan contohlah iman sidak. ⁸ Yesus Kristus tatap samo, kamarin, hari ko, dan sampe salamo-lamonyo. ⁹ Janganlah kau disasekkan oleh pangajaran nan mamaccam-maccam dan nan indak kau tando; karano adolah hal nan baik bahwa hati dikuekkan oleh anugrah, bukkan oleh aturan tantang makkanan nan indak mangagi manfaat bagi sidak nan manjalaninyo. ¹⁰ Kito mampunyoi altar nan darinyo urang-urang nan malayani di kemah Suci indak berhak untuk makkan. ¹¹ Dan, karano tubuh dari hewan-hewan nan darahnyo dibawa oleh imam gadang ka Ruang Mahakudus sabagai parsembahan panabusan dosa dibakkar di lua parkemahan, ¹² mako Yesus juo mandarito di luar gerbang kota demi manguduskan umat-Nyo jongon darah-Nyo sandiri. ¹³ Karano itulah, marilah kito manjumpoi Yesus di lua parkemahan, dan mamikul kahinaan nan samo jongon kahinaan nan di pikil-Nyo. 14 Sabab, di bumi ikko kito indak mampunyoi kota nan akkan ado untuk salamo-lamonyo, tatapi kito sadang manantikan kota nan akkan datang. ¹⁵ Karano itu, malalui Kristus matilah kito tarus-manarus mampersembahkan kurban pujian kapado Allah, yaitu ucapan bibir nan mamuliakan namo-Nyo. ¹⁶ Janganlah kau lupo babuek baik dan mambagikan apo nan kau punyo karano kurban maccam itulah nan manyanangkan hati Allah. ¹⁷ Taatlah kapado pamimpin kau dan tunduklah kapado sidak karano sidaklah nan manjago jiwa kau dan nan harus mangagi pananggung jawaban atenyo. Jongon damikian, sidak akkan malakkukannyo jongon sukko cito, bukkan jongon kaluh kesah karano hal itu indka akkan mangagi kauntungan kapado kau. PARMOHONAN DOA ¹⁸ Badoalah untuk kami karano kami yakin bahwa kami mamilikki hati nurani nan baik, nan salalu barusaha malakkukan sagalo hal jongon caro nan tahormat. ¹⁹ Ambo mandesak kau untuk badoa jongon labih basungguh-sungguh lai supayo ambo sagao dikambalikan kapado kau. ²⁰ Kini, Allah sumber damai sajahtaro, nan ala mambangkitkan kambali Yesus. Tuhan kito, Sang Gembala Agung ate domba-domba-Nya, jongon darah parjanjian nan kekal ²¹ kironyo mamparlengkapi kau dalom satiok hal nan baik untuk malakkukan kahendak-Nyo. Dan, bialah Innyo bakarejo di dalom kito untuk manyanangkan hati-Nyo malalui Kristus Yesus, nan kapado-Nyolah kamuliaan sampe salamo-lamonyo Amin. SALAM PANUTUP ²² Saudaro-saudaro ambo, ambo mandorong kau untuk mandangakan kato-kato nasihat ambo jongon sabar sabab kato-kato nasihat ambo ikko ala ambo tuliskan kapado kau jongon singkat. ²³ Ambo ingin mangagitau kau bahwa saudaro kito, Timotius, ala dibebaskan dari panjaro. Dan, jiko innyo sagaro datang kapado ambo, mako ambo akkan datang basamo innyo saat manjumpoi kau. ²⁴ Sampekan salam kami kapado pamimpin kau dan kapado sadonyo urang-urang nan kudus. Saudaro-saudaro kito dari Italia manyampekan salam kapado kau. ²⁵ Anugrah Allah manyartoi kau sadonyo.