¹ Lepek puyan-puyan ini, aki menaat se malaekat ira' se nay kenta' umet surga. Ye un kekuasaan ya' jaau ngan ketu usun tana' ye ke ngedema soon peniga A. ² Ye ke ngelalo ngan tuyau ya' so, " lepek mapi', lepek mapi', Babel, lebu ya' jaau iti, ye lepek baliu ufan berue-berue jaat, ufan berue-berue najis, ngan ufan manuk ira jameng ngan sigut ale'. ³ Ketu' bangsa lepek medu' anggur ya' engkin ileu ufa' kepesifuk ya' lepek engkin kegeraman pala' ye. Pengaren-pengaren usun tana' lepek tay pesifuk ngan ye. Pedagang-pedagang ku' usun tana' lepek nai kaya' soon kemewahan pemuyan urip pa. ⁴ O iti E' sekening daau se isiu umet surga ti pisiu, " kawang na umet ye, iku' ya' baya' Aki', apan no' nce tay baya' dalem penyala'-penyala' a, ngan apan no' nce tay lepuk malapetaka-malapetaka ya' ye ke siu' iti. ⁵ Penyala'-penyala' a lepek tay petapen pafi' ku' langit, ngan Allah lepek ngetaway pemuyan-pemuyan na ira' jaat. ⁶ Menyua' na pala' ye, kua' kebaan na menyua' a, ngan bayan na due luway sui' o neng ufan na pegayengnga. Ineu ya' ye lepek pesugau dalem cawan, pesugau na kume ye due luway un nco sui'. ⁷ Neng ufan na maak use a tengen ngan murip un nco sui, mencay na kume ye penuyen ngan mapi taway ya' kua' kebaan puyan na. Ye un dalem atay a ti, "Aki ini uku' kebaan pengaren; mpey ye' se baleu un, ngan aki pelee mpey ye' ketay dite penusa un." ⁸ Neng mengiti o un se dau ufan na kesiu penuyen-penuyen ya' kenai mepuk ye: maut, tange ngan liyen. Ye ketay lenyo soon apui, ye ufan na Tuhan Allah iti berkuasa, ngan Ye pa Hakim ma. ⁹ Pengaren-pengaren usun tana' ira' lepek ufan uyai pekufek ngan ye ngan murip nce un tepuun ke menange ngan menyirau ye buk ke ire menaat ang apui iti menutung ye. ¹⁰ Ire ke nyelada umet su' ye ufan na takut siu penuyen na, entung ra pisiu, "Se ineu bareng ini, penaru na lebu' jaau, Babel, lebu' ya' mayeng! Ye ufan na ke se jam lu' lee penghukuman no' kenai pafi'." ¹¹ Ketu' ira' pebeley ku' usun tana' ini ke mivi' ye, ye ufan na mpey un kelunan ya' ufa' meneley ineu wa nuun. ¹² Yaiti ineu-ineu umet emas, perak, bateu permata, mutiara, api' lenan, api' ungu, api' sutra, api' kermizi, ketu' naan ineu ira' umet kayeu tiga bau'a, ketu naan ineu ira' umet uweng tulang, ketu' naan tenup umet kayeu ira' maan, Jangin, uton, pualam, ¹³ Kulit kayeu me, rempah-rempah, wangi-wangian, mur ngan tempak kemenyan, anggur, kelesi', sa' baa, jelay, petubo sapi, kading, domba, kuda, kereta', pafi' use kelunan pa. ¹⁴ Bua'-bua' ira' atek ileu ufa' lepek lenyo umet iku'. Ketu' peniga ngan kebangen no' lepek tay lenyo ngan mpey ketay tegu' a lee nuun. ¹⁵ Ketu' ira pebeley ineu ngan lepek nai kaya' ufan pengufa' a, ke nekedeng umet su' ufan ra takut ke siu' penuyen ya siu' ye, ire kemenange ngan menyirau so so. ¹⁶ Ire ke pisiu, " se ineu bareng ini, ketaru na lebu' jaau ya' un sapai lenan lanye, api' ungu ngan api' kermizi, ngan kelayen ira' kelekep pa umet emas, permata ira' maan ngan ketu' naan mutiara !" ¹⁷ Dalem se jam lu' ketu kekayaan biti mpey un se se bangnga nuun. Singket ira' engkin kapen, singket ira' malay ku' laut, ngan ketu kelunan ira' irap urip ra ku' laut, nekedeng ku' su' ti. ¹⁸ Ire ke mengalo daleu ra menaat apui ti menutung ye, un daau wa, " Lebu' ya' mpey lee kua' ngan lebu ya' jaau ini ? " ¹⁹ Ire parang afeu usun uleu ra, entung ra ngelalo, menange, ngan menyirau, celaka, taru na lebu ya' jaau ku' mpey ketu' kelunan ira' un kapen ku' laut ti nay kaya' soon kekayaan na. Ye ufan na dalem se jam lu' a lepek tay lenyo." ²⁰ Bangen taway na neng usun ye, hai surga, hai kelunan-kelunan bue' atay ngan penaway, rasul-rasul ngan ngan nabi-nabi, Ye ufan na Allah ti lepek pelabu' hukuman usun ye ufan soon ikam !" ²¹ Neng o iti se malaekat ya' mayeng ala' se bateu kebaan jaau kilangan ni sulo a menulo wa ku' laut, entung nga pisiu , " Mengini na, Babel, lebu' jaau iti, ke tay lenyo ngan sengarem ku' enta' ngan empey lu ketay tegu'a lee nuun. ²² Tuyau dulu tey sampeq, pemusik, ira' tey selingut, ngan ira' tey kedireq mpey nuun lu sekening nga noo ku' dalem iku'. Pafi' se pa lu nce dite ufan bua' gayeng ira tue uyay ineu ray ku' dalem iku'. Mpey un lee tuyau dulu menene ku' dalem iku'. ²³ Kedema umet apui mpey kenay lee nuun umet iku', ngan tuyau umet mempelay lakey ngan ledo mpey kenay lebau lee nuun umet iku' ye ufan na ketu' ira' pebeley kume iku' ray pengaren-pengaren usun tana', ngan bangsa-bangsa lepek tay menyala' soon puyan baley jaat to'. ²⁴ Ku' dalem ye, daa' nabi-nabi ngan kelunan ira' bue atay penaway ra dulu tegu', mengiri pa daa' ketu' kelunan ira' dulu menatay usun tana' ini.