¹ Dalem uman ya' ka leme sui' pulu' umet pengaren Kaesar Tiberius, daleu Pontius Pilatus jadi wali lebu' Yudea, ngan Herodea Paren Lebu' Galelia, Pilipus senganak a, Paren lebu Iturea ngan Trakhonitis, ngan Lisanias Paren lebu' Abilene, ² Daleu Hanas ngan Kayafas tai jadi Imam Jaau, nai Tebara' Allah ka pala' Yohanes, anak Zakharia di data mengkang. ³ Sulo nai Yohanes ku' mung lebu' Yordan ngan ngelalo" ngeluet na pala' janan teneng, ngan nai ngkin use nem baptis Allah ti ka muso' penyala' nem, ⁴ Kebaan ya' un neng kitab puyan ya nai anun Yesaya: Un daau lalo-lalo ku' data mengkang: pengan janan kume Tuhan, petelit janan kume Ye. ⁵ Singket sawa' ire ka nyafut ngan singket murun ngan ubot ka tai jadi data, ya' kileng- kileng ire ka petelit, ya matub-matub ire ka pekua', ⁶ Ngan ketu' kelunan ya' menaat janan siu' ya met Tuhan." ⁷ sulo a pisiu pala' kelunan ira' nai pala' Ye ka baptis, un kenya: " Ikam ira' puu' entung ulai lait! I' ya ka bara' kume ikam iri tai nem lap met Laset ya ka nai? ⁸ Uyai na bua'- bua' ya' siu' ngan urip maring o'. ngan iri' kimet dalem atai o': Abraham ti amai me'! yeuvan aki bara' kume iku': Allah sinteng uyai anak-anak kume Abraham met bateu-bateu bini! ⁹ Un na asai pelek ku' pakat pu'un ngan singket pu'un ya nceun ngebua' ya tiga, ire ka nebeng ngan ire bet ku apui." ¹⁰ Kulunan kadu' puteu ye: "Buke ngiti, ineu ya' ami ka uyai?" ¹¹ Kenya mipa ire: "I' un due da sapai, tulat kume ira' nceun anun, ngan i' un penguman ye uyai ta ngiti pa." ¹² Un pa nai ira nemo cukai ka baptis ngan ire pute a: Guru' ineu ya' ami' ka uyai ?" ¹³ un kenya mipa ire "Nyen nyat sui' kadu' neng ya lepek ire ngedana kume ikam." ¹⁴ ngan pengayeng lebu' ti puteu ye: "ngan ami', ineu ya ami ka uyai?" Un daau Yohanes ti mipa ire: Iri' nem nakep ngan ngenteng na use o' neng tunang o'." ¹⁵ Aken uvan kelunan kadu' daleu pekena ngan menga', ngan mung ra puteu dalem atai ra neng jo Yohanes, buke ye yeta Mesias ¹⁶ Yohanes ti mipa ngan pisiu pala' mung kelunan: "Aki' baptis nem neng sungai, aken Ye ya' sui un ayeng neng aki' ka nai ngan mesik talei senap taket-A pa aki' nceun sinteng. Ye ka baptis ikam neng Roh bue' ngan neng apui. ¹⁷ Un na tapan neng usu'-A ka ngebue' uvan na miyek-A ngan ka kelepeng jelai-A ku dalem pufung-A, aken dang nga iti Ye ka nutung neng ya' nceun tai pata'." ¹⁸ Neng kadu' katuk ira' se met Yohanes bara' isiu Tuhan pala' kelunan kadu'. ¹⁹ Aken lepek pisiu paren lebu' uvan Herodes ti yeuvan un ineu ya' nuyan neng Herodias, ledo senganak a, ngan uvan ketu pengejaat ira' se ya ye uyai, ²⁰ Paren iti ngepit pengejaat a neng uvan na tai Yohanes ti ku' dalem lamin sepen. ²¹ Daleu ketai kelunan kadu' biti lepek baptis ngan Yesus ti pa baptis ngan daleu a sebayang, pesik na langit. ²² Ngan nai Roh bue' kenta kebaan manuk merpati da empau Ye. ngan un daau isiu met langit: "Iku' ta anak Ke' ya Aki lesau, pala' Iku' ta E' ufa'." ²³ Daleu Yesus ti naring gayeng-A Ye jaau lu kiyo' a teleu pulu' uman ngan kua' daau ngan kimet dulu, yeta anak Yusuf, anak Eli, ²⁴ anak matat, anak Lewi, anak Malkhi, anak Yanai, anak Yusuf, ²⁵ anak Matica, anak Amos, anak Nahum, anak Hesli,anak Nagai. ²⁶ nanak maat ana Matica, anak simei, anak Yosekh, anak, anak Yoda. ²⁷ anak Yohanan, anak Resa, anak Zerubabel, anak Sealtiel, anak Neri, ²⁸ anak Malkhi, anak Adi, anak Kosam, anak Elmadam, anak Er, ²⁹ anak Yesuam anak Eliezer, anak Yorim, anak Matat, anak Lewi, ³⁰ anak Simeon, anak Yehuda, anak Yusuf, anak Yonam, anak Elyakim, ³¹ anak Melea, anak mina, anak Matata, anak Natan, anak Daud, ³² anak Isai, anak Obed, anak boas, anak Salmon, anak Nahason, ³³ anak Aminadab, anak Admin, anak Arni, anak Hesron, anak Peres, anak Yahuda ³⁴ anak Yakub, anak Ishak, anak Abraham, anak Terah, anak Nahor, ³⁵ anak Serug, anak Rehu, anak Peleg, anak Eber, anak Salmon, ³⁶ anak Kenan, anak Arpakhsad, anak Sem, anak Nuh, anak Lamekh, ³⁷ anak Metusalah, anak Henokh, anak Yared, anak Mahalaleel, anak Kenan, ³⁸ anak Enos, anak Set, anak Adam, anak Allah.