¹ Yesus, ya sangan ngan Roh Kudus nai peluet umet sungai Yordan ti, Roh Kudus tai engkin Iye ko ata ait ya' nawa. ² Ko inye A turo sengkasan pat pulu' dau. Sulo kenai balai ja'at pekalok Iye. Daleu A ko inye, empei ufan a uman ineu-ineu un, nga Tia ufan la'au ti. ³ Un daau balei ja'at ti kume Iye: "Buk Iku se Anak Allah, so'on bateu-bateu bini jadi luti'." ⁴ Un daau Yesus ti mipa iye: "Un neng surat: Empei kelunan murip so'on luti' lu un." ⁵ Sulo ketai a ilan Yesus ti ko' ata ira' empau, ngan ngempalet bara' kerajaan ko' usun tana' ini pala' Iye. ⁶ Un daau balei ja'at ti kume Iye: "Mung ini, peging peniga a, sinteng e na' a pala' Iku, ufan na mung ira' ini lepek un ngan aki. Neng kadep e tengen, singteng e na' a pala' kelunan ya' aki ufa'." ⁷ Buk Iku tunuk pala' aki, ketu' ira' ini Iku na un a. ⁸ Aken un daau Yesus ti menyakat iye: "Un neng surat: Pala' Tuhan Allah lu' lu ketunuk. Bang pala' Iye tilu sebayang!" ⁹ Sulo ketai a engkin Yesus ti ko' Yerusalem, ngan pelek Iye ko empau belufung lamin Tuhan ti. Un daau a kume Iye: "Buk Iku se Anak Allah, pelabu' use O met inye pafi' enta', ¹⁰ ufanna un neng surat: Iye ke so'on malaikat-malaikat-A ngelirung Iku, ¹¹ ire' kepetang Iku ngan usu' ra, apan taket-O ti ence tai siu' neng bateu." ¹² Un ken Yesus ti mipa iye: "Un daau isiu Tuhan ti: Nyem pekalo' Tuhan Allah-o!" ¹³ Lepek balei ja'at iti pekalo' Iye, sulo ketai a lap ngan pekena' tuken ya' tiga. ¹⁴ Dalem kuasa Roh Kudus, nai Yesus ti peluet ko' Galatia. Pegai mo'o na denge A sukung lebu' inye. ¹⁵ Daleu inye A na' katuk dalem lamin-lamin sebayang Yahudi, mung dulu pempau ngaran-A. ¹⁶ Sulo kenai A ko' Nazaret, ko' lebu' ufan kenai A ja'au. Keba'an kelayan-A, bang tai nia ko' lamin sebayang singket dau kenem (Sabat). Sulo A nengkedeng ufa' ke baca' isiu Tuhan. ¹⁷ Pala' Iye dulu so'on baca' kitab Yesaya. Lepek A mena'at a, sulo A tegu' se ayat, u daau a: ¹⁸ "Roh Tuhan ti un pala' Aki, ufan na Iye lepek muso' aki' ngan minyak, apanna Aki sinteng nebara' isiu ya' tiga pala' kelunan-kelunan ira' kasip ngan Iye lepek so'on Aki ¹⁹ nai bara' isiu pala' kelunan ira un dalem lamin sepen, apan ra sinteng nai takau met inye. Peging nai engkin se pena'at ya' dema' kume kelunan-kelunan ira' buta, ngan petakau kelunan ira dulu petuyen, ngan le'e ufan lepek na Tuhun ti bara' pengelesau-A. ²⁰ Lepek inye, sulo A mekep kitab iti, mencai a pala kelunan ya' bang mebo ko inye, ngan tai uku'; mung dulu ya un ko' inye mena'at pala' Iye. ²¹ Sulo A menaring pekatuk ire, un daau A: Dau ini na tuken kenai isiu Tuhan ni ketula' daleu nem sekening daau a. ²² Mung dulu ko inye mengelan daau-A, malap ale' daau ra sekening daau isiu-A. Un daau ra kume Iye: "Anak Yusuf ti O kan?" ²³ Sulo A mipa ire: "Atek nem ke kemu pala' Aki ngan pekata: Dokton, puat' na use-A na tengen. Uyai na ko' ini, ko' empei ufan kenai-O met aring, keba'an dite puyan ya' Iku lepek uyai ko' Kapernaum ti!" ²⁴ Un kenya ple'e: "Aki bara' mikam mung, empei un dulu ya' ufa' sekening isiu nabi ya' se lebu' ngan ra' un. ²⁵ Aki bara mikam sa: Ineu ya' Keke' ni, atek lan: Sengkasan Elia ti murip da, kadu' ale ledo baleu ko' Israel ti, ineu le'e daleu langit ti pekep sengkasan teleu uman nem bulan ngan ufan lien pa' dulu daleu inye. ²⁶ Aken Tuhan ti so'on Elia na nai mebo' se ledo baleu ku' Sefrat, ko ata lebu' Sidon ti. ²⁷ Daleu inye, ufan kadu' ale' kelunan ira' siu' bekayen, aken empei ufan ra nai muat lu' pu'un. Bang Na'aman, se kelunan met Siria ti lu ya' nai muat met sakit inye. ²⁸ Sekening daau isiu inye, sulo kelunan kadu' keto' Iye. ²⁹ Sulo kenai ra beti', miau Yesus ti, tai ra engkin Iye ko' dani' se bila, ufa ke pelabu' Iye. ³⁰ Aken, melai lu' ketai A masat tegu' neng belua ra, penco tai lap. ³¹ Sulo ketai A ko' Kapernaum ti, se lebu' ko' Galilea ti, ngan bara' isiu Tuhan ko' inye neng dau kenem a ti (Sabat). ³² Mung dulu kejet sekening daau katuk ya' Iye bara' ti, ufanna isiu Inye sangan ngan kuasa. ³³ Dalem lamin sebayang iti, un se kelunan ya un balei ja'at ko inye. Sulo a ngelalo: ³⁴ "Iku', Yesus kelunan met Nazaret, empei un ineu ya' Iku kenai tei ngan ami' un? Iku' nai na, bang ufa kepesalai ami' lu'? Aki' tisen i' O ni: Iku' ni bue' O, ufanna Iku nai met Allah ti." ³⁵ Aken Yesus ti miau iye, un daau A: "Nyem pisiu, kewang met kelunan ini!" Sulo balei ja'at inye mana' use kelunan iti neng jume kelunan kadu, ngan na kawang met use a, aken empei ufan a menyakit kelunan inye un. ³⁶ Mung dulu ya' un ko' inye malap mena'at dite puyan inye, un daau ra pala' ire serepe' apan: "Ufan la'it ale' daau isiu-A ini! Isiu ya' Iye bara' ini sangan ngan kuasa! Balei ja'at lu' nai kawang, baya' daau ineu ya' Ye kume ni. ³⁷ Ketu' puyan ya lepek Ye uyai ti, tai pegai sukung lebu' inye. ³⁸ Sulo ketai A paso met lamin sebayang inye, tai pala' lamin Simon ti. Daleu inye ufan mayung sengarem sinen met ledo Simon ti. Sulo ra nyat lesau pala' Yesus ti apan-A mebo' iye. ³⁹ Nai A nengkeneng dani' iye, ngan pesarap sakit inye. Daleu iti, penco kenai a muat. Tuk kenai ledo inye beti', tai na' penguman kume ire. ⁴⁰ Daleu ketai mate dau ufa' ke deram, sulo kenai kulunan kadu engkin ketu senganak peging tuyang ra' ya' sakit pala Iye. Sulo A na' usu' A usun ire, ngan puat ire mung. ⁴¹ Met ira se, ufan un balei ja'at nai kawang met use ra, pentung ra' ngalo: "Iku Anak Allah." Sulo A miau ire, apan ra ence pisiu, ufan na tisen ra, Iye na Mesias. ⁴² Daleu belua dau, tai Yesus ti ko' ufan ira ngieu. Aken kelunan kadu' tai den Iye. Sulo ra tegu' Iye ngan ngayet penceng Iye, apan-A ence tai lap ire. ⁴³ Aken daau A pisiu pala' ire: "Ufa E ketai ko' lebu' ira' se, apan E sinteng bara' isiu Tuhan ko' iti. Ufanna Iye ya mesuk Aki nai ni. ⁴⁴ Sulo ketai A bara' isiu Tuhan ko' lamin-lamin sebayang ya un ko' Yudea ti.