¹ Udahan malaikat nya kalima mambunyian tarompetnya. Aku maniat sabigi bintang jatu dari langit ka bumi. Ka bintang inyan di konyuai kunci sabuah los nya manuju jurang nya dalamnya ntah takira. ² Lalu inya mambuka los nya manuju ka jurang nya dalamnya ntah takira inyan dahan kaluaram asap dari parapetan nya bosar. ³ Dari asap inyan kaluaram bala bunta ka pucu bumi, dahan siaan di konyuai kuasa sama uba bala kalajengking di bumi. ⁴ Tapi agan sia di printahan akai ntah marusak rarumputan di bumi atau tumuhan hijau atau bala kayu nan, tapi baya mansia nya ntah mamakai segel Allah di koningnya. ⁵ Siaan ntah di izitan akai mambunuh mansia, tapi baya manyiksa sia samanah lima bulan. Siksaan nya sia rasaan inyanan uba siksaan waktu di jonti kalajengking nam. ⁶ Di waktu inyan bala urang pacaan mangoyap maut tapi tidak akan katomuan, dahan sia pacaan hona mati, tapi maut lari dari siaan. ⁷ Bala bunta inyan katiatan uba kuda nya disiapan akai baprang. Di kapala sia katiatan ada jolu uba mahkota dari omas dahan matamuha sia manyarupaai mansia. ⁸ Ramut sia manyarupaai ramut batina dahan gigi siaan manyarupaai gigi singa. ⁹ Sia katiatan saolah-olah mamakai baju zirah dari bosi, dahan bunyi sayap sia uba bunyi banyak kareta kuda nya tongahan balari akai babprang. ¹⁰ Di iku siaan ada singat uba panjoti kalajengking nan; di iku sia inyan ada kuasa akai ngapodihai mansia samanah lima bulan. ¹¹ Raja nya mamarintah sia nan malaikat nya kaluar dari jurang nya ntah takira dalamnya. Namanya dalam bahasa Ibrani inyanan Abadon dahan dalam bahasa Yunani inyanan Apolion. ¹² Calaka nya pertama jadi lewat am. Tiat am! Jadi ini ija ada lagi dua malapataka nya pacaan bakajadian. ¹³ Malaikat nya kaonam mambunyian tarompetnya, dahan aku maninga ada suara nya kaluar dari bala tanuk mezbah omas di hadapan Allah. ¹⁴ Suara inyan bapanir agan malaikat nya kaonam nya mamigap tarompet, "Lopasan kaompat malakat nya dikobat di sungai bosar Efrat." ¹⁵ Lalu di lopasanam kaompat malaikat nya jadi disiapan akai jam, ari, bulan dahan tahun inyan akai mambunuh sepertiga dari mansia ¹⁶ Jumlah dari tantara inyan tai dua juta pasukan bakuda. Aku siku maninga jumlah siaan. ¹⁷ Iniam nya kutiat dalam paniatanku mangonaai siaan nya manungakainya: Baju zirah sia bawarna merah api, biru tuha dahan kuning balerang. Kapala dari bala kuda inyan manyarupaai kapala singa, dahan nyawa sia mangaluaran api, asap dahan balerang. ¹⁸ Sepertiga dari umat mansia mati dilobai katiga malaikat malapataka ini inyanam api, asap dahan balerang nya kaluar dari nyawa sia. ¹⁹ Karna kakuatan dari bala kuda ini ada di nyawa siaan dahan di ikunya. obai iku sia manyarupaai ular, dahan agan kapalanya sia malukaai mansia. ²⁰ Tapi mansia bukai, nya ntah mati obai malapataka ini, ntah jam hona batobat dari bala kalakuan nya sia labuhan, dahan sia pan ntah tonga jam manyomah bala roh jahai dahan bala berhala dari omas, perak, tamaga, batu dahan dahan kayu, nya ntah dapat di tiat, maninga, atau bajalan, ²¹ dahan siaan ntah hona batobat jam dari mambunuh, malabuhan sihir, percabulan, dahan mangolit.