¹ Habis inyan aku maniat ompat malaikat badiri di kaompat panjuru bumi. Sia manhan kaompat angin di bumi akai ntah ada angin nya batiup di bumi, di laut atau di bala kayu. ² Lalu aku maniat siku malaikat bukai muncul dari sabolah timur. Diinya ada segel Allah nya hidup. Inya agan suara homan mandorahai kaompat malaikat nya ditugasan akai marusak bumi agan laut: ³ "Janganam marusak bumi, laut dahan bala kayu sabolum kami manyegelai bala hamba Allah kami di koning sia." ⁴ Lalu aku maninga jumlah sia nya di segel: 144.000, nya di segel dari satiap suku katurutan Israel: ⁵ dua bolas ribu dari suku Yehuda di segelai, dua bolas ribu dari suku Ruben, dua bolas ribu dari suku Gad, ⁶ dua bolas ribu dari suku Asyer, dua bolas ribu dari suku Naftali, dua bolas ribu dari suku Manasye, ⁷ dua bolas ribu dari suku Simeon, dua bolas ribu dari suku Lewi, dua bolas ribu dari suku Ishakar, ⁸ dua bolas ribu dari suku Zebulon, dua bolas ribu dari suku Yusuf, dahan dua bolas ribu dari suku Benyamin di segelai. ⁹ Jadi bala jolu ini, aku maniat garumuan urang banyak nya ntah dapat di hitung jumlahnya---dari satiap bangsa, suku, umat dahan bahasa---badiri di hadapan takhta dahan di hadapan Anak Domba, mamakai jubah putih dahan mamigap ranting daun palem di tangan sia, ¹⁰ dahan agan suara homan sia mandorah: "Kasalamatan ada agan Allah kami nya duduk di pucu takhta dahan agan Anak Domba!" ¹¹ Lalu samua malaikat nya badiri di sakaliling takhta dahan di sakaliling bala tuha-tuha dahan kaompat binatang, sujud manyomah Allah, ¹² kaping bapanir,"Amin! Pujian, kamuliaan, hikmat, syukur, hormat, kuasa dahan kakuatan bagi Allah kita sampai salama-lamanya! Amin!" ¹³ Lalu salah siku dari tuha-tuha batanya ka aku,"Sopa sia nya mamakai jubah putih inyan nan dahan dari muna inya datang? ¹⁴ Kataku gan inya,"Tuan-tuan tahuma," lalu inya bapanir lagi ka aku, "Sia inyanan bala urang nya kaluar dari kasusahan bosar, dahan sia jadi mambasu jubah sia dahan manjawatnya putih di dalam darah Anak Domba. ¹⁵ Karna inyan sia badiri di hadapan takhta Allah, dahan manyomahnya siang malam di Bait KudusNya. Inya nya duduk di pucuk takhta inyan pacaan maampar kemahNya di pucu sia. ¹⁶ Sia tidak akan mandarita kalaparan dahan tidak akan kahausan lagi. Mataari tidak akan malumpuhan sia, uba inyan jam ponar podinya. ¹⁷ Obai Anak Domba nya ada di tongah takhta inyan pacaan jadi gambala siaan, dahan Inya pacaan mairikan sia ka mata arai kahidupan, dahan Allah pacaan mahapus satiap arai mata siaan."