¹ Lalu aku maniat waktu Anak Domba mambuka sabuti dari katujuh segel inyan, aku maninga siku dari kaompat binatang inyan mangaluaran suara uba bunyi guruh, lalu bapanir, "Ayuam!" ² Lalu aku maniat siku kuda putih! Panungang nya mamigap sabuti panah dahan inya di konyuan mahkota. Lalu inya maju sabagai pamonang akai marobut kamonangan. ³ Waktu Anak Domba inyan mambuka segel nya kadua, aku maninga binatang nya kadua mangataan, "Ayuam!" ⁴ Lalu muncullah siku kuda nya bukai---siku kuda warna merah. Panungangnya di izitan akai manguti damai sejahtra dari bumi, ongka panduduknya saling mambunuh. Panungang inyan pan lalu di konyuai manau nya bosar. ⁵ Waktu Anak Domba mambuka segel nya katiga, aku maninga binatang nya katiga mengataan, "Ayuam!" Aku maniat siku kuda hitam dahan panungangnya mamigap timakan. ⁶ Aku maninga suara nya arahnya datang dari tongah kaompat binatang mangataan, "Saliter ganum sadinar, dahan tiga liter jelai sadinar. Tapi jangan marusak minyak dahan angur inyan." ⁷ Waktu Anak Domba mambuka segel kaompat bapanir,"Ayuam!" ⁸ Lalu aku maniat siku kuda hijau kuning dahan urangnya manungangnya Maut dahan Hades manyurutannya. Sia di konyuai kuasa akai seperompat dari bumi, akai mambunuh agan manau, kalaparan dahan panyakit, dahan bala binatang buas di bumi. ⁹ Waktu Anak Domba mambuka segel nya kalima, aku maniat di babah mezbah, bala jiwa sia nya jadi di bunuh karna firman Allah dahan kasaksian nya sia percayaai. ¹⁰ Sia mandorah maha homan, "Baropa manah lagi, oy Panguasa agan sagalanya, nya kudus dahan bonar, Duan pacaan mahakipai sia diap di bumi dahan mambalasan darah kami agan sia ?" ¹¹ Lalu ka tiap-tiap sia di konyuai jubah putih, dahan di boritahuan bahwa sia harus baistirahat stogal ma sampai genap palayan sia dahan bala samadikan sia nya harus tabunuh, sama uba sia jam. ¹² Waktu Anak Domba mambuka segel nya kaonam, aku maniat kajadian uba gempa nya kuat, mataari manyadi hitam uba kain karung dahan bulan saluruhny nyadi mrah uba darah. ¹³ Bala bintang di langit baguguran ka bumi sama uba batang ara mangguguran bala buahnya matah di musim colap pas di tiup banakau. ¹⁴ Langit pan hilang uba gulukan karotas nya gulung, dahan pulau bageser dari tompatnya. ¹⁵ Lalu bala raja di bumi dahan bala pambosar dahan bala panglima dahan bala urang kaya, sarota bala panguasa dahan bala urang bukainya, samua budak dahan bala urang merdeka, batapu di dalam bala gua dahan batu-batu gunung. ¹⁶ Sia mandorahai gunung-gunung dahan batu-batu, "Tingangtam kami! Tapuantam kami dari matamuha Inya nya duduk di pucuk takhta dahan dari murka Anak Domba. ¹⁷ Obai jadi datakam ari bosar murka sia dahan sopa nya dapat batahan?"