¹ Jadi bala jolu ini, aku maniat ada sabuah pintu tabuka di surga. Tadinga Inya nya sabolumnya jadi bapanir ka aku nya suaranya uba tarompet, bapanir: "Naiktam kakoni dahan Aku pacaan manunyuan ka kolai apa nya pacaan bakajadian jadi bala jolu ini. ² "Lalu Aku dibaba ka dalam kuasa Roh dahan kutiat sabuah takhta nya ada di surga, dahan ada urang nya duduk di takhta inyan. ³ Inya nya duduk di pucu takhta inyan katiatan uba permata yaspis dahan permata sardis. ada jam pelangi nya mangalilikkai takhta inyan katiatan uba zamrud. ⁴ Di sakaliling takhta inyan ada dua puluh ompat takhta bukai dahan di pucu takhta inyan duduk dua puluh ompat bala tuha nya bapakaian putih agan mahkota omas di kapala sia. ⁵ Dari takhta inyan kaluar kilat dahan guntur nya bunyinya baguruh bagurak. Ada tujuh plita nya manyala di hadapan takhta inyan. Bala plita inyani inyanam katujuh Roh Allah. ⁶ Di hadapan takhta inyan ada jam lautan jaronih uba kristal. Di sakiling takhta inyan ada Ompat binatang nya ponuh agan mata di hadapan dahan di balikatnya. ⁷ Binatang nya pertama katiatan uba singa, bintang nya kadua uba anak lembu, binatang nya katiga matamuhanya uba mansia, dahan binatang nya kaompat katiatan uba burung rajawali nya tongahan trobang. ⁸ Kaompat binatang inyan masing-masing basayap onam nya ponuh agan mata di pucu agan di babahnya. Siang dahan malam ntah kala tonga sia mandorah, "kudus, kudus, kudustam Tuhan Allah Nya Maha Kuasa nya jadi ada, nya adaan inini, dahan nya pacaan datang." ⁹ Satiap kali binatang inyan mempersembahan pujian, hormat dahan ucapan syukur ka Inya nya duduk di takhta, nya hidap salama-lamanya, ¹⁰ maka manyomahlah kadua puluh ompat bala tuha inyan di hadapanInya nya duduk di pucu tajhta inyan. Sia sujud manyomah di hadapan Inya nya hidup sampai salama-lamanya. Lalu sia malotaan bala mahkotanya di hadapan takhta inyan, kaping mandorah, ¹¹ "Berlayaktam Duan, Tuhan kami dahan Allah kami, akai manarima pujian,hormat dahan kuasa. sobab Duannam nya manciptaan bala jolu."