¹ Udahan, aku maniat langit nya baharu dahan bumi yang baharu, obai, langit nya pertama dahan bumi nya pertama hilakam dahan laut pan ntah ada lagi. ² Lalu aku maniat kota nya kudus, Yerusalem Baharu, turun dari surga, dari Allah, dahan dihiasai uba pangantin batina nya siap-siap akai lakinya. ³ maninga suara dari takhta bapanir, "Tiat am, tompat kadiapan Allah ada di tongah-tongah mansia, dahan inya pacaan diap di tongah-tongah mansia dahan Inya pacaan diap sasama agan sia. Sia pacaan nyadi umat-Nya dahan Allah siku nya pacaan sasama agan sia dahan Inya nyadi Allah sia. ⁴ Inya pacaan mahapus bala arai mata dari mata sia dahan tidak akan ada lagi kamatian, atau perkabungan, atau ratap tangisan, atau dukacita, obai nya manah jadi laluam. ⁵ Lalu Inya nya duduk di takhta inyan bapanir, "Tiat am! Aku manjawat bala jolu samuanya baharu!" Ujai-Nya lagi, "Tulis tam obai bala pamaniran ini dapat dipercaya dahan pan bonar." ⁶ Dahan, Inya bapanir gan aku, "Samua salesai am! Aku nam Alfa dahan Omega, Nya holu dahan Nya Dudi. Sopa nya haus pacaan Kukonyuai minum cuma-cuma dari arai mata kahidupan. ⁷ Sopa nya monang pacaan mawarisai samua ini,dahan Aku pacaan nyadi Allahnya, dahan inya pacaan nyadi anak-Ku. ⁸ Tapi, bagi sia nya pangolaan, sia nya ntah baiman, dahan sia nya keji, bala pambunuh, bala urang sunal, bala tukang sihir, para panyembah berhala, dahan samua sia nya pabulaan, tompat sia nan di dalam lautan api nya manyala-nyala agan balerang. Iniam kamatian kadua." ⁹ Udahan siku dari tujuh malaikat natakai aku inyanam nya mamigap tujuh cangkir nya baisi ponuh agan tujuh malapataka, dahan inya bapanir, "Ayu koni tam. aku pacaan manunyuan ka kolai panganten batina, panganten Anak Domba." ¹⁰ Lalu di dalam roh inya mambaba aku ka gunung nya maha bosar dahan tingi, lalu manunyuan kota suci inyan ka aku, Yerusalem, nya turun dari surga, dari Allah, ¹¹ Yerusalem inyan ponuh agan kamuliaan Allah, dahan kelap kelip uba permata nya paling sega, uba permata yaspis dahan jaronih uba kristal nam. ¹² Kota inyan ada temok bosar dahan tingi agan dua bolas pintu gerbang. dahan di bala pintu gerbang inyan ada dua bolas malaikat. Dahan di bala pintu tatulis nama kadua bolas suku Israel. ¹³ Di sabolah timur ada tiga pintu gerbang, di sabolah utara, tiga pintu gerbang, di sabolah salatan tiga pintu gerbang, dahan di sabolah barat tiga pintu gerbang. ¹⁴ Di temok kota inyan ada dua bolas batu pondasi dahan di pucu bala batu pondasi inyan tatulis nama kadua bolas rasul Anak Domba. ¹⁵ Lalu malaikat nya bapanir gan aku inyan mamigap tungkah pangukur dari omas akai maukur kota inyan, bala pintu gerbangnya dahan temoknya. ¹⁶ Kota inyan bentuknya segi ompat, panyangnya sama agan luarnya. lalu inya maukur kota inyan agan tungkah paukur inyan tai, dua bolas ribu stadia panyangnya,(panyangnya,luarnyadahan tinginya sama). ¹⁷ Lalu, temok pan inya ukur jam, saratus ompat puluh ompat hasta tobalnya, manurut ukuran mansia (nya inyan pan ukuran malaikat jam). ¹⁸ Temok inyan dijawat dari permata yaspis dahan kota inyan dijawat dari omas murni, maha uba kaca nya jaronih. ¹⁹ Bala pondasi temok kota inyan dihiasai agan bala jenis batu nya mahal. Pondasi nya pertama di hiasai agan batu yaspis, nya kadua agan batu nilam, nya katiga agan batu mirah, nya kaompat agan batu zamrud, ²⁰ nya kalima agan batu unam, nya kaonam agan batu sardis, nya katujuh agan batu ratna campaka, nya kadalapan agan batu beril, nya kasambilan agan batu krisolit, nya kasapuluh agan batu krisopras, nya kasabolas agan batu lazuardi, dahan nya kadua bolas dihiasai agan batu kacubung. ²¹ Kadua bolas pintu gerbang inyanam dua bolas mutiara. Satiap pintu gerbang dijawat dari satu mutiara. Bala jalan kota inyan dijawat dari omas murni uba kaca kaca nya jaronih. ²² Aku ntah maniat Bait Suci di dalam kota inyan, sobab Allah, Tuhan nya Manguasai bala jolu, dahan pan Anak Domba inyanam Bait Suci kota inyan tai. ²³ Kota inyan ntah mamerluan matahari agan bulan akai manorakainya, obai kamuliaan Allah manorakai kota inyan, dahan Anak Domba Inyannam lampunya. ²⁴ Bala bangsa bajalan dalam cahaya kota inyan. Dahan bala raja di bumi mambaba kamuliaan sia ka dalam kota inyan. ²⁵ Bala pintu gerbangnya ntah ditutup disanyang hari, sobab tidak akan ada lagi ari malam di sian nan. ²⁶ Sia mambaba kaindahan dahan kahormatan bala bangsa ka dalam kota inyan, ²⁷ tapi ntah akan ada jolu najis nya mansu ka dalam kota inyan. Sama jam ntah pacaan ada urang nya malabuhan kakejian atau pan tipu daya nya mansu, ongkaham baya nya namanya tatulis dalam Kitab Kahidupan Anak Domba inyan.