¹ Lalu malaikat inyan manunyuan sungai arai kahidupan ka aku, arainya jaronih uba kristal. Sungai inyan mangalir kaluar dari takhta Allah dahan dari takhta Anak Domba ² mangalir malaluai tongah jalan kota inyan. Di kiba kanan pingir sungai inyan, tumuh kayu kehidupan nya mahasilan dua bolas jenis buah dahan kayu inyan babuah tiap bulan. Daun kayu inyan pakai maubatai bala bangsa. ³ Ntah ada lagiam kutuk disianan. Takhta Allah dahan Anak Domba ada di dalam kota inyan, Bala hamba-Nya dahan nama-Nya akan malayatai Inya. ⁴ Sia pacaan maniat muha-Nya dahan nama-Nya pacaan tatulis di koning sia. ⁵ Malam pan ntah ada lagiam lalu sia pan ntah mamerluan cahaya lampu atau matahari obai Tuhan Allah pacaan manorakai sia. Sia pacaan mamarintah salama-lamanya. ⁶ Lalu malaikat inyan bapanir gan aku, "Samua pamaniran ini dapat dipercaya dahan bonar. Tuhan nan Allah dari bala roh para nabi jadi manyuruh malaikat-Nya akai manunyuan ka bala hamba-Nya apa nya harus pacaan bakajadian. ⁷ Tiat am, Aku pacaan datakam! Bahagia am urang nya manurutai bala pamaniran nubuat kitab ini." ⁸ Aku, Yohanes, aku niam nya ninga niat samuanya tai. Lalu aku sujud manyomah di hadapan kaki malaikat nya manunyuan samua inyan ka aku. ⁹ Tapi inya bapanir gan aku, "Jangan labuhan inyan! Aku ni hamba jam sama uba kolai dahan bala samadikan kolai, bala nabi, dahan samua sia nya nurut agan bala printah dalam kitab ini. Sembah tam Allah nan!" ¹⁰ Udahan malaikat inyan bapanir gan aku lagi, "Jangan dikunci bala pamaniran nubuat dalam kitab ini nan,obai waktunya dampikam. ¹¹ Jadi sopa nya tidak bonar, honaan nyam inya trus malabuhan bala jolu jahai. Sopa nya comar, honaan nyam inya trus comar. Sopa nya bonar, honaan nyam inya trus malabuhan kabonaran. Sopannya suci, honaan nyam inya trus suci." ¹² "Dinga am! Aku pacaan datang. Dahan Aku mambaba upah-Ku, akai ganjaran satiap urang manurut perbuatannya. ¹³ Aku ni Alpa agan Omega, Nya Pertama agan Nya dudi, Nya Awal agan Nya Ahir." ¹⁴ Bahagia am sia nya mambasu jubahnya; sia pacaan dapat hak akai makan dari kayu kahidupan inyan dahan mansu ka dalam kota malaluai bala pintu gerbangnya. ¹⁵ Tapi bala kudu dahan bala tukang sihir, bala urang sunal, bala pambunuh, bala panyomah berhala dahan bala urang nya hobi malabuhan pabulaan diap di luar. ¹⁶ "Aku, Yesus, jadi manyuruh malaikat-Ku akai bersaksi ka kolai mangonaai samuanya ini akai bala jemaat. Aku niam tunas dahan katurutan Daud, Bintang Timur nya maha torang." ¹⁷ Roh agan pangantin batina inyan bapanir, "Ayu am!" Sopanya mandinganya, kahonanya inya bapanir uba ini, "Ayu am!" Sopanya haus datak ja, dahan sopanya hona, labuh tam manguti arai kahidupan agan cuma-cuma." ¹⁸ Aku basaksi ka samua urang nya maninga pamaniran nubuat kitab ini: Amun ada nya manamahan bala jolu ka bala perkataan ini, maka Allah pacaan manamahan ka inya bala malapataka nya tatulis dalam kitab ini. ¹⁹ Dahan amun ada nya dikurakai dari bala perkataan dalam kitab nubuat ini, maka Allah pacaan manguti bagiannya dari kayu kahidupan dahan dari kota kudus, uba nya tatulis di dalam kitab ini. ²⁰ Inya nya basaksi mangonaai samuanya ini bafirman, "Ya! Aku pacaan datang." Amin! Datang tam, Tuhan Yesus! ²¹ Semoga anugerah Tuhan Yesus manyertaai kolai samua. Amin.