¹ Udahan aku maniat malaikat turun dari surga, inya mambaba kunci jurang nya ntah tau apa dalamnya dahan inya mamigap rantai bosar di tangannya. ² Inya manangkap naga inyan, ular tuha, nya inyanam setan atau Iblis dahan dirantainya samanah saribu tahun. ³ Inya manikapnya ka dalam jurang inyan tai, lalu manutupnya dahan manguncinya. Ini dilabuhan akai inya ntah manyosatan bala bangsa lagi, sampai saribu tahun inyan habis. Habis inyan, inya pacaan dilopasan akai samantara. ⁴ udahan aku maniat bala takhta. Sia nya duduk di pucuk bala takhta inyan am bala sia nya dikonyuai kakuasaan akai mahakipai. Aku tai pan maniat bala jiwa sia nya jadi dipongal kapalanya obai kasaksian mangonaai Yesus dahan obai firman Allah. Sia nan bala urang nya ntah manyomah binatang inyan atau patungnya dahan ntah manarima tana di koningnya atau tangannya. Sia hidup lagi dahan mamarintah sasama agan Kristus samanah saribu tahun. ⁵ Tapi, bala urang mati nya buka ntahnya hidup lagi sabolum masa saribu tahun inyan habis. Iniam kabangkitan pertama. ⁶ Bahagia am dahan kudus am bala urang nya dapat bagian dalam kabangkitan pertama inyan. Kamatian nya kadua ntaham manguasaai sia, tapi sia pacaan nyadi bala imam Allah dahan Kristus, dan pacaan mamarintah sasama agan Inya salama saribu tahun. ⁷ Pas waktu saribu tahun baahir, Iblis pacaan dilopasan dari panyaranya. ⁸ Lalu inya pacaan pacaan manyosatan bala bangsa ka ompat panyuru bumi Gog dahan Magog dahan mangumpulan sia akai baprang. Jumlah sia uba pasir di laut banyaknya. ⁹ Lalu batula am sia ka smua dataran bumi dahan mengopung mantirung bala urang kudus dahan kota nya dikasihai inyan. Tapi api turun dari langit dahan maloburan sia. ¹⁰ Lalu iblis nya jadi manyosatan sia tai dibuakan ka dalam lautan api nya manyala-nyala dahan belerang tai, di siatan jam tompat binatang dahan nabi palsu inyan dibuakan nan. Sia pacaan disiksa siang malam salama-lamanyanya. ¹¹ Lalu aku maniat takhta putih bosar dahan Inya nya duduk di pucuNya. Bumi agan langit hilakam dari hadapan-Nya, tapi ntah ada katiatan tompat akai sia lagi. ¹² Dahan aku maniat bala urang mati, bosar kocit, badirin di hadapan takhta inyan. Lalu dibukaanlah bala kitab dahan sabuah kitab nya bukai dibuka inyanam kitab kahidupan. Bala urang mati inyan, di adilai manurut kalakuan sia, badasaran apanya tatulis dalam bala kitab inyan tai. ¹³ Lalu laut manyorahan bala urang mati nya ada di dalamnya. Maut dahan Hades pan manyorahan bala urang mati nya ada di dalapnya, dahan bala urang mati inyan dihakipai manurut kalakuannya. ¹⁴ Lalu, maut agan Hades dibuakan ka dalam lautan api. iniam kamatian nya kadua - lautan api. ¹⁵ Jadi satiap urang nya namanya ntah tatulis dalam kitab kahidupan inyan, inya pacaan dibuakan ka dalam lautan api inyan.