¹ Jadi bala jolu ini, aku maniat malaikat bukai turun dari surga. Inya ada kuasa nya bosar dahan saluruh bumi ditorakai agan kamuliaannya. ² Inya bapanir maha homan ujainya, "Robaham! robaham, Babel yang bosar inyan, inya nyadi tompat kadiapan bala roh najis. dahan tompat kadiapan sagala burung nya kotor dahan manjijian. ³ Samua bangsa jadi mabuk angur hawa nafsunya bazinah, nya ma'akibatan kamurkaan akai inya. Bala raja di bumi jadi berzinah agan inya. Dahan bala padagang di bumi nyadi dampu obai hawa nafsunya bosar." ⁴ Lalu, aku maninga suara bukai dari surga bapanir, "Oy umatKu, keluar tam darinya supaya kolai ntah talibat dalam bala dosanya dahan ntah dapat bala malapataka nya pacaan malabuhainya. ⁵ Sobab, bala dosanya batumpuk sampai kalangit am, dahan Allah jadi maingat agan bala palanggarannya. ⁶ Balas tam ka inya, sama uba nya jadi inya labuhan jam, dahan balas tam dua kali lipat manurut apa nya jadi dilabuhannya.Apa nya jadi dicampurannya ka dalam cangkir,campuran jam akai inya dua kali lipat. ⁷ Obai inya mamuliaan dirinya siku dahan hidup dalam kamewahan, disiksa tam inya nan agan perkabungan nya satimpal. sobab, inya bapanir dalam hatinya, 'aku duduk uba ratu, aku bukainya janda dahan aku ntah pacaan kala maniat perkabungan.' ⁸ Obai inyan ntah ari bila pan bala malapataka pacaan malabuhainya: kamatian, ratap tangis, dahan kalaparan. Inya pacaan diloburan api, obai Tuhan Allah inyan bakuasa dahan mahakipainya." ⁹ Bala raja di bumi, nya jadi bazinah agan inya dahan hidup ntah ada pangandalian diri pacaan manangis dahan maratapainya waktu sia niat asap api nya maloburannya. ¹⁰ Sia badirit maniat dari jauh ma obai gola agan siksaannya, lalu bapanir, "Calaka, Calakaam, kota bosar, Babel, kota nya kuat inyan! Obai, ija sejam lagi tam hukupan akai kolai nan datakam." ¹¹ Bala padagang di bumi pacaan manangis dahan berkabung akai kota inyan obai ntah siku pan hona mamboli dagakan sia lagi. ¹² Dagakan nyanan omas, perak, permata, mutiara, kain lenan halus, kain ungu, kait'n sutra, kain kirmizi, bamacam jenis barang dari kayu nya harum baunya, bamacam pakakas dari gading, bala pakakas dari kayu nya mahal, dari tambaga, bosi, marmer, ¹³ kayu manis, bala rompah, minyak harum, mur dahan kemenyan, angur, minyak, topung halus, ganum, lembu sapi, domba, kuda, kareta, kuli, bahkan nyawa mansia. ¹⁴ "Bala buah nya dikahonaai hati kolai jadi hilang hinut am dari kolai.Bala kamewahan dahan rinang rami hilakam ntah ada katomuan lagiam." ¹⁵ Bala padagang barang-barang nyadi dampu obai kahonanya inyan, pacaan badirin jauh-jauh obai gola agan siksaan nya malabuhainya, kaping nangis dahan berkabung. ¹⁶ Sia pacaan bapanir, "Calaka, Calaka am kota bosar nya bapakaian lenan halus, kain ungu dahan kain kirmizi, dahan bahiasan omas, permatanya mahal dahan bamacam mutiara!" ¹⁷ Sobab, dalam satu jam ja, samua kakayaan inyan musnaham!" Samua nakhoda, samua palaut ulung, anak buah kapal, dahan samua urang nya usaha totap nya di laut pacaan badirin jauh-jauh. ¹⁸ Dahan sia bapanir waktu sia maniat asap nya mancucul kota inyan, "Kota muna lagi bai nya pacaan uba kota bosar ini nan?" ¹⁹ Sia mahamuran dobu ka pucuk kapala sia dahan bapanir kaping manangis dahan berkabung, ujainya, "Celaka, Celaka am kota bosar inyan nya dari siatam samua nya ada kapal laut nyadi dampu obai kadampuannya. Obai, dalam sejam ja kota inyan binasaam!" ²⁰ "Basukacita tam agan inya, oy surga, oy bala urang kudus, bala rasul, dahan bala nabi, obai Allah jadi manjatuan hukupan akai kota inyan obai kolai nam." ²¹ Lalu siku malaikat nya kuat manguti sabigi batu bosarnya uba batu kilangan dahan manikapannya ka laut kaping bapanir, "uba inyanam, Babel, kota bosar inyan, pacaan dijatuan dahan lalu hilakam. ²² Suara bala pamain kacapi, paniup suling, paniup tarompet, dahan alat musik bukainya pacaan ntah tadinga lagi am di kolai nan. Ntah ada lagi am bala karya seniman nya pacaan ditomuan di kolai nan. suara panggilingan ntah pacaan tadinga lagi di dalam kolai nan. ²³ Cahaya lampu ntah pacaan basinar lagi didala kolai. suara panganten lalaki dahan panganten batina ntah pacaan tadinga lagi di dalam kolai, obai bala padagang kolai inyanan bala pambosar di bumi, dahan samua bangsa disosatan sihir kolai. ²⁴ Dahan, di dalam kota inyan ditemuan darah bala nabi, bala urang kudus, dahan darah samua urang nya jadi dibunuh di bumi."