¹ Lalu aku mandinga suara nya homan dari tompat nya maha kudus, bapanir ka katujuh malaikat inyan, "Hingkas tam dahan tumpahan tam katujuh cangkir murka Allah inyan ka bumi." ² Malaikat nya pertama hingkas dahan manumpahan cangkirnya ka bumi, lalu timul bisul nya buruk dahan manyiksa bala urang nya mamakai tana binatang dahan nya manyomah patungnya. ³ Dahan malaikat kadua manumpahan cangkirnya ka laut; lalu arai laut baubah uba darah urang mati,lalu matiam bala binatang nya hidup di laut tai . ⁴ Dahan malaikat katiga manumpahan cangkir ka bala sungai dahan ka samua mata arai, lalu arainya baubah nyadi darah. ⁵ Lalu aku maninga malaikat nya bakuasa agan arai inyan bapanir, "Duan adil, ---Duan ada dahan nya jadi ada, Duan nya kudus---sobab Duan jadi manjatuan hukupan ini. ⁶ Obai sia jadi numpahan darah bala urang kudus dahan darah bala nabi-Duan. Dahan, Duan jadi mangonyuai sia darah akai diminum; jolu wajar ma akai sia." ⁷ Lalu aku maninga altar inyan bapanir, "oy Tuhan Allah nya bakuasa agan bala jolu, panghakiman Duan nan bonar dahan ongka adil." ⁸ Malaikat nya kaompat pan manumpahan cangkir ka pucu matahari, maka matahari pan dapat maloburan mansia agan api. ⁹ Mansia lobur obai hangat nya luar biasa, tapi sia trus mahujat nama Allah nya bakuasa agan bala malapataka ini, dahan sia totap manula akai batobat dahan mamuliaan Allah. ¹⁰ Malaikat nya kalima manumpahan cangkirnya ka pucu takhta binatang inyan, lalu krajaannya nyadi potang. Sia lalu mangotap lidah sia obai kapodihan. ¹¹ Tapi sia mahujat Allah nya di surga obai kampodihan dahan siksaan nya maha borat inyan, tapi sia totap ntah hona batobat dari bala kalakuan sia. ¹² Malaikat nya kaonam manumpahan cangkirnya ka sungai bosar, inyanam sungai Efrat, lalu arainya tokah, akai mampersiapan jalan akai bala raja dari Timur. ¹³ Lalu aku maniat tiga roh najis nya uba katak, kaluar dari nyawa naga, dahan dari nyawa binatang, dahan dari nabi palsu. ¹⁴ Sia nan bala roh jahai dari setan nya manjawat bala tana ajaib. Lalu si hingkas nomuai bala raja di saluruh dunia mangumpulan sia akai prang ari bosar Allah nya manguasaai bala jolu. ¹⁵ ("Tiat am! Aku datang uba pangolit! Bahagia tam sopa nya totap bajaga dahan totap bapakaian, akai inya jangan bajalan talanyang dahan jangan katiatan kamalu kasupatannya.") ¹⁶ Lalu sia sasama dibaba ka tompat nya dalam bahasa Ibrani disobut , Harmagedon. ¹⁷ Malaikat nya katujuh manumpahan cangkirnya ka angin, lalu tadinga suara homan dari tompat maha kudus dahan dari takhta inyan, ujainya, "Jadi tuntukam." ¹⁸ Dahan datang pantar kilat , agan guruh guntur, mongka gempa bumi maha kuat inyani gempa bumi nya bolum kala bakadian dari samula mansia ada di bumi. Maha raja kuat gempa bumi inyan, ¹⁹ lalu kota bosar inyan tabolah nyadi tiga bagian, dahan bala kota di sagala bangsa pan runtuh. Lalu Allah taingat agan Babel bosar inyan, waktu Inya mangonyuai kota inyan cangkir nya baisi ponuh anggur murka-Nya nya maha garigitan bonar. ²⁰ Bala pulau hilang hinut dahan bala gunung ntah ada katiatan. ²¹ Hujan es nya hebat, masing-masing saborat satu talenta, jatu dari langit maningang mansia; tapi sia totap manghujat Allah obai malapataka hujan es nya maha raja hebat inyan.