¹ Aku maniat tana nya bukai di langit, nya bosar dahan ajaib, tujuh malaikat nya mambaba tujuh malapataka, inyanam bancana nya tarahir,obai jadi inyan murka Allah tongaam. ² Lalu, aku maniat bala jolu uba laut kaca bacampur api dahan sia nya badirin di pingir laut inyanam sia nya jadi mangalahan binatang inyan, patungnya, dahan bilangan namanya. Sia tongahan mamigap bala kecapi pangonyu Allah akai sia. ³ Sia tongahan manyanyi nyanyian Musa, hamba Allah, dahan nyanyian Anak Domba: "Bosar dahan ajaib bala pakarojaan-Duan, oy Tuhan Allah, nya bakuasa agan bala jolu. Adil dahan bonar bala jalan-Duan, Raja sagala bangsa. ⁴ Sopa pani nya ntah gola agan Duan nan, oy Tuhan dahan ntah mamulian nama-Duan ni? Sobab baya Duat ma nya kudus nan. Samua bangsa pacaan datang dahan sujud manyomah di hadapan-Duan obai bala perbuat'an-Duan nya jadi tasebar." ⁵ Habis bala jolu ini, aku maniat tompat nya maha kudus, nya di dalamnya ada mantirung kasaksian, tabuka di surga. ⁶ Lalu kaluaram dari tompat maha kudus inyan katujuh malaikat agan katujuh malapataka tai. Sia bapakaian lenan putih dahan kelap kelip, lalu di dada sia mamakai ikat pingang dari omas. ⁷ Siku dari kaompat binatang inyan, mangonyuai sia tujuh malaikat inyan, tujuh cangkir dari omas nya baisi ponuh agan murka Allah, nya hidup sampai salama-lamanya. ⁸ Tompat maha kudus diponuhai asap kamulian Allah dahan dari kuasa-Nya. Ntah siku pan nya dapat mansuk ka dalamnya sabolum tujuh malapataka dari katujuh malaikat inyan tonga.