¹ Lalu aku maniat Anak Domba badiri di hadapan Bukit Sion. Sasama agan inya katiatanam 144.000 urang nya namaNya dahan nama BapaNya tatulis di koning sia. ² Lalu aku maninga suara dari langit uba bunyi guruh arai bah dahan suara guruh nya homan. Suara nya aku dinga inyan uba suara pamain kacapi nya mamainan kacapi. ³ Sia manyanyian sabuah lagu baharu di hadapan takhta dahan di hadapan kaompat binatang dahan tuha-tuha inyan. Ntah ada sikupan nya tahu nyanyian inyan terkecuali saratus ompat puluh ompat ribu urang nya jadi di tobus dari bumi. ⁴ Sia inyanam bala urang nya ntah mancomaran dirinya agan bala batina, obai sia murni uba parawan. Sia nam nya manyurutan Anak Domba inyan ka muna pan Inya tulak. Sia di tobus dari antara mansia sabagai buah kajulaan bagi Allah dahan Anak Domba. ⁵ Ntah ada panir pabulaan di nyawa sia, obai sia ntah ada cela. ⁶ Lalu aku maniat siku , malaikat bukai nya tarobang. Inya mambaba kabar baik akai di sampaian ka sia nay diap di bumi---nyaam ka satiap bangsa, suku, bahasa dahan umat. ⁷ Inya mancia maha homan, ujainya, "Golatam agan Allah dahan muliaan tam Inya, obai jadi datakam waktu penghakimanNya. Somah tam Inya nya manyadian langit bumi, laut, dahan samua mata arai." ⁸ Lalu siku malaikat nya bukai---malaikat kadua---manyurutannya, ujainya, "Jadi runtuham, runtuham babel bosar tai, nya jadi manjawat bala bangsa nyadi mabuk obai angur persundalannya." ⁹ Malaikat nya bukai---malaikat katiga---manyurutan sia dahan mancia maha homan, "Amun siku urang manyomah binatang dahan patungnya dahan manarima tananya di koningnya atau di tangannya, ¹⁰ Inya pacaan minum dari angur murka Allah, nya jadi di sadiaan dahan dituyukkan ntah bacampuran ka dalam cangkir murkaNya. Urang nya maminumnya pacaan disiksa agan api dahan balerang di hadapan bala malaikatNya nya kudus dahan dihadapan Anak Domba. ¹¹ Asap dari api panyiksaan sia pacaan naik ka pucuk sampai salama-lamanya, dahan siang malam ntah tonga-tonganya sia ntah ulih batonga--- inyaam sia nya manyomah binatang dahan patungnya dahan satiap urang nya manarima tana namanya. ¹² Ini samacam pangilan akai katabahan bagi bala urang kudus, inyaam sia nya manurutai hukum Allah dahan baiman ka Yesus." ¹³ Aku maninga suara dari surga mangataan, Tulisan tam ini: berbahagiatam sia nya mati di dalam Tuhan," "Oy", kata Roh, "akai sia ulih baistirahat obai sia kahoraan, obai sagala perbuatan sia manyarotaan sia." ¹⁴ Aku maniat, ada awan putih. Duduk di awan inyan manyarupaai Anak Mansia. Inya ada mahkota omas di kapalaNya dahan sabilah aret nya tajam di tanganNya. ¹⁵ Lalu malaikat nya bukai kaluar dari Bait Kudus dahan mancia maha homan ka Inya nya duduk di awan: "Kutitam arit Duan nan dahan mahanyi tam. Obai sampaiam waktunya mahanyi, obai hanyian di bumi mansaam." ¹⁶ Lalu Inya nya duduk di awan inyan maayutan aretnya ka pucu bumi, dahan bumi pan dihanyi. ¹⁷ Lalu siku malaikat nya bukai kaluar dari Bait Kudus di surga; inya pan mamigap sabilah aret nya tajam jam. ¹⁸ Lalu siku malaikat nya bukai lagi kaluar dari mezbah, inyani malaikat nya bakuasa agan api. Inya mancia maha homan ka malikat nya mamigap aret nya tajam inyan, "Kuti tam aret kolai nya tajam tai dahan kumpulan tam bala tunun buah angur di bumi, obai buahnya mansaam." ¹⁹ Lalu malaikat inyan maayutan aretnya ka bumi dahan mangumpulan angur hanyian di bumi lalu mambuakkan ka dalam kilangan bosar murka allah. ²⁰ Bala angur inyan di dalam kilangan inyan diporah di luar kota, dahan darah mangalir ka luar dahan tinginya sampai ka kekang kuda dahan jauhnya dua ratus mil.