¹ Lalu aku maniat siku binatang dari dalam laut. Inya batanuk sapuluh dahan bakapala tujuh. Di bala tanuknya ada sapuluh mahkota, dahan di kapalanya tatulis nama-nama penghujatan agan Allah. ² Binatang nya aku tiat inyan manyarupaai macan tutul. Kakinya manyarupaai kaki baruang dahan nyawanya manyarupaai nyawa singa. Naga itu mangonyu kuasanya, takhtanya dahan kakuasaan pamarintahannya nya bosar ka binatang inyan. ³ Lalu kutiat siku dari binatang inyan uba takona luka nya mamatian. Tapi luka inyan kalit am dahan saluruh bumi kagum lalu manyurutan binatang inyan. ⁴ Sia manyomah naga inyan obai inyanam nya mangonyu kakuatannya ka binatang inyan. Lalu sia manyomah binatang inyan kaping bapanir, "Sopa nya sama uba binatang ini? dahan sopa nya dapat baprang malawan inya?" ⁵ Akai binatang inyan di konyuai nyawa nya ponuh agan kasomokan dahan hujat. akai hal inyan inya di konyuan kakuasaan malabuhannya samanah ompat puluh dua bulan. ⁶ Uba inyanam binatang inyan mambuka nyawanya dahan mangataan bala kata panir mahujat Allah, mahujat namaNya, tompat kadiapanNya dahan samua nya diap di surga. ⁷ Binatang inyan di konyuai kuasa akai manorakai bala urang kudus dahan mangalahan sia. Dahan inya pan di konyuai kuasa agan satiap suku, umat, bahasa dahan bangsa. ⁸ Samua nya diap di bumi pacaan manyomah inya,inyanam satiap nya sejak dunia di ciptaan, ntah tatulis namanya di dalam buku kahidupan daria Anak Domba nya jadi di samolih. ⁹ Sopa nya baponing kahonanya inya maninga. ¹⁰ Sopa nya jadi di tontuan akai di tawan, inya pacaan d tawan; sopa nya di tontuan akai di bunuh agan manau, inya harus di bunuh agan manau. Iniam panggilan akai manunyuan katabahan dahan iman bagi sia nya disobut bala urang kudus. ¹¹ Lalu aku maniat siku binatang nya bukai kaluar dari dalam bumi. Inya batanuk dua manyarupaai anak domba dahan inya bapanir uba naga. ¹² Saluruh kakuasaan dari binatang nya pertama di jalatannya di hadapan inya, dahan inya manjawat saluruh bumi dahan samua nya diap di dalamnya manyomah binatang nya pertama---inyanam binatang nya lukanya mamatian inyan jadi kalit am. ¹³ Inya malabuhan muzijat-muzijat nya dasyat, bahkan manurutan api dari langit di hadapan samua urang. ¹⁴ Agan bala muzijat nya inya labuhan inyan inya manyosatan bala urang nya diap di bumi, lalu manyurug sia ninyakan patung binatang nya luka nya totap hidup inyan. V 15Lalu inya mangonyu kakuatan akai mangonyuai napas kahidupan ka patung binatang inya n akai patung inyan dapat bapanir dahan mambunuh samua urang nya ntah hona manyomah binatang inyan. ¹⁶ Inya pan maharusan satiap urang, bosar atau kocit, kaya atau jara, mardeka atau hamba, manarima tana di tangan dahan di koningnya. ¹⁷ Dahan satiap urang ntah ulih bajual boli amun ntah mamakai tana binatang inyan, inyanam namanya bilanganya. Ini mamerluan hikmat' Sopa nya bijaksana, kahonanya inya mahitung bilangan binatang inyan. Obai bilangannya inyanam bilangan mansia. Bilangan inyani onam ratus onam puluh onam.