¹ Lalu katiatanam tanda bosar di langit: Siku batina basalumung mataari, agan bulan di babah kakinya. Inya mamakai mahkota di kapalanya dahan di mahkotanya ada 12 bintang. ² Inya tongahan buntikan dahan tongahan mancia mandorah maasaan kampodihan basalin obai honak baranak. ³ Lalu katiatanam tana nya bukai di langit: Tiatam! Siku naga merah nya bosar, bakapala tujuh dahan batanuk sapuluh, dahan di kapalanya ada tujuh mahkota. ⁴ Naga inyan badiri di hadapan batina nya honak malahiran tai, akai pas batina inyan malahiran, inya langsung manolan Anaknya inyan. ⁵ Inya malahiran anak lalaki, nya pacaan mamarintah samua bangsa-bangsa agan gada bosi. Tapi ntah di sangka-sangka Anak inyan di rampas dahan di baba lari ka Allah dahan ka takhtaNya, ⁶ dahan batina inyan lari ka padang gurun, di nuhun Allah jadi manyadiaan tompai akai inya, akai inya di rawat di sian samanah 1.260 ari. ⁷ Lalu bakajadianam paprangan di surga. Mikhail dahan bala malaikatnya baprang malawan naga nya di bantu agan bala malaikatnya. ⁸ Tapi naga inyan ntah dapat mangalahannya, lalu inya dahan bala malaikatnya kahilakan tompat di surga. ⁹ Naga bosar inyan---si ukar tuha disobut iblis atau setan, nya manyosatan saluruh dunia---dibuakan ka bumi, dahan bala malaikatnya di buakan ka babah sasama agan inya. ¹⁰ Lalu aku maninga suara homan dar surga: "Inini datakam kasalamatan, kakuasaan, pamarintahan Allah kita, dahan kakuasaan Kristus. Obai pandakwa bala samadikan kita jadi di buakan ka babah, nya mandakwa sia siang malam di hadapan Allah kita. ¹¹ Sia mangalahan inya obai darah Anak Domba, dahan oabi perkataan kasaksian sia. Obai sia ntah mangasihai nyawa sia biarpan harus mahadapai maut. ¹² Karna inyan, basukacitatam, hai surga, dahan samua nya diap di dalamnya. Tapi calakatam, hai bumi dahan laut, obai iblis jadi turun ka kolai agan kamarahan hebat obai inya tahu kalau waktunya sadikit ma. ¹³ Waktu naga inyan manyadarai kalau inya dibuakan ka bumi, inya manyasah batina nya jadi malahiran Anak lalaki tai. ¹⁴ Tapi batina inyan di konyuai dua sayap burung rajawali nya bosar, akai inya dapat trobang ka tompat nya jadi di siapan akai inya di padang gurun, tompat inya pacaan di rawat akai satu masa, dua masa dahan satongah masa. ¹⁵ Lalu ular inyan manyomuran arai nya bosarnya uba sungai kaluar dari nyawanya ka arah batina inyan akai mahanyutan batina inyan. ¹⁶ Tapi bumi manulung batina inyan agan mambuka nyawanya dahan manolan sungai nya disomuran naga inyan dari nyawanya. ¹⁷ Lalu naga inya nyadi maha godi agan batina inyan lalu inya lari mamorakai katurutannya nya bukai - inyanam sia nya manurutai bala hukum Allahdahan nya mamigap kasaksian mangonaai Yesus. ¹⁸ Naga inyan badiri di pasir di pingir pantai laut.