¹ Lalu di konyunyam ka aku sabuti tungkah nya di pakai akai paukur. Lalu aku di suruh, "Angkattam dahan ukur Bait Kudus Allah dahan mezbah dahan ongka sia nya ibadah si dalamnya nan. ² Jangan maukur teras luar Bait Kudus inyan, obai inyan di konyu akai urang bukai Yahudi. Sia pacaan maninyak-ninyak kota kudus inyan samanah ompat puluh dua bulan. ³ Aku pacaan mangonyu dua saksiKu kuasa akai banubuat samanah 1.260 ari, mangonaan kai kabung." ⁴ Kadua saksi inyani inyaam kadua batang zaitun dahan kadua kaki plita nya badiri di hadapan Allah dari saluruh bumi ini. ⁵ Apabila ada urang nya hona ngapodihai sia maka api pacaan kaluar dari nyawa sia dahan dahan mambinasaan bala musuh sia. Sopapan nya hona mangacaciai sia pacaan banasa agan cara ubainyan. ⁶ Bala saksi ini ada kakuatan akai manutup langit, akai jangan turun hujan samanah sia banubuat. Siapn ada kakuatan akai maubah arai manyadi darah dahan mamukul bumi agan bamacam jenis malapataka satiap kali sia mangahonaainya. ⁷ Pas sia jadi manyalesaian kasaksian sia, binatang nya muncul dari jurang nya ntah takira dalamnya inyan manorakai sia dahan mangalahan lalu mambunuh sia. ⁸ Lalu mayat sia dilotaan di sabuah jalan bosar [nya sacara kiasan disobu Sodom agan Mesir] di tompat sia di saliban. ⁹ Samanah tiga satongah ari mayat sia ditiat bala urang dari sagala umat, suku, bahasa dahan bangsa,dahan mayat inyan horu di izitan akai di kubur. ¹⁰ Sia nya diap di bumi rinang obai sia dua tai dahan marayaannya, sampaipan saling mangirim hadiah obai kadua nabi ini tai manyadi siksaan bagi samua urang nya diap di bumi. ¹¹ Tapi tiga satongah ari jadi inyan ,mansuklah nafas kahidupan ka dalam sia, lalu sia dua tai bangkit lagian. Samua urang banyak gola maniat siaan tai. ¹² Lalu kadua nabi inyan manunga suara nya homan dari surga nya bapanir ka sia, "Naiktam kakoni!" Lalu naik am sia ka surga agan di tutupai awan, disaksian bala musuh sia. ¹³ Waktu inyan ada gempa bumi nya dasyat dahan sepersapuluh bagian kota inya robah. Tujuh ribu urang mati obai gempa bumi inyan dahan bala urang bukai nya salamat nyadi gola, Lalu mamuliaan Allah nya di surga. ¹⁴ Calaka nya kadua laluam. tiatam! Calaka ny katiga pacaan datakam. ¹⁵ Lalu malaikat nya katujuh mambunyian tarompetnya,dahan tadingalah suara dari surga mangataan, "krajaan dunia manyadi krajaan dari Tuhan kita dahan Kristus. Inya pacaan mamarintah akai salama-lamanya." ¹⁶ Lalu kadua puluh ompat tuha-tuha, nya duduk di pucuk takhta di hadapan Allah inyan sujud manyomah dalam karendahan ka Allah. ¹⁷ Sia bapanir, "Kami mangucap syukur agan Duan, Oy Tuhan Allah, Panguasa sagala jolu, Nya ada inini dahan Nya jadi ada, obai Duan jadi mngambil alih kuasa Duan nya bosar, dahan mulai mamarintaham. ¹⁸ Bala bangsa kaban godi, tapi murka Duan pan jadi datakam. Waktunya datakam bagi bala urang mati akai di hakipai dahan akai mangonyu upah ka bala hamba Duan bala nabi, dahan bala urang kudus dahan urang nya gola agan nama duan, baik bala urang kocit ataupan bala pambosar, dahan akai mambanasaan sia nya marusak bumi." ¹⁹ Lalu tabukaam Bait Kudus di surga dahan katiatanam tabut perjanjianNya ada ada di dalam Bait KudusNya. Lalu bakajadianam pantar guntur kilat, gempa bumi dahan hujan es nya kuat.