¹ Akhirnya, bala samadikanku, bersukacita tam dalam Tuhan. Aku ntah kaboratan ma manjelasan lagi bala jolu nya sama ka hunin obai jolu ini akai manjagaai hunin. ² Hati-hati tam agan bala kuduk, hati-hati tam agan bala panjahat, dahan hati-hati agan sia nya manyunat tubuh, ³ sobab kita niam urang nya basunat sejati nan, nya manyomah dalam Roh Allah, mamuliaan Yesus Kristus, dahan ntah manaruh kapercayaan agan bala jolu nya lahiriah. ⁴ Biarpan aku sabonarnya ada alasan akai bamegah agan bala jolu nya lahiriah. Amun ada urang bukai nya bapikir obai inya ada alasan akai bamegah agan bala jolu nya lahiriah, lobih nyam aku: ⁵ Aku disunat di hari ka dalapan, bangsa Israel asli, dari suku Benyamin, urang Ibrani nya ba bahasa Ibrani. Manurut Hukum Taurat, aku ni urang Farisi. ⁶ Dalam hal samangat, aku ni panganiaya jemaat, dahan dalam hal kabonaran di babah Hukum Taurat, aku ntah bacacat. ⁷ Tapi, bala jolu nya holu tai mauntukkanku, inini kuanggap rugi obai Kristus. ⁸ Maha bonar ma, bala jolu kuanggap rugi dibanikan agan pangenalan agan Yesus Kristus, Tuhanku, nya jauh lobih baroga dari apa pan. Demi Kristus, aku kahilakan samuanya-- obai samua inyan inini kuanggap sampah! -- akai aku ulih mandapatan Kristus. ⁹ Aku ditomuan dalam Kristus bukainya dalam kabonaran dari diriku nya kudapatan dari Hukum Taurat, tapi nya datang malalulai iman dalam Kristus, inyanam kabonaran dari Allah nya badasaran iman. ¹⁰ Kahonanya aku dapat mangenal Inya agan kuasa kabangkitan-Nya, dahan manyatu dalam pandritaan-Nya akai nyadi uba Inya dalam kamatian-Nya ¹¹ sampai akhirnya aku mandapatan kabangkitan dari antara urang mati. ¹² Tapi bukainya baarti aku jadi mandapatannya atau jadi sampurna, tapi aku manyasahnya dahan manangkapnya uba Kristus Yesus manangkap aku nan. ¹³ Bala samadikan, aku tidak maangap kalau aku jadi manangkapnya. Tapi, satu hal nya ku lakuan: aku ntah ingat agan apanya di balikatku dahan pokus agan apa nya di hadapanku. ¹⁴ Aku trus maju ka tujuan akai dapat hadiah, inyanam panggilan surgawi dari Allah dalam Yesus Kristus. ¹⁵ Ayuam kita nya sampurna bapikir macam inyan. Amun kolai ntah bapikir macam ini, Allah pacaan manuyuanya dengan jelas ka kolai. ¹⁶ Tapi ayuam kita hidup sasuai agan kabonaran nya ada di kita. ¹⁷ Bala samadikan, jumpatai tam taladanku dahan protian jam bala urang nya hidup sasuai agan taladan nya kolai tiat dari kami. ¹⁸ Sobab, banyak urang nya hidup akai bala musuh salib Kristus. Mangonaai jolu ini, aku ropat am mangesahannya ka hunin dahan inini aku mangesahannya lagi ka hunin agan arai mata arai hidungku. ¹⁹ Ahir hidup sia nan kabinasaan, obai Allah sia nan porut sia, dahan pujian sia inyan bala jolu nya mamaluan. Pikiran sia baya akai bala jolu duniawi ma. ²⁰ Tapi, kawarganegaraan kita nan di surga, di muna kita ponuh samangat mananti-nantian Juru Salamat, inyanam Tuhan Yesus Kristus. ²¹ Inya pacaan marubah tubuh kita nya hina sarupa agan tubuh kamuliaan-Nya. Agan kuasa-Nya inyan, Kristus ulih mambaba bala jolu tunuk agan Inya.