¹ Jadi amun dalam Kristus basamangat, penghiburan kasih, persekutuan Roh, kasih sayang, dahan belas kasihan, ² Sampurnaan tam sukacita agan sahati sapikir maadaan kasih nya sama, disatuan dalam roh, dahan ada dalam satu tujuan. ³ Jangan malabuhan apapan dari ambisi egois atau kasomokan sia-sia tapi agan karendahan hati, angap ja urang bukai lobih penting dari diri kita siku. ⁴ Jangan bala hunin baya mamparhatian kapentingan hunin siku ja, tapi kapentikan urang bukai pan diperhatian jam. ⁵ Kahonanya pikiran ini ada dihunin, ubanya ada di Yesus Kristus, ⁶ nya biarpan uba rupa Allah, Inya tidak maanggap sajajar agan Allah, sabagai jolu nya harus dipertahatan. ⁷ Sabaliknya, Inya maasa dirinya ntah ada apa-apa dahan mahambaan diri uba kuli akai nyadi sama agan rupa mansia. ⁸ Dalam keadaan uba mansia, Inya mambabahan diri-Nya dahan patuh sampai mati, bahkan sampai mati di kayu salib. ⁹ Akai iniam, Allah maha maningian Inya dahan maanugrahan ka Inya nama di pucu sagala nama ¹⁰ kai dalam nama Yesus, satiap kaputut maliku baik nya ada di langit, nya ada di bumi, dahan nya ada di babah bumi. ¹¹ dan satiap lidah mangaku bahwa Kristus Yesus inyanan Tuhan bagi kamuliaan Allah, Sang Bapa! ¹² Karena inyan, bala samadikanku terkasih, uba kolai nya hala nurut-- bilanya baya waktu aku ada agan kolai, lobih-lobih inini waktu aku ntah ada agan hunin -- krojaan kasalamatan kolai agan gola malu. ¹³ Sobab, Allah am nya bakroja di dalam kolai baik akai mangahonaai atau pan mangarojaan apa nya manyonangan-Nya. ¹⁴ Lakuan tam samuanya inyan jangan manggarutu atau batengkar. ¹⁵ akai kolai ntah cacat cola dahan ntah basalah, salaku bala anak Allah nya ntah bacola di tongah-tongah generasi pengkok dahan sosat ini, akai kolai basinar di antara sia salaku torang dunia. ¹⁶ Bapigap kuat tam agan Firman kehidupan akai di hari Kristus aku dapat alasan bermegah bahwa aku ntah balari sia-sia dahan kroja koras sia-sia. ¹⁷ Sekali pan aku harus dicurahan uba cangkir persembahan di pucu kurban dahan palayatan iman kolai, aku rinang dahan bersukacita agan hunin samua. ¹⁸ Uba inyan jam kolai, agan alasan nya sama bahagia dahan bersukacita tam sasama agan aku. ¹⁹ Dalam Tuhan Yesus, aku baharap dapat copat mautus Timotius akai hunin, supaya aku tahibur waktu mandinga kabar mangonaai hunin. ²⁰ Sobab, ntah ada urang bukai am uba inyanan,nya tulus mampadulian kasejahteraan hunin. ²¹ Sobab, nya bukai baya repotan kapentingannya siku, bilanya kepentingan Yesus Kristus. ²² Uba nya kolai tahu, Timotius jadi mambuktian dirinya baroga, inya malayatai sasama agan aku demi kamajuan pembritaan Injil uba anak agan bapanya. ²³ Obai inyan aku baharap dapat mautus inya pas aku tahu apa nya pacaan bakajadian agan aku, ²⁴ dahan aku percaya agan Tuhan bahwa aku siku pan pacaan datang jam ka hunin. ²⁵ Tapi, aku bapikir perlu jam mautus Epafroditus akai hunin. Inya nan samadikanku, kawal sepalayananku, kawal seperjuanganku, dahan inya jam nya mambaba posan pakai hunin dahan nya malayatai kaperluanku. ²⁶ Sebab, inya maha rinuan hunin samua dahan maha sedih hatinya obai hunit tahu bahwa inya sakit. ²⁷ Memang, holu tai aman inya sakit sampai hona mati am, tapi Allah manunyuan belas kasih agan inya -- dahan bilanya baya agan inya biar agan akupan sama jam akai dukacitaku ntah batumpuk-tumpuk. ²⁸ Obai inyan, aku jadi maha hona mautusnya lagi ka hunin akai hunin bersukacita waktu maniatnya lagi, dahan mangurakkai kakuatiranku. ²⁹ Samut tam Eprafoditus dalam Tuhan dengan ponuh sukacita dahan hormatai tam bala urang nya uba inya nan. ³⁰ Obai inya hampir mati demi pakarojaan Kristus; inya mempertaruhan nyawanya akai manggonti bantuan nya ntah dapat hunin konyu ka aku.