¹ Karena inyan, bala samadikanku nya kukasihai dahan nya kurinuan, nya nyadi sukacita dahan kebanggaanku, berdiri togap tam dalam Tuhan. ² Aku maha mamohon agan Euodia dahan agan Sintikhe akai hidup rukun dalam Tuhan. ³ Ya, aku minta agan kolai, kakawalan akrabku, Tulung tam bala batina ini obai sia jadi kroja koras agan aku demi palayanan Injil, sasama agan Klemens dahan bala kawalku bagawi nya bukai, nya namanya tatulis dalam buku kahidupan. ⁴ Bersukacitatam dalam Tuhan. Sakali lagi kupaniran, bersukacitatam! ⁵ Kahonanya kalomutan hati kolai nan, dikatahuai samua urang. Tuhan dampikam. ⁶ Jangan kuatir agan bala jolu nan. Tapi, dalam bala jolu padahan kahona kolai ka Allah dalam doa dahan permohonan agan ucapan syukur. ⁷ Damai sejahtera Allah nya malampauai sagala pangarotian akan mamalihara hati dahan pikiran kolai dalam Yesus Kristus. ⁸ Ahirnya, Bala samadikan, samua nya bonar, samua nya mulia, samua nya adil, samua nya suci, samua nya sega, samua nya tapuji, semua nya sampurna, samua nya patut dipuji, pikiran tam samuanya inyan. ⁹ Apa nya jadi kolai palajarai, tarima, dinga, dahan tiat dari aku, lakuan tam samua inyan, maka Allah sumber damai sejahtera akan manyarotaai kolai. ¹⁰ Aku maha bersukacita dalam Tuhan obai inini, ahirnya kolai perhatian lagi agan aku. memang, sabolumnya pan kolai jadi perhatian agan aku, tapi kolai ntah ada kasompatan. ¹¹ Aku mamaniran hal ini bilanya obai aku tongahan kakurakan, obai aku jadi balajar mancukupan diri dalam kaadaan apa pan. ¹² Aku tahu apa rotinya kakurakan, dahan aku pan tahu apa rotinya kalimpahan. Dalam sagala dahan satiap kaadaan, aku jadi balajaram rahasia hidup bakacukupan, baik waktu konyang atau kalaparan, baik waktu hidup banyak duit atau ntah ada duit. ¹³ Aku dapat malabuhan bala jolu malaluai Inya nya mangonyuaiku kakuatan. ¹⁴ Tapi, kolai jadi malakukan kabaikan hona babagi beban agan ku. ¹⁵ Kolai sikupan tahu, jemaat Filipi, bahawa waktu mula pertama pelayanan Injil, jadi aku ningalan daerah Makedonia, ntah ada jemaat nya hona babagi beban agan aku dalam hal bakonyu babori, kacuali kolai. ¹⁶ Malah, waktu di kota Tesanolika, kolai mangirim bantuan akai kaperluanku lobih dari sakali. ¹⁷ Tapi, bilanya bantuan inyan nya aku goyap, tapi aku goyap buah nya pacaan mamperbosar kauntukan kolai. ¹⁸ Aku jadi manarima pambayaran ponuh, malahan lobih. Aku mandapatan samua nya aku perluan obai pangonyu nya kolai kiripan agan Epafroditus. Pangonyu kolai inyan nyadi persembahan nya harum, kurban nya berkenan, dahan manyonangan Allah. ¹⁹ Allahku pacaan mamonuhai bala kaperluan kolai manurut kakayaan-Nya nya mulia dalam Yesus Kristus. ²⁰ Kamuliaan bagi Allah dahan Bapa kita akai salama-lamanya. Amin. ²¹ Sampaian tam salam kami ka satiap urang kudus dalam Yesus Kristus. Salam akai kolai dari bala samadikan saiman nya ada agan aku di sini. ²² Samua urang kudus mangirim salam akai kolai, hususnya sia nya bagiwi malalayatai di istana Kaisar. ²³ Anugerah dari Tuhan Yesus Kristus manyarotaai roh kolai. Amin.