¹ Udah inyan, Yesus bapanir ka sia, "Aku mangataan yang sabonarnya ka kolai, ada babaropa urang nya tongahan badiri di sini ntah pacaan mati sampai sia maniat Karajaan Allah datang bakuasa." Yesus agan Musa dahan Elia ² Dahan, Onam hari jadi inyan, Yesus mahaupai Petrus, Yakobus, agan Yohanes, akai mangunsi ka bukit ynya tingi. Lalu, Yesus barubah rupa di hadap'an sia. ³ Dahan, pakaian-Nya nyadi torang dahan maha putih. Tidak ada tukang pamutih kain di dunia suba mamutihan uba inyan. ⁴ Lalu, muncul di hadap'an sia, Elia agan Musa, sia tongahan bapanir agan Yesus. ⁵ Lalu, Petrus bapanir ka Yesus, "Guru,lobih baik kami diam disini am. Ayo kita jawat tiga kemah, sabuah akai Duan, sabuah akai Musa dahan sabuah lagi akai Elia." ⁶ Sobab, Petrus ntah tahu harus manjawab apa obai sia samua kagolaan. ⁷ Lalu, munculam awan malinukai sia, dahan kadingaan ada suara datang dari awan inyan, ujai-Nya "Ini am Anak-Ku maha Ku kasihai. Dingaan tam Inya!" ⁸ Waktu inyan jam, pas sia maniat ka bukai,sia ntah ada niat sopa-sopa lagi am nya sasama agan sia kecuali Yesus. ⁹ Dahan, kaping sia turun dari gunung, Yesus baposan ka sia akai ntah mamadahannya ka urang apa nya jadi sia tiat, sampai Anak Mansia bangkit dari urang mati. ¹⁰ Karna inyan,sia mamigap perkataan inyan akai sia siku kaping batanya-tanya apa artinya kabangkit'an dari kamatian inyan. ¹¹ Lalu sia batanya ka Yesus, "Maapa bala ahli Taurat bapanir bahwa Elia harus datang lobih holu?" ¹² Lalu, Yesus bapanir ka sia, "Elia memang datang lobih holu akai mamulihan bala jolu. Dahan, uba apa nya tatulis mangona'ai Anak Mansia bahwa Inya harus mandrita banyak hal dahan dihina? ¹³ Tapi, kata Ku gan kolai bahwa Elia memang jadi datang am, dahan sia maulahannya sasuai agan nya sia kahona'ai, uba nya tatulis mangona'ai Inya." ¹⁴ Lalu, waktu Yesus, Petrus, Yakobus, dahan Yohanes babali natakai murid-murid, sia maniat karumunan urang banyak di sakaliling bala murid inyan, dahan bala ahli Taurat tongahan badebat agan sia. ¹⁵ Dan, pas bala sia nya bakarumun maniat Yesus sia pan takonyat lalu balari manyamut-Nya. ¹⁶ Lalu, Yesus batanya ka sia, "Jolu apa nya hunin perdebat'an agan bala ahli Taurat ni?" ¹⁷ Salah siku dari sia nya bakarumun inyan menjawab Inya, "Guru, aku mambaba anak lalakiku ka Duan obai inya ni karasu'an roh nya manjawatnya bisu. ¹⁸ Satiap roh inyan marasuknya, inya mahompasannya ka tanah dahan Inya mangaluaran buih dari nyawanya, dahan mangaretet'an giginya, lalu inya takota. Aku manyuruh bala murid Duan mausir roh inyan tapi ntah sia ulih." ¹⁹ Lalu, Yesus manjawab sia dahan bapanir, "Oy, generasi nya ntah baiman! baropa manah lagi aku harus sasama agan kolai? baropa manah lagi Aku harus batahan agan kolai? baba ka Aku biak inyan!" ²⁰ Lalu, Sia mambaba biak inyan ka Yesus. Dahan, waktu roh inyan maniat Yesus, inya langsung manguncang-nguncangkan biak inyan. Biak inyan sampai jatu ka tanah dahan taguling-guling dahan nyawanya mangaluaran buih. ²¹ Lalu, Yesus batanya ka bapa biak inyan, "Dah apa am manahnya penyakitnya ni?" ²² "Jawabnya, "Dari inya ija kocit.Dahan, roh inyan ropat am manula'annya ka dalam api dahan ka dalam arai akai mahancurannya. Tapi, amun duan dapat manulung kasihai kami dahan tulung kami tam." ²³ Yesus bapanir ka inya, "Amun Kula dapat? Bala jolu mungkin bagi sia nya percaya." ²⁴ Lalu bapa anak inyan manangis dahan mamohon, "Aku percaya! Tulung tam katidak percayaan ku ni!" ²⁵ Waktu Yesus maniat bahwa banyak urang datang bakarumun dengan copat, Inya mahongar roh inyan kaping bapanir ka inya, "Kolai roh bisu dahan tuli, Aku printahan kolai kaluar dari biak ini dahan jangan mamansu'ainya lagi!" ²⁶ jadi mandorah dahan mangguncangkan biak inyan dengan hebat, maka roh inyan kaluar. Lalu biak inya uba urang mati maka urang banyak bapanir, "Inya mati!" ²⁷ Tapi Yesus mamigap tangan biak inyan dahan mahuasannya, lalu anak inyan badiri. ²⁸ Dahan, waktu Yesus mansu ka rumah, murid-murid-Nya batanya ka Inya secara pribadi, "Maapa kami ntah dapat mausirnya?" ²⁹ Lalu, Inya bapanir ka sia, "Jenis ini ntah dapat kaluar kecuali agan doa." ³⁰ Dari sian, Yesus agan bala murid-Nya bajalan malaluai daerah Galilea.Obai Inya gola katahuan urang. ³¹ Sobab, Inya tongahan mangajar bala murid-Nya dahan bapanir ka sia, "Anak mansia pacaan disorahan ka tangan mansia, dahan sia pacaan mambunuh-Nya. Dahan, jadi inya dibunuh, tiga ari jadi inyan Inya pacaan bangkit." 32Tapi bala murid ntah paham agan panir Sia inyan dahan gola batanya ka Inya. ³³ Lalu, Yesus dahan bala murid-Nya sampai di ka Pernaum. Dahan, pas Yesus ada di dalam rumah am, Inya batanya ka sia, "Apa nya hunin kesahan di pajalatan tai?" ³⁴ Tapi, sia diam obai dalam pajalatan sia badebat agan siku manyiku mangona'ai hal sopa nya paling bosar. ³⁵ Lalu, Yesus duduk dahan maningkau kadua bolas murid. Lalu, Inya bapanir ka sia, "Amun urang hona nyadi nya pertama, inya harus nyadi nya terahir dari samuanya dahan palayan bagi samuanya." ³⁶ Udahan Yesus manguti babiak kocit dahan malota'annya badiri di tongah sia. lalu, kaping mangoluai biak inyan, Inya bapanir ka sia, ³⁷ "Sopa pan nya manyamut babiak kocit uba ini dalam nama-Ku, inya manyamut Aku. Dahan, sopa pan nya manyamut Aku bilanya manyamut Aku, tapi manyamut Sia nya mangutus aku." ³⁸ Yohanes bapanir ka Yesus, "Guru, kami maniat urang-urang mausir bala setan dalam nama Duan,lalu kami maningahnya obai inya ntah jumpat kita." ³⁹ Tapi,kata Yesus, "Jangan mahalakainya obai ntah ada urang nya malabuhan parbuatan ajaib dalam nama-Ku, nya waktu inyan jam dapat mahujat aku. ⁴⁰ Sobab, sopa nya ntah malawan kita, ada di pihak kita. ⁴¹ Sobab, Aku mangataan nya sabonarnya ka kolai, sopa pan nya mangunyuai kolai sacangkir arai karna kolai pangikut Kristus, tidak akan kahilakan upahnya." ⁴² "Dahan sopa pan nya manyobab'an salah siku dari biak kocit nya percaya agan Aku manjawat dosa, lobih baik bagi inya digantukan batu kilangan nya bosar ka lihirnya dahan inya dibuakkan ka laut. ⁴³ Dahan, Amun tangan kolai manyobab'an kolai badosa, totak ja tangan kolai inyan, lobih baik bagi kolai mansu ka dalam kehidupan agan tangan kutul, dari pada agan dua tangan mansu ka naraka, ka dalam api nya tidak akan buta, ⁴⁴ Tompat nya hulatnya tidak akan mati dahan apinya tidak akan buta. ⁴⁵ Dahan, amun kaki kolai manyobab'an kolai badosa, totak ja kaki kolai inyan. Lobih baik bagi kolai mansu ka dalam hidup agan kaki kutul daripada agan dua kaki dibuakan ka dalam naraka, ⁴⁶ Tompat nya hulatnya tidak akan mati dahan apinya tidak akan buta. ⁴⁷ Dahan, amun mata kolai manyobab'an kolai badosa, cungkit mata kolai inyan. Lobih baik bagi kolai mansu ka Karajaan Allah agan suti mata daripada agan dua mata dibuakan ka dalam naraka, ⁴⁸ Tompat nya hulatnya nya tidak akan dahan apinya tidak akan buta. ⁴⁹ Sobab, satiap urang pacaan digarapai agan api. ⁵⁰ Garam inyan baik, tapi amun garam inyan kahilakan mansinnya, uba apa kolai pacaan manjawatnya mansin lagi? Ungku'ai tam garam dalam diri siku dahan badamai tam agan siku manyiku."