¹ Lalu, Yesus maningalan tompat inyan lalu tula ka wilayah Yudea dahan ka saborang sungai Yordan. Dahan urang banya bakumpul mangarumunai Inya lagi. Dahan uba kabiasaan-Nya,Inya mangajar sia lagi. ² Lalu, bala urang Farisi mandatakai-Nya, dan mauncu Sia lalu sia batanya, "Apakah dibonaran amun laki nya manyara bininya?" ³ Yesus manjawab sia, "Apa nya Musa printahan ka kolai?" ⁴ Sia bapanir,"Musa maijitan lakinya manjawat surat sara dahan manyaranya.'' ⁵ Tapi, Yesus bapanir ka sia, "Obai kakorasan hati kolai nan, Musa manulisan printah ini ka kolai. ⁶ Tapi, dari sejak permulaan penciptaan, 'Allah manciptaan sia lalaki agan batina. ⁷ Karna inyan am lalaki pacaan ningalan bapa agan umaknya. ⁸ Lalu, kaduanya pacaan nyadi satu daging.' Kalau uba inyan, sia bilanya dua lagi tam, tapi satu dagikam. ⁹ Jadi, apa nya jadi disatuan Allah, jangan dipisahan mansia." ¹⁰ Lalu, di dalam rumah, bala murid-Nya batanya lagi ka Inya mangona'ai hal inyan. ¹¹ Maka, Inya bapanir ka sia, "Sopa pan nya manyara bininya dahan kawin agan yang bukai ,bazinah agan bininya. ¹² Lalu, amun bininya manyara lakinya, dahan kawin agan nya bukai inya bazinah." ¹³ Lalu, sia mambaba bala biak kocit ka Yesus akai Inya mancamanya, tapi bala murid-Nya maningah sia. ¹⁴ Tapi, Yesus maniatnya, Inya godi dahan bapanir ka bala murid-Nya, "Biaran ja bala biak nan datang ka Aku jangan mahalak-halakainya obai Krajaan Allah inyanan umpu bala urang nya uba sia nam. ¹⁵ Aku mangataan nya sabonarnya ka hunin, sopa pan nya tidak manyamut Krajaan Allah uba bala biak, tidak akan mansu ka dalamnya." ¹⁶ Lalu, Yesus mangolu'ai bala biak inyan, Inya mamberkat'ai sia dahan manumpaan tangan-Nya ka sia. ¹⁷ Lalu, waktu Yesus manyiap'an pajalatan-Nya, ada urang balari natakai-Nya lalu manyomah di hadap'an-Nya dahan batanya, "Guru nya baik, uba apa akai aku dapat warisan hidup nya kekal?" ¹⁸ Lalu, Yesus batanya ka inya, "maapa kolai manyobut'an aku baik? Ntah ada siku pan nya baik, kacuali Allah nam. ¹⁹ Kolai tahu agan bala printah: 'Jangan mambunuh, jangan bazinah, jangan mangolit, jangan pabula'an, jangan manipu, hormat'ai tam bapa agan uma kolai.' " ²⁰ Lalu, orang inyan bapanir ka Inya, "Guru, aku jadi mamatuhai samua inyan dari aku ija muda." ²¹ Tapi, Yesus kasih hatinya maniat pamuda inyan lalu bapanir ka inya, "Sabuti hal nya kurang dari kolai. Pulang dahan jual tam samua kadampuan kolai nan, lalu konyu ka orang Jara, maka kolai pacaan dapat harota di surga. Lalu,bali ka koni udi jumpat aku." ²² Tapi, podih hatinya mandinga pamaniran inyan lalu inya pulang dahan sedih obai inya manyimpan banyak harota. ²³ Lalu, Yesus mamprotian ka sakaliling dahan bapanir ka bala murid-Nya, "Maha uyuh bagi sia nya dampu akai mansu ka Karajaan Allah!" ²⁴ Bala murid takonyat ninga pamaniran-Nya.Tapi, Yesus bapanir lagi ka sia, "Uy bala biak maha uyuh tem akai mansu ka karajaan Allah ni! ²⁵ Lobih mudah siku unta mansu ka lubang jarum daripada urang dampu mansu Krajaan Allah." ²⁶ Bala murid makin takonyat dahan bapanir ka siku manyiku, "Lalu, sopa nya dapat di salamat'an?" ²⁷ Yesus maniat ka sia dahan bapanir, "Bagi mansia hal inyan tidak mungkin, tapi mungkin bagi Allah. Sobab, bala jolu mungkin bagi Allah." Upah Jumpat Yesus ²⁸ Petrus lalu bapanir ka Yesus, "Tiat, kami jadi maningalan bala jolu dahan jumpat duan!" ²⁹ Ujai Yesus, "Aku mangataan nya sabonarnya ka kolai, tidak ada siku pan nya jadi ningalan rumah, atau bala samadikan lalaki, atau bala samadikan batina, atau uma, atau bapa, atau bala biak, atau humanya karna Aku dahan karna Injil, ³⁰ nya waktu inini tidak akan manarima sratus kali lipat bala rumah dahan bala samadikan lalaki, dahan bala samadikan batina, dahan bala uma dahan bala biak dahan bala huma, agan panganiayaan; dahan masa nya pacaan datang, hidup nya kekal. ³¹ Tapi, banyak urang nya partama pacaan nyadi nya terakhir, lalu nya terakhir nyadi nya pertama." ³² Sia dalam pajalatan ka Yerusalem dahan Yesus bajalan paling holu. Dahan, sia marasa heran, tapi bala urang nya nyurut'an-Nya marasa gola. Lalu, Yesus mambaba udi ka dua bolas murid-Nya, Inya mamadahan ka sia apa nya pacaan dilabuhan urang gan-Inya, ³³ Ujai-Nya, "Tiat am kita tongahan naik ka Yerusalem dahan Anak Mansia paca'an di sorahan ka bala imam kapala dahan bala ahli Taurat. Sia paca'an mahukum-Nya sampai mati dahan paca'an manyorahannya ka bala urang bukai Yahudi. ³⁴ Sia paca'an mahina-Nya, dahan maigahai-Nya dahan mahajar-Nya lalu mambunuh-Nya. Tapi, lopas tiga hari Inya paca'an bangkit." ³⁵ Lalu, Yakobus dahan Yohanes, anak-anak Zebedeus, datang ka Yesus dahan bapanir, "Guru, kahona kami Duan manuntukan bala jolu nya kami minta." ³⁶ Dahan, Yesus bapanir ka sia, "Jolu apa kahona kolai nan akai-Ku tuntukan?" ³⁷ Sia bapanir ka Inya, "Ijitan salah siku dari kami duduk di sabolah kanan Duan, dahan nya sikunya di sabolah kiba Duan dalam kamulian Duan." ³⁸ Tapi Yesus bapanir kasia, "Kolai ntah tahu apa nya kolai minta. Ulih ntah kolai minum dari cangkir nya harus Ku minum atau dibabtis agan baptisan nya dibabtis'an ka-Aku?" ³⁹ Jawab sia agan Inya, "Kami ulihma!" lalu Yesus bapanir kasia, "Cangkir nya Aku minum memang ulih kolaima minumnya, dahan kolai pacaan dibabtis agan baptisan nya dibabtisan ka Aku. ⁴⁰ Tapi, amun akai duduk di sabolah kananku atau kibaku, bukainya hak Aku mangonyunya ni, tapi tompat inyan nan akai sia nya jadi disiapan holu." ⁴¹ Mendinga bunyi inyan, sapuluh murid yang bukainya godian Yakobus agan Yohanes. ⁴² Lalu, Yesus maningkau sia dahan bapanir, "Kolai tahu bahwa sia nya dianggap sebagai pamarintah bala urang bukai Yahudi bakalakuan saakan-akan bakuasa jam agan sia. Dahan, bala patingi mamakai kakuasaannya agan sia. ⁴³ Tapi, tidak saharusnya uba inyan agan sasama hunin. sabaliknya, sopa pan nya hona nyadi bosar diantara kolai, harus nyadi palayan kolai, ⁴⁴ Dahan sopa pan nya hona nyadi pertama diantara kolai harus nyadi palayan dari samuanya. ⁴⁵ Sobab, Anak Mansia pan datang bilanya akai dilayatai tapi akai malayatai dahan akai mangonyu nyawa-Nya sabagai tobusan bagi banyak urang." ⁴⁶ Lalu, sia sampai di Yerikho. Waktu Yesus maningalan Yerikho agan bala murid-Nya dahan urang banyak, dahan siku pangemis buta banama Bartimeus, anak Timeus, tongahan duduk di pingir jalan. ⁴⁷ Waktu inya mandinga ada Yesus dari Nazaret, inya pan mamohon dahan bapanir, "Yesus, Anak Daud, kasihai tam aku ni!" ⁴⁸ Dahan, banyak urang maningahnya dahan manyuruhnya diam. Tapi, inya samakin mandorah, "Anak Daud, kasih ai tam aku ni," ⁴⁹ Lalu, Yesus tonga dahan bapanir, "Tingkau inya nan." Dahan sia pan maningkau urang buta inyan dahan bapanir ka inya, "Kuat'an tam hati kolai! Badiri tam, Inya maningkau kolai." ⁵⁰ Kaping ngaloya'ai jubahnya, urang buta inyan badiri dahan manatakai Yesus. ⁵¹ Lalu, Yesus bapanir ka inya, "Apa kahona kolai nan akai Aku malabuhannya akai kolai?" Urang buta inyan manjawab, "Guru, biaran aku maniat." ⁵² Lalu, Yesus bapanir ka inya, "Pulang tam. Iman kolai udah maubat'ai kolai" Waktu inyan jam, inya dapat maniat udi dahan inya manyurut'an Yesus sapanjang jalan.