¹ Dahan, waktu sia hampir datang ka Yerusalem, hamping Betfage agan Betania, di Bukit Zaitun, Yesus manyuruh dua murid-Nya, ² dahan bapanir ka sia, "Tula tam ka laman di hadapan nuhun nan, dahan amun kolai sampaiam, kolai pacaan manomuan siku kaledai muda nya bakobat, nya bolum kala ditungakkai urang. Lopasan kaledai inyan lalu baba. ³ Amun ada urang batanya ka kolai, 'Maapa kolai malabuhan inyan nan?', Paniran ja, 'Tuhan mamerluan kaledai inyan dahan pacaan mamulakannya ka sini lagi."' ⁴ Lalu, sia tula dahan manomuan kaledai muda nya bakobat di pintu luar, di pingir jalan, lalu sia malopasannya. ⁵ Bala urang nya badiri di sian batanya ka sia, "Maapa kolai malopasan kaledai inyan?" ⁶ Sia manjawab uba nya udah dipadahai Yesus ka sia, dahan bala urang inyan mambiaran sia hingkas. ⁷ Lalu, sia mambaba keledai inyan ka Yesus, lalu malotaan jubah sia dipucu kaledai inyan, lalu Yesus duduk manungangnya. ⁸ Dahan, banyak urang-urang ma ampar jubah sia di jalan, dahan inya bukainya manyunsun ranting-ranting nya sia goyap dari huma. ⁹ Urang banyak nya bajalan manyurut'an di muka kaping mandorah, "Hosana! Diberkat'ai tam Inya nya datang dalam nama Tuhan. ¹⁰ Diberkat'ai tam kadatakkan krajaan Daud, upui hiang kita! Hosana, di tompat nya mahatingi!" ¹¹ Lalu, Yesus mansu ka Yerusalem dahan naik ka bait Allah. Dahan, habis maniat bala jolu di sakalilingnya, Inya tulak ka Betania agan kadua bolas murid-Nya obai hari babah am. Yesus Manyumpahai Batang Ara ¹² Dahan,kahobu'annya,waktu sia ningalan Betania,Yesus ma'asa kalaparan. ¹³ Pas maniat dari jauh sakayu batang ara nya badaun, Inya lalu manatakainya gola ada nya suba dikuti dari buah inyan. waktu Inya sampai di konung buah inyan, Inya ntah dapat apa-apa kecuali daun-daunnya sobab waktu inyan ntahnya musim buah ara. ¹⁴ Karena inyan, Yesus bapanir ka konung ara inyan, "Jangan ada lagi urang nya kala makan buah dari kolai ni slama-lamanya." Dahan, bala murid-Nya pan mandinga ma. ¹⁵ Lalu, sia sampai ka Yerusalem. Lalu, Yesus mansu ka Bait Allah dahan mulai mausir bala urang nya tongahan bajual boli di bait Allah. Inya mambali'an bala meja panukar duit dahan bala kursi urang nya manjual burung dara, ¹⁶ dahan Inya tidak maijitan lagi urang mababa bala barang malalu'ai bait Allah. ¹⁷ Lalu, Yesus mangajar dahan bapanir, "Ongka ada tatulis, 'Rumah-ku pacaan disobut rumah doa bagi samua bangsa'? tapi, kolai maubahnya nyadi sarang panyamun. ¹⁸ Lalu, bala imam kapala dahan bala ahli Taurat mandinganya dahan sia manggoyap cara uba apa cara akai mambunuh-Nya. Sobab, sia gola agan Inya karena urang banyak inyan kagum agan pangajaran-Nya. ¹⁹ Dahan, pas hari hona malam, Yesus agan bala murid-Nya maningalan kota inyan. ²⁰ Pas, sunsung waktu sia lalu, sia maniat batang ara jadi korikam sampai ka uratnya. ²¹ Petrus taingat dahan bapanir ka Yesus, "Guru, tiat! batang ara nya duan sumpahai nan korikkam!" ²² Lalu, Yesus manjawab sia, "Baiman tam di dalam Allah. ²³ Aku mangataan nya sabonarnya ka kolai, sopa pan nya bapanir ka gunung ini, 'Ta'angkatlah dahan tapansanglah ka laut,' dahan tidak ada karaguan di dalam hatinya, tapi percaya agan apa nya inya paniran pacaan bakajadi'an, maka hal inyan pacaan bakajadi'an ka inya. ²⁴ Karena inyan , Aku bapanir kakolai, apa pan nya kolai doa'an dahan pinta, percaya ja bahwa kolai jadi narimanya, maka hal inyan pacaan dikonyu ka kolai. ²⁵ Dahan, apabila kolai badiri dahan badoa, amputai tam amun kolai manyimpan donam agan urang akai, Bapa kolai nya di surga pan pacaan maamputai bala kasalahan kolai jam. ²⁶ Tapi, aman kolai tidak maamputai, bapa kolai nya di surga pan ntah pacaan maamputai bala kasalahan kolai." ²⁷ Lalu, sia datang lagi ka Yerusalem. samantara Yesus bajalan di bait Allah, bala imam kapala, bala ahli Taurat, dahan bala tuha Yahudi, manatakai-Nya. ²⁸ Lalu, sia batanya ka Inya, "Agan kuasa apa duan malabuhan hal-hal inyan, atau sopa nya mangonyu'ai duan kuasa akai malabuhannya?" ²⁹ Kata Yesus agan sia, "Aku hona batanya satu pertanyaan ka kolai. Jawab Ku bai, horu Aku hona mambori tahu kolai agan kuasa apa Aku malabuhan bala hal inyan. ³⁰ Dari muna asal babtisan Yohanes dari surga atau dari mansia? jawab Ku tam!" ³¹ Sia bahaum agan siku manyiku dahan bapanir, "Amun kita manjawab, 'Dari surga,' Inya pacaan bapanir 'Lalu maapa hunin ntah percaya agan inya?' ³² Tapi, amun kita manjawab, 'Dari mansia?" Bala pamimpin inyan gola agan urang banyak obai sia samua ma'angap bahwa Yohanes memang bonar nabi. ³³ Karena inyan, sia manjawab Yesus, "Kami tidak tahu." Lalu, Yesus bapanir ka sia, "Uba inyan jam aku, Aku pan tidak mambori tahu kolai agan kuasa apa Aku malabuahan bala hal inyan."