¹ Lalu, Yesus mulai bapanir ka sia dalam bala prumpamaan. "Ada urang pangusaha kobun angur inya maninyakan pagar kaliling, dahan mangali lubang akai mamorah angur, dahan maninyakan manara pangawas. Lalu, inya manyewaannya ka bala panggarap kobun lalu tula ka luar negeri. ² Pas musim panen, inya mangirim playan ka bala panggarap kobun akai managih sewa dari sia hasil kobun angurnya. ³ Tapi, sia manangkap playan inyan, dahan mamukulnya, lalu mausirnya agan tangan hampa. ⁴ Karena inyan, inya mangirim playan udi dahan sia mamukulai kapalanya, lalu mamparlakuannya agan cara nya mamaluan. ⁵ Lalu, inya mangirim playan bukainya dahan sia mambunuhnya. Hal inyan, bakajadian jam ka banyak korban bukainya, adanya dipukulai dahan adanya dibunuh. ⁶ Umpu kobun inyan ija siku tam,inyanam anak nya dikasihainya. Akhirnya inya mangirim anak inyan ka sia dahan bapanir, 'Sia pacaan mahormatai anak ku.' ⁷ Tapi, bala panggarap kobun inyan, bapanir agan siku manyiku, 'Inini hali warisnya. Ayu, kita bunuh siut, dahan warisannya kita kuti.' ⁸ Lalu, sia manangkapnya dahan mambunuhnya, ongka sia buakan kaluar kobun angur. ⁹ Apa nya pacaan dilabuhan umpu kobun angur inyan? Inya paca'an datang dahan mambanisaan bala panggarap inyan dahan mangonyu kobun angurnya ka panggarapnya bukai. ¹⁰ Kala ntah kolai mambaca ayat Kitab Suci inini: 'Batu nya dibuakan tukang bangunan, manyadi batu panjuru. ¹¹ Iniam perbuatan Tuhan tai, dahan perbuatan inini ajaib bagi kita'?" ¹² Lalu, sia bausaha akai manangkap-Nya tapi sia gola'an urang banyak obai sia tahu bahwa Yesus manyampaian perumpamaan inyan akai sia. Dahan, sia maningalan Yesus lalu pulang. ¹³ Lalu, sia manyururuh bala urang Farisi dahan bala urang Herodian natakai Yesus akai manjebak Inya agan bala pakataan-Nya siku. ¹⁴ Sia datang dahan bapanir ka Yesus, "Guru, kami tahu bahwa duan bonar dahan ntah paduli agan pandapat urang bukai. Sobab, duan tidak maniat panampilan urang tapi mangajaran jalan Allah nya sesuai agan kabonaran. Apakah bonar mambayar pajak agan Kaisar atau bukai?" ¹⁵ Harus bi kami mambayar atau harus bi kami ntah mambayar? Tapi Yesus, tahu am agan kamunafikan sia, Inya bapanir ka sia, "Maapa kolai mauji aku? konyu ka Aku 1 dinar akai Aku maniatnya." ¹⁶ Lalu, sia mangonyunya dahan Yesus bapanir kasia, "Gambar dahan tulisan sopa ini ni?" sia manjawab-Nya, "Gambar agan tulisan Kaisar." ¹⁷ Lalu, Yesus bapanir ka sia, "Konyu ka kaisar bala hal nya nyadi umpu kaisar dahan ka Allah bala hal nya nyadi umpu Allah." Dahan, sia heran agan Yesus. ¹⁸ Lalu, sia Saduki, nya mangataan bahwa ntah ada kabangkitan datang ka Yesus dahan batanya ka Sia, ¹⁹ ''Guru Musa manulis pakai kita bahwa amun urang nya ada samadikan nya lalaki mati dahan maningalan bininya tapi ntah ada anak, samadikannya nya lalaki inyan harus mangawin'ai janda inyan dahan mambakit'an katurutan akai samadikannya. ²⁰ Ada tujuh urang samadikan. samadikan nya partama babini, dahan inya mati tapi ntah ada katurutan. ²¹ Lalu, samadiakan nya kadua manikahai batina inyan, dahan mati lalu ntah ada katurutan jam. Uba inyan jam agan samadikan nya katiga. ²² Dahan, ntah ada dari katujuh samadikannya inyan nya maningalan anak. Akhir dari samuanya, batina inyan pan mati jam. ²³ Pas hari kabangkitan, waktu sia bangkit, nyadi bini sopa batina inyan? Sobab katujuh samadikan inyan udah manyadiannya bini." ²⁴ Yesus manjawab sia, "Obai ini am alasan kolai nyadi sosat, obai kolai ntah ngaroti kitab suci atau kuasa Allah? ²⁵ Sobab, waktu sia bangkit dari antara urang mati, sia ntah ada nya kawin atau dikawinai tapi sia nyadi uba bala malaikat di surga. ²⁶ Hal bala urang mati nya dibangkit'an, ntah hunin mambaca bai dalam kitab Musa nan, dibagian hal bagian rampu momat nan, ubaapa allah bapanir agan inya, 'Aku niam Allah Abraham, dahan Allah Ishak, dahan Allah Yakub'? ²⁷ Inya bukainya Allah urang mati, tapi Allah urang nya hidup. Kolai bonar-bonar sosat!" ²⁸ Lalu, salah siku dari bala ahli Taurat datang dahan mandinga sia bakalar. Waktu inya maniat bahwa Yesus udah manjawab maha baik, lalu inya batanya ka Yesus "Printah muna nya paling penting dari samuanya?" ²⁹ Yesus manjawab, "Hukum nya paling utama inyanan: "Dingaan, uy bala urang Israel! Tuhan Allah kita nan ongkah Tuhan am. ³⁰ Dahan, kasihailtam Tuhan Allah kolai agan saponuh hati kolai dahan agan saponuh jiwa kolai dahan agan saponuh pikiran kolai dahan agan saponuh kakuat'an kolai.' ³¹ Lalu, nya kadua inyanan: "Kasihaitam sasama kolai uba diri kolai siku.' Ntah ada hukum nya lobih bosar dari pada inyan." ³² Lalu,Ahli Taurat bapanir ka Yesus, "Duan bonar, guru. Duan bonar dengan mangataan bahwa Inya inyan satu, dahan ntah ada nya bukai selain Inya. ³³ Dahan, mangasihai-Nya agan saponuh hati, dahan saponuh pangarotian, dahan agan saponuh kakuatan, lalu mangasihai sasama uba diri siku, memang lobih penting dari samua kurban bakaran dahan persembahan." ³⁴ Lalu,waktu Yesus mandinga urang inyan manjawab dengan bijaksana,Inya bapanir ka inya, "Kula tidak jauh dari Krajaan Allah." Jadi inyan,ntah ada lagi urang nya brani batanya ka Yesus. ³⁵ Dahan, kaping mangajar di Bait Allah, Yesus bapanir, "Uba apa bala ahli Taurat dapat mangataan bahwa Kristus inyanan anak Daud? ³⁶ Daud siku bapanir di dalam Roh Kudus, 'Tuhan bapanir ka Tuanku: Duduktam di sabolah kanan-Ku, sampai Aku malotaan bala musuh Duan di babah kaki Duan.' ³⁷ Daud siku pan manyobut'an kristus inyan 'Tuhan'. Jadi, uba apa suba Kristus inyan anaknya?" Dahan, urang banyak sonang maninga'an-Nya. ³⁸ Dalam pangajaran-Nya Yesus bapanir, "Hati-hatiam agan bala ahli Taurat nya gala bajalan-jalan makai jubah panjang dahan gala manarima salam panghormat'an di tompat umum nan, ³⁹ Dahan, manompat'ai tompat duduk nya tahormat di Sinagoge dahan bala tompat kahormatan dalam bala perjamuan. ⁴⁰ Sia marobut bala rumah bala janda dahan sabagai alasan badoa nya maha panjang. Sia paca'an manarima hukuman nya lobih borat." ⁴¹ Lalu, Yesus duduk mahadap ka kotak persembahan dahan barotian bala urang mamansu'an duit ka kotak persembahan inyan. Banyak urang kaya nya mamansu'an dalam jumlah bosar. ⁴² Lalu, janda jara datang dahan mamansu'an dua kaping duit logam nya sanilai agan 1 sen. ⁴³ Lalu, Yesus maningkau bala murid-Nya dahan bapanir ka sia, "Aku mangataan nya sabonarnya ka kolai, janda jara ini jadi mamansuan lobih banyak ka dalam kotak persembahan inyan dari pada inya bukai. ⁴⁴ Sobab, sia samua mangonyu dari kalobihan sia, tapi janda jara inyan, mangonyu dari kakurakannya, mangonyu samua apa nya ada di inya,inyanam samua nafkahnya."