¹ Hari inyan,pas banyak bala urang bakumpul lalupan ntah ada bokal sangu sia pakai dimakan, Yesus mangumai bala murid-Nya lalu bapanir ka sia, ² "Maha kasih hati-Ku gan urang banyak inyan obai inini sia udah samanah tiga ariam sasama gan Aku, dahan ntah ada bala jolu akai dimakan. ³ Dahan,aman Aku manyuruh sia pulang sia dalam kaadaan klaparan,sia paca'an pingsan dalam pajalatan obai adanya sia datang dari jauh." ⁴ Lalu, murid-murid-Nya manjawab Sia, "Ubaapa kira urang suba maumpan sia agan roti di tompat sunyi uba ini. ⁵ Lalu, Yesus batanya ka sia, "baropa roti nya ada di hunin nan?" sia menjawab, "tujuh roti." ⁶ Habis inyan, Yesus manyuruh urang banyak inyan duduk di tanah, lalu Inya manguti tujuh roti inyan,lalu langsung maucap syukur, dahan Inya mamocah-mocahannya, lalu di konyunya ka murid-murid-Nya lalu sia pan mahakirannya akai urang banyak. ⁷ Dahan, Murid-murid pan ada jam maba sadikit lauk kocit. habis mengucap syukur samuanya, Yesus manyuruh murid-murid-Nya akai mambagian jam lauk-lauk ka urang banyak. ⁸ Urang banyak inyan makan sampai konyang, dahan sia mangumpulan sisa-sisa makanan nya ija ada inyan tujuh cupa ponuh. ⁹ Ada kira-kira ompat ribu urang nya makan. Habis inyan, Yesus menyuruh sia pulang. ¹⁰ Lalu Yesus copat mansu ka parahu sasama agan murid-murid-Nya dahan sampai di daerah Dalmanuta. ¹¹ Dahan, bala urang Farisi datang lalu mulai badebat agan Yesus, kaping manyuruh Yesus manunyuan tana dari surga, akai mauncu-Nya. ¹² Habis Yesus manarik kosih panyang dalam Roh-Nya, Inya bapanir, "Ma'apa generasi ini mangoyap tana? Aku mangataan nya sabonarnya ka hunin, ntah ada suti tanapan nya paca'an di konyu ka generasi ini. ¹³ Udahan, Yesus meningalan sia,babali mansu ka dalam parahu, dahan batula ka saborang. ¹⁴ Bala murid ntah ingat mambaba roti, baya ada satota roti ma di dalam parahu. ¹⁵ Lalu, Yesus baposan ka sia "siap sadia tam! Mamai'an tam agan ragi bala urang Farisi dahan ragi Herodes nan". ¹⁶ Lalu sia bahaum agan siku manyiku soal sia yang ntah ada roti tai. ¹⁷ Lalu,pas tahu agan hal ini, Yesus bapanir ka sia, "Ma'apa kolai repot'an agan nya ntah ada roti ni? Apa hunin bolum tahu atau bolum mangaroti jam? Apa hati hunin dikorasan? ¹⁸ Maka hunin ni ada ma mata, tapi ntah maniat? lalu ada poning, tapi ntah maninga? Ntah ingat am bay hunin,Waktu Aku ¹⁹ mamocah-mocahan lima roti akai lima ribu urang, baropa banyak cupa nya baisi ponuh agan kotah-kotah makanan nya hunin kumpulan?" Sia manjawab,"Dua bolas cupa." ²⁰ Dahan, pas tujuh roti akai ompat ribu urang inyan, baropa cupa nya ponuh agan sisa bala makanan nya hunin kumpulan?" Sia manjawab "tujuh cupa." ²¹ Lalu, Inya bapanir ka sia, "Apa hunin ija bolum ngaroti jam?" ²² Lalu,Yesus agan bala murid-Nya sampai di Betsaida.Dahan, bala urang mambaba urang buta dahan mamohon ka Yesus akai mamigapnya. ²³ Yesus pan mamigap tangan urang buta inyan dahan mambabanya ka luar laman. Lalu, Yesus maigahai mata urang buta inyan dahan manumpaan tangan-Nya di pucu inya. Yesus batanya ka inya,"Apa kolai maniat bala jolu?" ²⁴ Lalu, urang inyan nangadah ka pucu dahan bapanir, "Aku maniat bala urang,tapi sia ni paniat ku uba bala kayu nya bajalan." ²⁵ Habis inyan, Yesus manumpaan tangan-Nya di pucuk mata urang inyan lagi, lalu urang inyan mambuka matanya, paniat'annya baik am, dan inya pan dapat maniat samua dengan jelas. ²⁶ Lalu, Yesus menyuruhnya pulang lalu baposan, "Jangan mansu ka dalam laman. ²⁷ Habis inyan, Yesus bajalan, agan bala murid-Nya ka bala laman di Kaisarea Filipi. Dahan,di tongah pajalatan, Yesus batanya ka bala murid kata-Nya, "ujai bala urang, sopa aku ni?" ²⁸ Sia manjawab "Yohanes pambaptis, adanya menyobut Elia,dahan ada jam nya manyobutan salah siku dari bala nabi." ²⁹ Habis inyan, Yesus batanya ka sia, "Tapi, Menurut kolai sopa aku ni?" Petrus manjawab-Nya,"Duan nan Kristus." ³⁰ Dahan, Yesus baposan ka sia akai ntah mamboritahu ka sopa pan mangonaai diri-Nya. ³¹ Lalu, Yesus mulai mangajar bala murid-Nya obai Anak mansia harus mandrita banya hal dahan ditula tuha-tuha Yahudi, bala imam kapala,dahan bala ahli Taurat, dibunuh,dahan habis tiga hari bangkit udi. ³² Dahan, Yesus torus torang mangataan hal ini . Karna inyan, Petrus menarik Yesus ka sisi lalu manogur-Nya. ³³ Tapi,kaping barotian bala murid-Nya, Yesus manogur Petrus lalu bapanir, "Lari dari-Ku hai Iblis! Obai kolai ntah mamikiran bala pakara Allah tapi bala pakara manusia." ³⁴ Habis inyan, Yesus maningkau urang banya agan bala murid-Nya, lalu bapanir Yesus ka sia samua, "Aman urang hona jumpat Aku, inya harus manyangkal dirinya siku,dahan mamikul salibnya,lalu nyurut'an Aku. ³⁵ Sobab, sopa pan nya hona manyalamat'an nyawanya pacaan kehilakan nyawanya. Tapi sopa pan nya kahilakan nyawanya demi Aku agan Injil menyelamatkan nyawanya. ³⁶ Sobab, apa untungnya urang mandapat'an saluruh dunia, tapi kahilakan nyawanya? ³⁷ Apa nya dapat urang konyu akai manobus nyawanya? ³⁸ Sobab, sopa pan nya malu obai Aku agan Firman-Ku di generasi nya ntah setia dahan badosa ini, maka Anak Manusia pan jumpat malu jam mangaku'ai urang inyan pas inya datang dalam kamuliaan Bapa-Nya sasama agan Bala malaikat nya kudus."