¹ Lalu, bakumpulam bala urang Farisi sasama agan bala ahli Taurat nya datang dari Yerusalem manomu'ai Yesus. ² Lalu, sia maniat bala murid Yesus makan roti makai tangan najis, inyanan tangan nya ntah dibasu. ³ Sobab, bala urang Farisi agan samua urang Yahudi tidak akan makan amun tangan sia ntah dibasu sampai kapagolakan tangan obai adat upui hiang nya sia pigap. ⁴ Dahan, amun bala urang Yahudi datang dari tompat umum, sia ntah makan sabolum mambasu tangan. Dahan, banyak adat bukainya yang sia trima akai sia pigap, uba pambasu'an bala cangkir dahan bala bejana tamaga. ⁵ Udahan, bala urang Farisi agan ahli Taurat batanya ka Yesus, "Ma'apa bala murid duan ntah hidup manurut adat upui hiang, tapi malah makan roti agan tangan najis?" ⁶ Yesus bapanir ka sia, "Yesaya banubuat maha bonar hal kolai nya munafik, uba nya tatulis: 'Bangsa ini mahormat'ai Aku agan bibir sia, tapi hati sia jauh dari Aku. ⁷ Sia-sia ma sia manyomah Aku karna malajarai agan ajaran bala printah nya dijawat mansia.' ⁸ Disamping ma abaian printah Allah,kolai mamigap kuat adat mansia." ⁹ Lalu,Yesus pan bapanir ka sia,"Maha carodi kolai manula printah Allah akai mampertahatan adat kolai siku. ¹⁰ Obai,Musa bapanir,'Hormat ai bapa kolai agan uma kolai', dahan sopa pan nya manyumpahai bapanya atau umanya harus dihukum mati.' ¹¹ Tapi, kolai bapanir amun urang bapanir ka bapaknya atau umanya,'Apa ja kauntukan nya paca'an kolai dapat dari aku inyanan kurban,inyanam persembahan,' ¹² Lalu, kolai ntaham maijitan inya malabuahan apapan akai bapanya atau umanya. ¹³ Amun uba inyan kolai mambatalan Firman Allah agan adat kolai nya turun tamurun. Dahan kolai malabuhan banyak hal lagi yang uba ini." ¹⁴ Lalu, Yesus maningkau samua urang dahan bapanir ka sia, "Dingaan Aku,hunin samua nan, dahan pahapaitam. ¹⁵ Ntah ada jolu apapan dari luar mansia nya mansu ka dalam dirinya dapat manajisannya, tapi bala jolu nya kaluar dari mansia nan nya manajisannya." ¹⁶ "Amun baponing akai mandinga,na kolai paningaan tam!" ¹⁷ Lalu, Yesus mansu ka rumah dahan maningalan bala urang inyan, bala murid-Nya batanya ka-Inya hal prumpamaan inyan. ¹⁸ Dahan, Inya bapanir ka sia, "Ntah hunit ngaroti jam? Ntah hunit tahu bi bahwa apa ja nya dari luar mansu ka dalam mansia tidak akan manajiskannya? ¹⁹ Sobab, nya mansu inyan bilanya mansu ka dalam hatinya, tapi ka porutnya, udahan kaluar dibuang ka dalam jamat" (Mun bunyi inyan, Yesus manyataan bahwa samua makanan halal.) ²⁰ Lalu Inya bapanir, "jolu yang kaluar dari mansia yang manajisannya. ²¹ Sobab, kaluar dari dalam, hati mansia,timul pikiran-pikiran jahai ,dosa birahi, mangolit, mambunuh, ²² Bazinah,sarakah, kajahai'an, tipu daya, hawa nafsu, hiri hati, fitnah, kasomokan, dahan kabodohan. ²³ Samua jolu jahai inyan am nya datang dari dalam mansia, inyan am nya manajisannya." ²⁴ Dari tompat inyan, Yesus angkat lalu tula ka daerah Tirus dahan Sidon. Lalu, Inya batapu di sabuah rumah, tapi inya totap katahuan urang jam. ²⁵ Pas mandinga ada Yesus, ada batina nya anak batinannya karasu'an roh najis, datang lalu manyomah di kaki Yesus. ²⁶ Batina inyan urang Yunani, lahir di Siro-Fenisia.Inya minta ka Yesus akai mausir setan inyan kaluar dari anaknya. ²⁷ Lalu, Yesus bapanir ka batina inyan, "Biar am bala Biak inyan makan sampai konyang holu. Obai, ntah baik manguti roti umpu bala biak dahan mangonyunya ka bala kudu." ²⁸ Tapi, batina inyan manjawab dahan bapanir ka Yesus,"Bonar am, Tuhan.Tapi, bala kudu di babah meja nan makan kacopar bala biak ma." ²⁹ Lalu, Yesus bapanir agan batina inyan, "Karna kolai mangataan ini, kolai uliham pulang. Setan inyan jadi maningalan anak kolai am." ³⁰ Udahan, batina inyan pulang dahan batomu anaknya tongahan barobah di tompat tiu, skalinya setan tai jadi kaluaram am. ³¹ Jadi inyan,Yesus kaluar lagi dari daerah Tirus lalu tula malaluai Sidon manuju ka danau Galilea, di daerah Dekapolis. ³² Lalu, sia mambaba orang tuli nya uyuh bapanir, ka Yesus. Sia mohon ma'amit ka Yesus akay malotaan tangan-Nya ka orang inyan. ³³ Lalu, Yesus mambaba orang inyan mamisahan diri dari krumunan urang banyak.Inya mamansu'an jarinya ka dalam poning urang inyan, pas jadi maigah, Yesus mancama lidah urang inyan. ³⁴ Lalu, Yesus manangadah langit, Inya manarik kosih panyang dahan bapanir, "Efata!" ,artinya "Tabuka tam!" ³⁵ Waktu inyan jam, poning urang inyan tabuka, kobatan di lidahnya pan talopas am,lalu inya bapanir maha tolaram. ³⁶ Lalu, Yesus maningah sia mangesahan kajadian inyan ka sopa pan. Tapi, makin ditingah, sia samakin nyadi mambritaannya. ³⁷ Sia maha heran dahan bapanir, "Inya jadi malabuhan bala jolu dengan baik. Inya bahkan manjawat urang tuli mandinga dahan urang bisu bapanir."