¹ Lalu, Yesus batula dahan sampai ka kota asal-Nya, murid-muri-Nya pan jumpat jam. ² Pas waktu hari Sabat, Yesus mulai mangajar di Sinagoge.Dahan, banyak urang mandinga-Nya, marasa heran dahan bapanir, "Dari muna inya dapat samua hal inyan? Hikmat apa nya dikonyu ka inya dahan mujizat-mujizat uba inyan dilakuan dengan tangannya? ³ Maka inya baya tukang kayu, anak Maria dahan samadikan Yakobus dahan Yoses dahan Yudas dahan Simon? Ongka samadikan batinanya adaan di sini agan kita?" Lalu, sia pan bingung lalu manulak Inya. ⁴ Lalu, Yesus bapanir ka sia, "di muna-muna urang mahormat'ai nabi kacuali di tompat asalnya, di tongah kaluarganya siku" ⁵ Maka,Yesus ntah dapat malabuhan mujizat di sian, baya malotaan tangannya ka babaropa urang nya sakit dahan maubat ai sia. ⁶ Dahan, Inya heran obai sia ntah percaya. Lalu Inya tula bakaliling ka laman-laman dahan mangajar. ⁷ Udahan, Yesus maningkau ka dua bolas murid dahan mulai mautus sia dua-dua dahan mangonyu'ai sia kuasa atas roh-roh najis. ⁸ Lalu, Inya maningah sia jgn babokal dalam pajalatan, kecuali baya tungkah tanpa roti, tanpa tas, tanpa duit dalam ikat pingang sia. ⁹ Tapi mamakai sanal dahan jangan mamakai dua pakaian. ¹⁰ Dahan, yesus bapanir ka sia, Di muna pan kolai mamansuai rumah urang, diam di sian ja sampai waktunya kolai kaluar dari sian. ¹¹ Dahan, jika ada urang nya ntah narima kolai dahan ntah mandinga'an kolai, waktu kolai tula hibasan dobu dari kaki kolai akai pringat'an bagi sia." ¹² Lalu, sia pan batula dahan mambritaan bahwa urang-urang harus batobat. ¹³ Maka, sia mausir banyak setan dahan mamupuran minyak banyak urang sakit dahan sia pan sehat. ¹⁴ Dahan, Raja Herodes maninga nama Yesus nyadi terkenal, dahan urang bapanir, "Yohanes pembabtis bangkit am dari antara urang mati, makanya mujizat-mujizat bagawi di dalam-Nya." ¹⁵ Ada jam nya madahan, "Inya nan Elia tapi ada nya madahan, "Inya nabi, uba salah siku dari bala nabi." ¹⁶ Tapi pas Herodes mandinga hal inyan, inya bapanir, "Yohanes nya jadi ku pongal kapalanya, jadi dibangkit'an!" Yohanes Pambabtis Dibunuh ¹⁷ Memang Herodes ma nya manyuruh urang, akai manangkap Yohanes dahan mangurungnya di panjara demi Herodias, bini samadikan lalakinya, Filipus, obai Herodes udah mangawinai Herodias. ¹⁸ Obai, Yohanes ropat am bapanir ka Herodes, "ntah baik kolai marobut bini samadikan kolai nan." ¹⁹ Obai inyan am, Herodes donam agan Yohanes dahan barancana mambunuhnya, tapi ntah ulihnya. ²⁰ Sobab, Herodes gola agan Yohanes, karna inya tahu Yohanes ni urang bonar dahan urang suci, lalu Herodes malinukainya. Waktu Herodes maningaan Yohanes, inya maha bingung, tapi Herodes sonang mandinga'an Yohanes. ²¹ Tapi datanglah hari nya topat, pas pada hari ulang tahunnya, Herodes ngaluaran pagagawi akai manjamu bala pajabat tinginya, bala perwiranya dahan pamimpin Galilea. ²² Pas anak batina Herodias mansu lalu manari, inya mahibur Herodes dahan sia nya duduk sasama agan inya. Lalu, raja bapanir ka gadis inyan "Minta ja apa nya kolai kahona ai aku paca'an manuntukan kahona kolai." ²³ Dahan, Herodes basumpah ka inya, "Apa pan yang kolai pinta ka aku, paca'an aku tuntukan, biarpan sampai satongah dari kraja'an ku." ²⁴ Lalu, gadis inyan manatakai umanya, lalu batanya, "Aku harus minta apa?" Umanya manjawab, "Kapala Yohanes Pambabtis." ²⁵ Lalu, cacopat gadis inyan manatakai raja dahan bapanir, "Aku hona ini am duat mangonyu akai aku kapala Yohanes Pambabtis di pucu talam." ²⁶ Karna Inyan, salu am hati raja, tapi obai inya tamakan sumpahnya dahan bala urang nya makan sasama agan inya, inya tidak hona manolak kahona gadis inyan. ²⁷ Lalu, raja mangirim algojo dahan manyuruhnya langsung mambaba kapala Yohanes, lalu olgojo inyan hingkas dahan mamongal kapala Yohanes di panjara. ²⁸ Lalu inya mambaba kapala Yohanes di pucu talam dahan manyorahanya ka gadis inyan. lalu dari gadis inyan disorahanya lagi ka umanya. ²⁹ Dahan, pas bala murid Yohanes mandinganya,sia datang lalu manguti tubuh Yohanes dahan manguburnya. ³⁰ Dahan, bala rasul bakumpul agan Yesus lalu mamaniran ka-Inya apa nya jadi sia labuhan dahan nya jadi sia ajaran. ³¹ Lalu, Yesus bapanir ka sia, "Tam kita ngunsi ka tompat sunyi dahan tonga satogal." Obai, banyak urang pulang balik, dahan akai makan pan sia ntah sompat. ³² Lalu, Yesus agan bala murid-Nya mangunsi agan parahu ka tompat nya sunyi. ³³ Tapi, urang banyak maniat sia tula dahan mangenalai sia. Lalu, urang banyak inyan samua balari malaluai jalan darat dari semua kota, dahan mandaholu'ai Yesus dahan bala murid-Nya. ³⁴ Pas Yesus ka pingir danau, Inya maniat banyak urang, lalu Inya salukasih agan sia obai sia uba domba nya ntah ada gembalanya. Lalu, Yesus mulai mangajarai sia banyak hal. ³⁵ Pas huntu malam, bala murid Yesus datang lalu bapanir, "Tompat ini sunyi dahan pan tingi malapam. ³⁶ Suruh sia tula tam ka daerah sakaliling sian dahan ka laman-laman akai mamboli makatan." ³⁷ Tapi yesus manjawab, "Kolai nam nya maumpan sia nan." Dahan, sia bapanir ka-Inya, "Jadi kami ni harus tula dahan mamboli roti yang roganya 200 dinar dahan maumpan sia?" ³⁸ Yesus bapanir ka sia, "Ada baropa roti dikolai nan? Tulak tam tiat ai!" Pas sia tahu, lalu sia paniran, "Lima roti agan dua lauk." ³⁹ Lalu, Yesus manyuruh sia samua duduk dalam kalompok-kalompok di rumput hijau. ⁴⁰ Urang banyak inyan lalu duduk bakalompok, ada nya saratus urang ada nya lima puluh urang. ⁴¹ Jadi inyan, Yesus manguti lima roti agan dua lauk inyan, dahan maniat kalangit inya mangucap syukur lalu mamocahan roti inyan, dahan mangonyunya ka bala murid-Nya akai sia manangaiannya ka urang banyak. Inya pan mambagi-bagian dua lauk inyan ka samua urang. ⁴² Dahan, sia samua makan sampai konyang. ⁴³ Lalu, sia mangumpulan dua belas cupa ponuh agan sisa-sisa roti dahan lauk. ⁴⁴ Dahan, ada lima ribu lalaki nya mamakan roti. ⁴⁵ Lalu, Yesus manyuruh bala murid-Nya naik ka parahu dahan tula mandaholuai-Nya ka saborang ka Betsaida, Samantara Inya ija manyuruh urang banyak pulang. ⁴⁶ Jadi inyan Inya bapadah ka sia, dahan Inya naik ka bukit akai badoa. ⁴⁷ Pas, hari hona malapam, parahu ija di tongah danau, Yesus pan sikunya ma di darat. ⁴⁸ Dahan, pas maniat bala murid-Nya kahora'an mangayuh obai angin batiup balawatan agan arah sia, kira-kira pas jaga malam kaompat, Yesus manatakai sia bajalan di pucu danau dahan Inya hona bajalan malaluai sia. 49Tapi waktu sia maniat Yesus bajalan di pucu danau, sia manyangka Inya hantu, lalu sia mandorah, ⁵⁰ Obai sia samua kagolaan maniat Yesus. Tapi Yesus copat bapanir ka sia, "Tenang ja. Ini Aku! Jangan gola." ⁵¹ Lalu, Inya naik kaparahu sasama agan sia, dahan angin inyan pan tonga dan sia sangat heran. ⁵² Sobab, sia bolum sangat ngaroti hal mujizat lima roti obai hati sia ija dikorasan. ⁵³ Dahan, pas Yesus agan bala murid-Nya nyamborang, sia ninya di tanah Genezaret lalu mongkalan. ⁵⁴ Pas,sia turun dari parahu,bala urang copat mangenalai Yesus, ⁵⁵ lalu balari ka samua daerah mambaba bala urang sakit di pucu tilam, ka muna pan sia mandinga ada Yesus. ⁵⁶ Maka, ka muna pan Yesus ada mansu ka bala laman atau pan ka kota atau pan ka bala daerah damping sian,sia maulitan urang sakit di tompat karamian dahaan minta ijin ka-Inya pakai sia ulih mancama hujung jubah-Nya ja. Dahan sopa pan nya mancama jubah-Nya lalu sehat am.