¹ Pas sia sampai di saborang danau, di daerah Gadara. ² Waktu Yesus turun dari parahu, ada urang dari kuburan nya dirasu'ai roh najis manomuai Yesus. ³ Inya diap di bala kuburan. Tidak ada urang nya ulih mamasungnya lagi,biar pan gan rantai. ⁴ Sobab, inya ropat am dikobat agan balenggu kaki dahan rantai, tapi inya mamutusan rantainya dahan mamatahan balenggunya. Tidak ada siku pan nya ulih manunu'annya. ⁵ Tiap siang malam, inya mancia mandorah di kuburan dahan di bukit bukit dahan maluka'ai dirinya siku agan batu. ⁶ Pas urang inyan maniat yesus dari jauh, inya balari dahan manyomah di hadapan Yesus. ⁷ Lalu, kaping mandorah inya bapanir, "Apa urusan antara aku agan duan, Yesus , Anak Allah nya MahaTingi? aku mohon agan duan demi Allah jangan manyiksaku!" ⁸ Lalu, Yesus bapanir ka inya, "keluarlah dari urang ini, hay roh najis!" ⁹ Lalu, Yesus batanya ka urang inyan, "sopa nama kolai?" Dahan inya manjawab, "Namaku Legion obai kami banyak" ¹⁰ Inya ropat am mamohon ka Yesus akai sia ntah diusir dari daerah inyan. ¹¹ Di sian ada kabatan bosar babi tongahan makan damping bukit. ¹² Lalu, roh-roh jahai inyan mamohon ka Yesus, lalu bapanir, "Suruh tam kami mansu ka dalam bala babi inyan." ¹³ Yesus manuntukan kahona sia. Karna inyan, roh-roh najis lalu mamansu'ai kabatan bala babi. Kabatan nya bajumlah kira-kira dua ribu inyan lari ka kanamikan dahan trojun ka danau lalu tangolapam. ¹⁴ Lalu, bala panjaga babi inyan lari dahan mamboritahuannya ka kota dahan ka laman. Dahan bala urang kaluar akai maniat kajadian inyan. ¹⁵ Lalu, bala urang inyan manatakai Yesus dahan niat urang nya horu jadi karasu'an roh jahai, nya ada legionnya, tongahan duduk, dahan jadi bapakaian am, inya pan jadi waras am. Dahan,sia pan lalu nyadi gola. ¹⁶ Lalu, sia maniat kajadian inyan, lalu mangesahannya ka bala urang uba apa kajadian nya malabuhai urang nya karasuan roh jahai dahan hal bala babi inyan. ¹⁷ Karna inyan, bala urang mulai mausir Yesus dari daerah sia. ¹⁸ Udah inyan, pas Yesus tongahan naik ka parahu, urang nya horu jadi karasu'an roh jahai tai mohon inya hona jumpat sasama gan Yesus. ¹⁹ Tapi, Yesus tidak maijitannya, lalu bapanir ka inya, "Pulang tam ka kaluarga kolai. Kesahan ka sia samua hal nya jadi Tuhan labuhan ka kolai dahan bahwa Tuhan berbelas kasihan ka kolai." ²⁰ Lalu, urang inyan pan pulakam dahan mambritaan ka bala urang di Dekapolis mangona'ai samua hal nya jadi Yesus labuhan ka inya. Lalu, samua urang nyadi heran. ²¹ Waktu Yesus nyamborang baprahu, urang banyak bakumpul di damping Sia di pingir danau. ²² Lalu, pamimpin Sinagoge namanya Yairus datang dahan pas maniat Yesus inya lalu manyomah di kaki-Nya. ²³ Dahan, inya mohon ma amit ka Yesus, ujainya, "Anak batina ku ija kocit hampir mati. Datang dahan tumpaan tangan Duan ka inya akai inya baik dahan hidup." ²⁴ Lalu Yesus tulak agan Yairus. banyak urang manjurutan Yesus dahan mangarumunai-Nya. ²⁵ Dahan, ada batina nya pandarahan samanah dua belas tahun. ²⁶ Inya ropat am mandrita obai banyak tabib,dahan banya am plua paruginya ni, tapi tah ada gunanya dahan kaadaannya malah batamah parah. ²⁷ Pas mandinga brita Yesus, batina inyan manatakai Yesus dari balikat di tongah-tongah karumunan urang lalu mancama jubah-Nya. ²⁸ Batina inyan bapanir, "aman aku dapat mancama jubah-Nya ja, aku paca'an baik." ²⁹ Waktu inyan jam pandarahannya tonga dahan inya marasaan badannya udah sehat am dari panyakitnya. ³⁰ Yesus langsung tahu dari diri-Nya siku bahwa ada kuasa nya udah kaluar dari-Nya. Inya babali di antara karumunan inyan lalu bapanir: "Sopa nya mancama jubah-Ku?" ³¹ Lalu murid-murid Yesus bapanir ka-Inya, "Duan maniat karumunan urang mandesa-desak duan dahan duan bapanir, 'Sopa nya mancama jubah-Ku?'" ³² Lalu, Yesus mamparotian di sakaliling pakai ngatahuai sopa nya malabuhannya. ³³ Tapi, pas Inya tahu apa nya jadi malabuhainya, batina inyan lalu gola udahan bagotar. inya mandatakai Yesus lalu manyomah dahan mamanirannya ka Yesus samua nya udah dilabuhannya. ³⁴ Lalu, Yesus bapanir ka batina inyan, "Anak-Ku, iman kolai jadi manyalamatan kolai. Pulang tam dalam damai sejahtera dahan sehat tam dari panyakit kolai." ³⁵ Waktu Yesus bapanir, datang bala urang dari rumah pamimpin Sinagoge dahan bapanir, "Anak kolai matiam. ma'apa ija marepot'ai guru?" ³⁶ Tapi, Yesus ntah mahirauan panirnya, inya bapanir ka pamimpin Sinagoge inyan, "Jangan gola percaya ja." ³⁷ Lalu, Yesus ntah maijitan siku pan manyurutan-Nya kecuali Petrus, dahan Yakobus, dahan Yohanes samadikan Yokobus. ³⁸ Lalu, sia pan sampai ka rumah kapala Sinagoge inyan, lalu Inya maniat urang rami dahan bala urang manangis maratap mandorah-dorah. ³⁹ Jadi inyan, Yesus mansu, Inya bapanir ka sia, "Maapa kolai rami dahan manangis? Anak inyan bilanya mati tapi tatiu ma." ⁴⁰ Tapi sia manatawa'ai Yesus.Tapi, Inya manyuruh samua sia kaluar lalu mambaba uma bapa anak inyan,dahan bala urang nya sasama gan Inya mansu ka kamar tompat biak kocit inyan tai. ⁴¹ Lalu, dipigap-Nya tangan biak kocit inyan dahan bapanir ka inya, "Talitakum!" (Artinya, "Dara kocit, aku bapanir ka kolai, huas tam!") ⁴² Biak inyan lalu badiri dahan mulai bajalan- jalan, obai umurnyajadi dua bolas tahutam dahan samua urang marasa sangat heran. ⁴³ Lalu, Yesus baposan ka urang tuha babiak inyan akai jangan sampai ada siku urang pan nya tahu hal ini, dahan manyuruh sia akai mangonyu'ai babiak inyan makan.