¹ Dahan Yesus mulai mangajar lagi di pingir danau. Urang banyak nya jumlahnya bosar bakumpul mangarumunai Yesus ongka Inya naik dahan duduk dalam parahu di danau. Samantara, urang banyak inyan di darat, di pingir danau. ² Dahan, Inya mangajar sia banyak hal agan prumpamaan-perumpamaan. Dalam pengajaran-Nya, Inya bapanir ka sia, ³ "Dinga bai! Ada panabur nya tula manabur. ⁴ Lalu inya manabur, ada nya bonih jatu di pingir jalan dahan datang bala burung mamakannya. ⁵ Adanya jatu di tanah babatu sadikit ma tanahnya. bonih inyan lalu copat tumuh obai tanahnya tipis. ⁶ Pas ari podi tanaman inyan layu obai ntah ba'akar tanam inyan nyadi koring. ⁷ Adanya jatu di tongah-tongah rampu duri. Lalu, tumuhlah rampu duri inyan mangopit tanaman inyan sampai mati, dahan tanaman inyan ntah sompat babuah. ⁸ Tapi, adanya jatu di tanah nya baik dahan mahasilan buah, nyadi, dahan batamah bosar,lalu mahasialan tiga puluh kali lipat, enam puluh kali lipat, dahan seratus kali lipat.'' ⁹ Ongka Yesus bapanir, ''Sopa nya baponing pakai mandinga,akai inya mandinga!'' ¹⁰ Waktu Yesus sansikuan bala urang nya di sakaliling-Nya, sasama agan kadua bolas rasul, mananyaan hal prumpama'an-prumpama'an ka-Inya. ¹¹ Lalu Inya manjawab sia, ''Rahasia Kraja'an Allah jadi dikonyu ka kolai. Amun ka urang-urang bukai, satiap hal disampaian dalam perumpama'an- perumpama'an, ¹² Akai, 'Biar pan sia dapat maniat,sia maniat tapi ntah tahu; dahan biar pan sia dapat mandinga,sia mandinga tapi ntah ngaroti. akai sia jangan batobat dahan diamputai. supaya sia jangan batobat dahan diamputai."' ¹³ Lalu Yesus bapanir ka sia, ''Ngaroti ntah kolai agan perumpama'an ini ni? Lalu uba apa kolai dapat ngaroti agan samua perumpaan inyan? ¹⁴ Panabur inyan manaburan Firman. ¹⁵ Sia inyan nan urang-urang nya jatu di pingir jalan, tompat Firman ditaburan tai. Waktu sia mandinga, dengan copat iblis datang dahan marobut Firman nya ditaburan ka sia. ¹⁶ Uba inyan jam, sia nya ditabur di tanah babatu inyan nan bala urang nya mandingaan Firman dahan copat manarimanya dengan sukacita. ¹⁷ Tapi, sia ntah ba'akar dalam dirinya dahan baya batahan samantara. Lalu, pas datang kasulitan atau panganiaya'an karena Firman inyan, sia copat jatu. ¹⁸ Dahan, inya bukai inyanam nya jatu di rampu duri. Sia nan bala urang inya mandinga Firman, ¹⁹ Tapi kuatir agan dunia dahan hawa nafsu agan kadampuan dahan kahona-kahona agan hal bukai nya mansu ka antara Firman inyan dahan mangopitnya lalu ntahnya babuah. ²⁰ Tapi, sia nya ditabur di tanah nya baik inyan nan sia nya mandinga Firman, manarimanya dahan mahasilan buah tiga puluh kali lipat, enampuluh kali lipat, dahan seratus kali lipat.'' ²¹ Lalu, Yesus bapanir ka sia, ''Plita bilanya dibaba akai dilotaan di babah gantang atau di babah ranyang? tapi kahonanya plita nan dilotaan di pucu kaki plita. ²² Sebab, ntah ada nya dioma'an nya ntah katomuan. Uba inyan jam, ntah ada rahasia apapan obai hal inyan paca'an katahuan. ²³ Aman ada urang nya baponing akai mandinga, kahonanya inya mandinga!'' ²⁴ Lalu, Yesus bapanir ka sia, "Paningaan tam panir-Ku ni, Ukuran nya kolai pakai paca'an diukurkan ka kolai, dahan ija banyak lagi nya paca'an ditamahan ka kolai. ²⁵ Karna sopa nya ada pangadanya inya paca'an dikonyuai lagi, tapi sopa nya ntah ada pangadanya, jolu apapan nya ada diinya paca'an dikuti dari inya.'' ²⁶ lalu, Yesus bapanir, "Krajaan Allah inyan nan uba urang nya manabur bonih di tanah. ²⁷ Penabur inyan tiu dahan huas siang dahan malam ongka bonih inyan batunas dahan tumuh. panabur inyan ntah tahu uba apa kajadiannya. ²⁸ Tanah inyan mahasilan buah sansiku'anya ma. Mulanya batunas, udah inyan bulirnya, lalu bigi-bigi ganum di dalam bulir inyan. ²⁹ Pas bigi-bigi bulir ganum inyan mansa, urang inyan lalu mahanyinya obai musim panen datakam." ³⁰ Lalu, Yesus bapanir, Agan apabi kita dapat mambaningkan Krajaan Allah? atau, agan prumpama'an apa kita dapat mambanikannya? ³¹ Krajaan Allah inyan uba bigi sesawi nya ditabur ditanah, biar pan bigi inyan nan bigi nya paling kocit diantara samua bigi di bumi, ³² Tapi pas ditabur, bigi inyan paca'an tumuh nyadi bosar dari samua tanaman kobun, dahan mangaluaran dahan bosar sampai burung-burung di langit dapat manjawat sayang di babah rimutannya." ³³ Agan prumpama'an uba inyan, Yesus mambritaan Firman ka sia, sesuai agan nya dapat sia dinga. ³⁴ Inya bapanir ka sia hala mamakai Prumpanama'an ja'am, tapi inya jelasan samuanya sacara tapisah akai murid - murid-Nya. ³⁵ Dahan, babahhari inyan,Yesus bapanir ka murid - murid-Nya, "Tam kita ka saborang danau." ³⁶ Jadi maningalan urang banyak inyan, sia mambaba Yesus sasama naik ka parahu. dahan, bala parahu bukainya pan sasama agan-Inya. ³⁷ Lalu datanglah banakau nya dahsyat dahan galumang bosar mahompasan parahu sampai parahu ponuh agan arai. ³⁸ Tapi,Yesus tongahan tiu babantal di kamudian kapal. Lalu, sia mahuasan-Nya dahan bapanir ka Inya, "Guru ma'apa duan ntah maolikan kalau kita paca'an binasa?" ³⁹ Lalu, Yesus pan huas dahan mahongar banakau dahan bapanir ka laut, "Diam! tona tam!" Lalu, banakau inyan pan tonga dahan nyadi maha tona. ⁴⁰ Lalu, inya bapanir ka sia, "Ma'apa kolai gola? bolum ada iman kolai bai?" ⁴¹ Sia nyadi sangat gola dahan bapanir ka siku manyiku, "Sopa bi Inya ni sampai banakau agan laut pan tunu agan inya!"