¹ Yesus mansu lagi ka sinagoge,dahan di sian ada urang nya tangannya lumpuh sabolah. ² Sia mamparotian Yesus akai maniat apakah Inya paca'an maubat'ai urang di hari Sabat akai sia dapat manuduh Inya. ³ Lalu, Yesus bapanir ka Urang nya tangannya lumpuh sabolah inyan, "badiritam di tongah-tongah." ⁴ Dahan Yesus bapanir ka sia "Ulih antah babuat baik atau babuat jahai pada hari Sabat? Manyalamatan nyawa atau mambunuh?" Tapi,sia ntah babunyi. ⁵ Lalu, Yesus maniat ka sakaliling sia kaping godi. Yesus maha salu agan kakorasan hati sia. Lalu,Yesus bapanir agan Urang nya tangannya lumpuh sabolah inyan, "Uluran tangan kolay nan" Lalu, orang inyan mauluran tangannya, dahan tangannya lalu sehat am. ⁶ Sobab inyan lah urang-urang Farisi manyisi, dahan mulai manyusun rancana agan bala urang Herodian nya malawan-Nya mangona'ai uba apa mambunuh-Nya. ⁷ Tatapi, Yesus manjauhkan diri agan bala murid-Nya ka danau, dahan sebagian bosar Urang manyurut'an-Nya, sia datang dari wilayah Galilea, dahan dari Yudea, ⁸ Dari Yerusalem, Idumea, daerah saborang sungai Yordan, dahan dari sekitar Tirus dahan Sidon, pas urang banyak mandinga samua nya jadi Yesus labuhan, lalu sia datang ka Yesus. ⁹ Obai urang banyak inyan, Yesus bapanir agan bala murid-Nya akai manyiap'an parahu akai-Nya biar siak ntah manyongka Inya. ¹⁰ Obay Yesus jadi maubat'ai urang banyak, lalu samua Urang nya bapanyakit trus bajojal akai dapat mancamak-Nya. ¹¹ Lalu, pas Roh-roh Najis maniat Yesus, sia lalu sujud di hadapan-Nya dahan mandorah, "Duan nan Anak Allah!'' ¹² Tapi, Yesus malarang koras sia mambotahu sopa Inya. ¹³ Lalu, Yesus naik ka bukit dahan mahaup'ai bala urang nya Inya kahonak ai, akai sasama agan Inya, lalu sia pan natakai-Nya. ¹⁴ Inya manotap'an dua bolas urang akai sia dapat mogi'ai-Nya dahan Inya dapat mangirim sia akai bahotbah, ¹⁵ dahan mangonyuai kuasa akai mausir bala setan. ¹⁶ Yesus menotapan kadua bolas urang inyan: Simon (Yesus manama'ainya Petrus), ¹⁷ Yakobus, anak Zebedeus, dahan Yohanes, samadikan Yakobus (Yesus manama'ainya Boanerges, artinya "Anak-anak Guruh"), ¹⁸ Andreas, Filiipus, Bartolomeus, Matius, Tomas, Yakobus, anak Alfeus, Tadeus, Simon Urang Zelot, ¹⁹ dahan Yudas Iskariot nya mahianat'ai Inya. ²⁰ Lalu, Yesus mansu ka sabuah rumah,dahan karumunan urang balik bakumpul di sian sampai pan Yesus agan bala Murid-Nya antah ulih makan roti. ²¹ Pas bala samadikan-Nya mandinga hal ini, sia datang akai mamababa Yesus babalik obai sia mamaniran Inya antah waras lagi am. ²² Dahan, Ahli-ahli Taurat nya turun dari Yerusalem mangataan, "Inya karasukan Beelzebul !" lalu "Inya mausir setan agan kuasa pamimpin setan." ²³ Lalu, Yesus mengumai sia akai mahampikai Inya, lalu bapanir mamakai prumpamaan "Uba apa Iblis ulih mausir Iblis? ²⁴ Amun sabuah krajaan tapocah-pocah malawan dirinya siku, krajaan inyan antah dapat batahan. ²⁵ Dahan, amun sabuah rumah tapocah-pocah malawan dirinya siku, rumah inyan antah dapat batahan. ²⁶ Amun Iblis cocat angkat malawan dirinya siku dahan tapocah-pocah, inya ntah ulih batahan tapi tamat am riwayat nya. ²⁷ Antah ada siku pan nya ulih mansu ka rumah Urang nya kuat dahan mangolit harota bendanya, kacuali inya holu mangobat urang kuat inyan, horu inya ulih marampok di rumahnya." ²⁸ "Aku mangataan nya sabonarnya ka hunin, smua dosa-dosa dahan sagala hujatan nya dihomusan anak mansia dapat diamputai. ²⁹ Tatapi, sopa nya mahujat Roh Kudus tidak dapat diamputai,obai panyalah karna dosa kekal." ³⁰ Sobab, ahli-ahli Taurat inyan bapanir, "Inya karasukan Roh najis." ³¹ Lalu, Uma dahan samadikan Yesus datang sia badiri di luar rumah. Sia manyuruh urang akai ningkau-Nya. ³² Karumunan urang duduk nya tongahan mangalilikai Yesus lalu sia bapanir ka-Inya, "Tiat ba, Uma Duan dahan samadikan Duan manggoyap'ai Duan." ³³ Lalu, Yesus manjawab dahan bapanir, "Sopa Uma-Ku dahan samadikan-samadikan-Ku tai?" ³⁴ Lalu, Inya barotian samua urang nya duduk mangalilikai-Nya dahan bapanir, "Tiat am, ini Uma-Ku dahan bala samadikan-Ku tai! ³⁵ Sobab, sopa pan nya dapat malabuhan printah Allah nan samadikan lalaki-Ku, dahan samadikan batina-Ku dahan Uma-Ku."