¹ Babaropa ari udian, pas Yesus babali ka Kapernaum, tadinga lah kabar Inya ada di rumah. ² Lalu, banyak urang bakumpul sampai bajojal ka muka pintu, lalu Inya manyampaian Firman ka sia. ³ Lalu sia manatakai Inya, membaba urang lumpuh nya ditanu sia ompat. ⁴ Obai sia ntah dapat membaba urang inyan mahampikai Yesus karna banyak urang, sia pan membuka hatap pas di pucu Yesus. jadi membukanya, sia manurutan urang lumpuh inyan. ⁵ Waktu Yesus maniat iman sia, Inya bapanir ka urang lumpuh inyan, ''Oy anak Ku, dosa-dosa kolai jadi diamputai." ⁶ Tapi, bala ahli Taurat nya duduk di sian mulai bapikir dalam hati sia, ⁷ "Ma'apa urang ini bapanir bunyi inyan? Inya dah mahujat! sopanya dapat maamputai dosa- dosa kecuali Allah siku?'' ⁸ Yesus langsung tahu dari dalam Roh-Nya obai sia bapikir dalam hati sia. Inya bapanir ka sia, ''Ma'apa kolai bapikir uba inyan dalam hati kolai? ⁹ Muna nya lobih mudah, mangataan ka urang lumpuh inyan, 'Dosa-dosa kolai diamputai', atau mangataan, 'huas, angkat tilam kolai dahan bajalan tam'? ¹⁰ Tapi, Katahuai tam obai anak mansia ni ada kuasa di bumi akai maaputai dosa-dosa.''Yesus bapinir ka urang lumpuh inyan, ¹¹ Kata ku agan kolai: huas, angkat tilam kolai dahan pulang tam ka rumah kolai.'' ¹² Urang lumpuh inyan lalu badiri, manguti tilamnya, udahan kaluar, di hadapan samua urang. sia samua heran dahan mamuliaan Allah, lalu bapanir, 'Kami bolum kala maniat hal nya uba ini!'' ¹³ Yesus tula udi ka pingir danau, dahan bala rombongan urang datang ke-Inya, lalu Inya mangajar sia. ¹⁴ Waktu Inya lalu inya maniat Lewi, anak Alfeus,tongahan duduk di tompat pembayaran pajak. Lalu ujai Yesus ka inya, ''Tam jumpat aku'' lalu Lewi pan badiri manyurut an-Nya. ¹⁵ Dahan pas Yesus duduk makan di rumah urang Lewi inyan banyak bala pangumpul pajak dan bala urang badosa nya makan jam sasama agan Yesus dahan murid-murid-Nya, obai di nuhun banyak urang, dahan sia manjurut'anYesus. ¹⁶ Pas bala ahli Taurat dari kalompok Farisi maniat Yesus tongahan makan sasama agan bala urang badosa dahan agan bala pangumpul pajak, sia batanya ka murid- murid-Nya, ''Ma'apa Inya makan sasama gan bala penagih pajak dahan bala urang badosa?'' ¹⁷ Pas Yesus mandinganya, Inya bapanir ka sia, ''Sia nya sehat ntah mamerluan Dokter, tapi nya sakit. Aku datang bukainya maningkau urang-urang bonar tatapi urang-urang badosa.'' ¹⁸ Murid-murid Yohanes dahan urang-urang Farisi tongahan bapuasa. Babaropa urang datang lalu batanya ka-Inya. ''Ma'apa murid-murid Yohanes dahan bala murid urang Farisi bapuasa, tapi bala murid Duan ntah bapuasa?'' ¹⁹ Lalu, Yesus bapanir ka sia, ''Dapat bi pangiring panganten bapuasa samantara panganten lalaki ija agan siaan? Samanah panganten lalaki inyan ija sasama agan sia, sia ntah dapat bapuasa. ²⁰ Tapi, harinya pacaan datang pas panganten lalaki dihalu'ai sia, dan hari inyan lah sia paca'an bapuasa. ²¹ Ntah ada urang nya manamal pakaian manah nya birat makai kain nya baharu. Amun uba inyan tamalan kain nya baharu inyan paca'an mambirat pakaian nya manah, dahan biratnya batamah bosar. ²² Dahan tah ada urang nya manuyung anggur baharu ka dalam kantong kulit nya manah. Amun uba inyan, anggur inyan pacaan mambirat kantong kulit inyan maka baik angur baik pan kantongnya paca'an rusak.Sabaliknya,angur baharu disimpan dalam kantong kulit nya baharu.'' ²³ Lalu, pas batopatan agan hari Sabat, Yesus malaluai kobun gandum, Dahan dalam pajalatan, bala murid-Nya mulai mamutik bulir gandum-gandum. ²⁴ Lalu bala urang Farisi bapanir ka-Inya, ''Tiat, ma'apa sia malabuhan apa nya malangar hukum hari sabat ?'' ²⁵ Lalu. Inya bapanir ka sia, ''Bolum kala bai hunin mambaca apa nya dialabuhan Daud waktu inya dahan bala urangnya nya sasama agan inya tongahan kakurakan dahan kalaparan? ²⁶ Uba apa inya mansu ka Rumah Allah pada masa Abyatar manjabat sabagai Imam Bosar, dahan makan roti persembahan, nya baya ulih dimakan bala imam, dahan inya pan mambagian roti inyan ka bala sia nya sasama agan inya?" ²⁷ Lalu Yesus bapanir ka bala urang Farisi inyan, "Hari sabat dijawat pakai mansia, bukainya mansia akai hari Sabat. ²⁸ Jadi, Anak Mansia inyanan Tuhan, uba inyan jam agan hari Sabat.''