¹ Iniam Permula'an Injil Yesus Kristus, Anak Allah, ² Uba nya tatulis dalam kitab Nabi Yesaya : "Tiat ba ! Aku mangirim utusan-Ku mandaholu'ai Duan nya akan manyiap'an jalan bagi-Duan. ³ Ada suara urang mancia mandorah di tongah hutan: 'Siap'an tam jalan akai Tuhan, jawat'an jalan-Nya lurus."' ⁴ Lalu Yohanes mambaptis bala urang di tongah hutan dahan mahotbahan baptisan batobat akai pangamputan dosa. ⁵ Dahan, samua pandudu Yudea ongka samua urang Yerusalem datang ka Yohanes. Inya mambaptis sia di sungai Yordan, kaping sia mangaku'ai bala dosa sia. ⁶ Yohanes mamakai ramut unta dahan mamakai tali pendeng kulit di pungungnya. Inya makan bunta agan madu hutan. ⁷ Yohanes bahotbah lalu bapanir, "Jadi aku ni paca'an datang urang nya lobih bakuasa dari aku. Aku tidak pantas mambungku dahan malopasan tali sanal-Nya pan aku tidak pantas. ⁸ Aku mambaptis hunin agan arai, tapi Inya mambaptis hunin agan Roh Kudus. ⁹ Dahan, bakajadi'anlah di hari-hari inyan, Yesus datang dari Nazaret, wilayah Galilea, dahan dibabptis oleh Yohanes di sungai Yordan. ¹⁰ Pas Inya jadi timbul am dari arai, Yesus Maniat langit tabolah lalu Roh manyarupa'ai burung dara turun ka pucu-Nya. ¹¹ Lalu, ada suara datang dari surga, "Kolai Anak nya Kukasihai. ka Kolailah Aku bakohona." ¹² Lalu habis inyan, Roh mambaba Yesus ka hutan. ¹³ Inya ada di hutan samanah ompat puluh hari dahan diuji bala iblis. Yesus badiam di tongah bala binatang liar dahan bala malaikat malayat'ai Inya. ¹⁴ Habis Yohanes dipanyara, Yesus batula ka daerah Galilea dahan mamberitaan Injil Allah. ¹⁵ Inya bapandir, "Gonap am waktunya, Krajaan Allah dampikam. Batobat tam dahan percaya agan Injil". ¹⁶ Pas Yesus bajalan di pantai danau Galilea, Inya maniat Simon dahan Andreas, samadikanya, tongahan manyingkap'an jala di danau obai sia nan panyala lauk. ¹⁷ Lalu, Yesus bapandir ka sia, "Jumpat Aku tam, Aku pacaan manjadian kolai panyala mansia." ¹⁸ Simon dahan Andreas lalu maningalan jala sia dahan manjurut'an-Nya. ¹⁹ Pas Inya bajalan jauh am, Inya maniat Yakobus, anak Zebedeus, dahan Yohanes, samadikanya, ada di parahu tongahan manamal jala. ²⁰ Dahan, Yesus lalu mengumai sia lalu sia maningalan bapa sia, Zebedeus, sasama agan bala buruh bayarannya di parahu, dahan lari lalu jumpat Yesus. ²¹ Dahan, sia sampai di Kapernaum, lalu pas waktu hari sabat, Yesus mansu ka Sinagoge lalu mangajar. ²² Sia heran agan ajaran-Nya obai Inya mangajar uba urang nya ada kuasanya, ntahnya uba bala ahli Taurat. ²³ Pas waktu di sinagoge, ada lalaki nya karasu'an roh jahai dahan inya mandorah, ²⁴ Ujainya, "Apa urusan Duan agan kami ni, Yesus dari Nazaret? Apa Kolai datang nan akai mambinasaan kami? Aku tahu ma agan Duan nan. Kolai ni Nya Kudus dari Allah!" ²⁵ Tapi, Yesus mambrahau inya, uji-Nya, "Badiap! Kaluar tam dari urang ini!" ²⁶ jadi roh najis inyan mangguncang-guncakan inya kaping mandorah maha homan, lalu kaluaram roh inyan dari inya. ²⁷ Samua sia heran lalu batanya ka siku manyiku, ujainya, "Jolu apa ini ni? Ada ajaran baharu makai kuasa! Inya pan manyuruh bala roh najis inyan lalu sia manurut agan Inya." ²⁸ Lalu, brita Inyan tasobar di muna-muna sampai ka saluruh daerah Galilea. ²⁹ Jadi maningalan sinagoge,Yesus dahan bala murid-Nya naik ka rumah Simon,sasama agan Yakobus dahan Yohanes. ³⁰ Tapi mantuha batina Simon mahoram obai goring,lalu sia copat mamboritahu kaadaanya ka Yesus. ³¹ Yesus pan mandatakanya dahan mancamak longanya lalu manulungnya badiri. waktu inyan jam goringnya hilang lalu batina inyan mulai malayatai sia. ³² Pas hari malam, matahari pan tangolam, sia mambaba bala urang goring dahan nya karasu'an roh jahai ka Yesus. ³³ Udahan, samua pandudu kota bakumpul di muka pintu rumah inyan. ³⁴ Yesus maubat'ai banyak urang sakit agan bamacam panyakit lalu mausir banyak setan. Tapi, Inya maningah bala setan Inyan bapanir, obai sia'an nan tahu agan Sia. ³⁵ Sungsung nyagam, pas ari ijak potang, Yesus bajalan ka tompat nya sunyi, lalu Inya badoa di sian. ³⁶ Lalu, Simon agan bala urang nya sasama agan inya manggoyap ai Yesus. ³⁷ Pas sia manomuan Yesus, sia bakata, "Samua urang ngoyap ai Duan!" ³⁸ Dahan, Yesus bapanir, "Tam kita tula ka bala kota nya paling hamping akai aku pan bahotbah ka bala urang di sian. obai, iniam alasan Aku datang". ³⁹ Obay Inyan am, Yesus bajalan mandatakai saluruh daerah Galilea. Inya mambritaan Firman di bala sinagoge sia dahan mausir bala Iblis. ⁴⁰ Lalu, ada urang kudung datang ka Yesus. Inya mamohon dahan manyomah ka Yesus lalu bapanir, "Aman Duan ntah kaborat'an, Duan suba manahiran aku". ⁴¹ Lalu tagoraklah asa kasih hati-Nya, Yesus mauluran tangan-Nya lalu mancama urang inyan kaping bapanir, "Aku honak ma, lalu tahiram!" ⁴² Waktu inyan jam, panyakit kudung nya hilang lalu urang inyan pan baik am. ⁴³ Yesus lalu manyuruh urang inyan pulang dan baposan dengan tegas. ⁴⁴ Yesus baposan ka inya, "jangan paniran ka urang bai masalah ini ni. Tapi, tula tam tonaian tubuh kolai ka imam, lalu persembahan kurban untuk kasehatan kolai uba nya diprintahan Musa akai sabuah kasaksian bagi sia." ⁴⁵ Lalu urang inyan hingkas dahan mulai mambritaan smuanya lalu manyebar luasan brita inyan. Sobab inyan, Yesus ntah ulih am mansu tontorakan ka kota, tapi baya di luar ma, di daerah nya sunyi. Tapi, bala urang dari sagala tompat totap mandatakai-Nya.