¹ Sunsung nyagam, bala iman kapala bahaum agan bala bala tuha, dahan bala ahli Taurat, dahan samua Sanhedrin. Lalu, sia mangobat Yesus, mambaba-Nya, dahan manyorahan-Nya ka Pilatus. ² Lalu, Pilatus batanya ka-inya, ''Duan ni Raja urang Yahudi bai?'' Dahan, Inya manjawab, ''Kolai siku ma nya mangataannya''. ³ Habis inyan, bala imam kapala manuduh Yesus hala. ⁴ Lalu, Pilatus batanya udi ka-Inya, Ntah Duan manjawabnya bai? Dinga tam, banyak tuduhan sia ka Duan ni." ⁵ Tapi, Yesus bilanya manjawab tam lalu Pilatus pan heran. ⁶ Pas hari raya paskah, Pilatus biasanya malopasan bala tahanan nya sia kahonaai. ⁷ Dahan, ada urang nya banama Barabas di tahan agan bala pambrontak nya malabuhan pambunuhan dalam pambrontakan. ⁸ Banya urang datang mausul ka Pilatus akai malabuhan kabiasaan inya labuhan akai sia. ⁹ Dahan, Pilatus manjawab sia lalu bapanir, "Hona ntah akai ku lopasan bagi hunin Raja urang Yahudi ni?" ¹⁰ Sobab, inya tahu bahwa bala imam kapala manyorahan Yesus ni obai hiri hati. ¹¹ Tap, bala imam kapala malah mampangaruhai orang banyak akai nyuruh Pilatus malopasan Barnabas. ¹² Lalu, Pilatus bapanir lagi ka sia, "Jadi ku apa'ai tam agan Urang nya kolai sobut Raja urang Yahudi ni?" ¹³ Dahan sia mandorah udi, "Salib'an inya nan!" ¹⁴ Lalu, Pilatus bapanir ka sia, "Ma'apa? Kajahai'an apa nya jadi Inya labuhan tai?" Tapi, sia mandorah makin homan lagi, "Salib'an Inya!" ¹⁵ Obai hona mamuas'an hati urang banya, Pilatus malopasan Barabas, dahan jadi mancambuk Yesus, inya manyorahan-Nya akai di Salib'an. ¹⁶ Dahan, prajurit mambaba Yesus ka Istana gedung Pengadilan, dahan sia maningkau samua pasukan bakumpul. ¹⁷ Lalu, sia mamasang jubah ungu ka-Inya dahan sia maanyam Mahkota Baduri, sia mamasang nya ka kapala Yesus. ¹⁸ Lalu, sia mulai manyampaian salam ka Inya, "Salam,Raja orang Yahudi!" ¹⁹ Dahan, sia mamukul kapala-Nya agan buluh dahan maigahai-Nya, mancungku lalu manyomah-Nya. ²⁰ Jadi sia maulu-ulu Yesus, sia mangaloya'ai jubah ungu dari Yesus, dahan mamasang pakaian-Nya siku. Lalu, sia mambaba Yesus kaluar akai disalib'an. Panyalib'an Yesus ²¹ Dahan, sia mamosa urang nya tongahan lalu, Simon urang Kirene, nya datang dari laman, bapa dari Aleksander dahan Rufus, akai mamikul salib-Nya. ²² Lalu, sia mambaba Yesus ka Golgota, nya artinya "Tompat Tangkorak". ²³ Sia mangonyu'ai-Nya angur bacampur Mur, tapi ntah Yesus kuti. ²⁴ Jadi inyan, sia manyalib'an-Nya dahan sia pan mambagi-bagian pakaian-Nya, lalu maundi akai manontuan sopa nya dapat bagian. ²⁵ Lalu, waktu inyan jam katiga pas sia manyalib'an-Nya. ²⁶ Dahan tulisan baisi tuduhan ka Yesus tatulis, "Raja Urang Yahudi." ²⁷ Lalu,sasama agan Yesus,sia manyalib'an dua prampok,siku di sabolah kanan-Nya dahan siku di sabolah kiba-Nya. ²⁸ Jadi, gonap am Kitab Suci nya mangataan, "Dahan,Inya tahitung di antara bala urang durhaka." ²⁹ Dahan, bala urang nya tongahan lalu Maejek Yesus kaping manggelekkan kapala lalu bapanir, "Uy! Duan nya hona maruntuhan Bait Allah dahan maninyakkannya baharu dalam tiga hari, ³⁰ Salamat'an tam diri Duan siku dahan turun tam dari Salib nan!" ³¹ Uba inyan jam bala imam kapala, bala ahli Taurat, maulu Yesus dahan bapanir agan nya bukainya, "Inya ulih manyalamat'an urang bukai tapi manyalamat'an diri-Nya siku pan ntahnya ulih! ³² Ongkanya Mesias, Sang Raja Israel, inini turun tam dari Salib ni akai kita maniat lalu parcaya." Sia nya di Salib'an sasama agan Yesus pan mancela Inya jam. ³³ Pas jam keonam, lalu ari potang kabut di sakitar sian sampai jam ka-9, ³⁴ Pas jam ka-9, Yesus Mandorah maha homan, "Eloi, Eloi, Lama Sabakhtani," nya artinya "Allah-ku, Allah-ku, Ma'apa duan maningalan Aku?" ³⁵ Dahan,Pas mandinganya bala urang nya badiri damping Inya bapanir, "Dinga ba! Inya maningkau Elia." ³⁶ Lalu, ada urang balari inya maisi spons agan angur mansam dahan mamansu'annya ka buluh lalu manuntupannya ka Yesus kaping bapanir, "Biar am kita pantiat'an paca'an datang ntah bai Elia akai manurut'an Inya." ³⁷ Lalu, Yesus Mandorah maha homan dahan mutus kosih trakhir-Nya. ³⁸ Waktu inyan, horden Bait Allah birat dua, dari pucu ka babah. ³⁹ Dahan, waktu kapala pasukan badiri mahadap Yesus,barotian uba apa Yesus mutus kosih trakhir-Nya, inya bapanir, "Bonaram,urang inini Anak Allah!" ⁴⁰ Di sian ada jam bala batina nya niat dari jauh, sia'an Maria Magdalena, dahan Maria uma Yakobus Muda, dahan Yoses, ongka Salome. ⁴¹ Waktu Yesus di daerah Galilea sia pogi Inya dahan malayani Inya. Dahan,di sian pan banya batina bukainya nya datang sasama agan Yesus ka Yerusalem. ⁴² Pas hari malam persiapan, sabolum hari sabat, ⁴³ Yusuf urang Arimatea datang, inya anggota Majelis Bosar nya dihormat'ai, nya inya siku pan mananti-nantian kadatakkan Krajaan Allah, mambaranian diri mandatakkai Pilatus akay maminta jasad Yesus. ⁴⁴ Pilatus takonyat mandinga obai Yesus mati am. Inya maningkau kapala pasukan dahan batanya, bonar ntah Yesus mati am tai. ⁴⁵ Pas Pilatus tahu dari kapala pasukan, inya mangonyu mayat inyan ka Yusuf. ⁴⁶ Dahan, Yusuf mamboli Kain Lenan lalu manurutan mayat Yesus, jadi mambungkus-Nya agan kain lenan inyan, inya lalu maulit'an-Nya dalam kuburan nya dikali di bukit batu. Dahan, inya manutup pintu masuk agan batu. ⁴⁷ Maria Magdalena dahan Maria Uma Yoses maniat tompat mayat Yesus diulit'an.