¹ Hari Raya Paskah dahan Hari Raya Tidak Baragi ija dua hari tam, bala imam kapala, bala ahli Taurat tongahan mangoyap cara akai manangkap Yesus agan tipu daya dahan mambunuh-Nya. ² Sobab, sia bapanir, "Samanah hari raya jangan ada karibut'an agan sasama rakyat." ³ Samantara Yesus ada di Betania, di rumah simon nya Kusta, tongahan duduk di meja makan, datanglah batina mambaba guci Kocit dari batu Pualam baisi minyak harum dari Narwastu nya Murni dahan Mahal. Inya mamocahan Guci Inyan dahan Manuyungnya ka pucu kapala Yesus. ⁴ Tapi, ada bala urang nya bapanir manggarutu, "Maapa mamborosan minyak harum uba inyan? ⁵ Obai, minyak ini dapat di jual 300 dinar lobih dahan dapat disadakahan ka urang Jara." Dahan, sia pan manggodi'ai batina inyan. ⁶ Tapi, Yesus bapanir, "Hona'an nyam. Maapa kolai marepot'an inya? Inya malabuhan parbuatan baik bagi-Ku. ⁷ Sobab, kolai hala bakumpul agan urang jara, dahan samila pan kolai hona, kolai suba malabuhan parbuatan baik bagi sia. Tapi, kolai tidak akan hala mamilik'ai Aku. ⁸ Batina ini jadi malabuhan apa nya inya ulih. Inya mamupurai tubuh-Ku lobih holu akai panguburan. ⁹ Aku mangataan ka kolai nya sabonarnya, di muna Injil dibritaan di sluruh dunia, apa nya jadi dilabuhan batina inyan, inyan jam paca'an di kataan akai pringat'an agan Inya." ¹⁰ Jadi inyan,Yudas Iskariot salah siku dari kadua bolas murid, manatakai Imam kapala akai manyorahan Yesus ka sia. ¹¹ Waktu, sia mandinganya, sia sonang dahan bajanyi mangoyu'ai Yudas duit. Karna inyan, Yudas goyap kasompat'an nya baik akai manyorahan-Nya. ¹² Pada hari pertama Hari Raya Roti ntah Baragi, waktu sia mangorbanan anak domba Paskah, bala murid Yesus batanya ka-Inya, "Ka muna nya Duan kahona'ai akai kami batula manyiap'an bagi Duan makan Paskah?" ¹³ Lalu, Inya manyuruh dua urang murid-Nya dahan bapanir ka sia, "Tula tam ka kota, ada urang lalaki tongahan mambaba kendi baisi arai paca'an manomuai kolai. Jurut'an tam inya, ¹⁴ ka muna pan inya mansu, paniran ka umpu rumah, 'Guru bapanir: Di muna ruangan tompat Aku dapat makan Paskah agan bala murid-Ku?' ¹⁵ Lalu, inya paca'an manunyuan kakolai sabuah ruangan bosar di lantai pucu nya jadi disadiaan samua. Siap'an tam perjamuan akai kita di nuhun. ¹⁶ Lalu, bala murid batula ka kota. Di nuhun, sia manomuai pas uba nya Yesus paniran ka sia, lalu sia manyiap'an Paskah. ¹⁷ Pas hari malam, Yesus datang agan kadua bolas murid. ¹⁸ Dahan, waktu sia duduk makan, Yesus bapanir, "Aku mangataan nya sabonarnya agan kolai, salah siku diantara kolai nya makan sasama agan Aku, paca'an mahianatai-Ku." ¹⁹ Sia pan lalu sedih dahan bapanir ka Inya siku pada siku, "Pasti bilanya aku, gola?" ²⁰ Yesus bapanir ka sia, "Inya nan salah siku dari dua bolas murid, urang nya paca'an manculup'an Roti ka dalam mangku sasama agan aku. ²¹ Sebab, Anak Mansia paca'an batula uba nya jadi tatulis mangonaai Inya, tapi calakatiam urang nya mahianat'ai Anak Mansia! Tapi lobih baik bagi urang inyan ongka inya ntah kala dilahiran." ²² Waktu sia makan Yesus manguti roti dahan jadi mamberkatainya, Inya mamocah-mocahannya dahan mangonyunya ka sia, lalu bapanir, "Kuti tam, ini tubuh-Ku." ²³ Dahan, Inya manguti cangkir, dahan maucap syukur. Inya mangonyunya ka sia, dahan sia samua minum dari cangkir inyan. ²⁴ Lalu, Yesus bapanir ka sia, "Iniam darah-Ku, darah perjanjian, nya dicurahkan akai urang banyak. ²⁵ Aku mangataan ka kolai nya sabonarnya, Aku tidak akan minum angur lagi hasil dari buah batang angur, sampai pada hari katiga waktu Aku maminum angur nya baharu di dalam Karajaan Allah.'' ²⁶ Jadi manyanyian lagu rohani, sia batula ka Bukit Zaitun. Bala Murid Yesus Pacaan Maningalan-Nya ²⁷ Lalu, Yesus bapanir ka sia, "Kolai samua paca'an maningalan Aku, obai ada tatulis, 'Aku paca'an manyorang gambala, dahan bala domba inyan pacaan tapisah-pisah.' ²⁸ Tapi, jadi Aku dibangkit'an, aku paca'an tula ka Galilea mandaholuai kolai." ²⁹ Tapi, Petrus bapanir ka-Sia, "Sekalipan sia samua maningalan Duan, tapi aku tidak." ³⁰ Dahan, Yesus bapanir ka inya "Aku mangataan nya sabonarnya ka kolai, malam ini sabolum manu bakuku dua kali, kolai paca'an manyangkal aku tiga kali. ³¹ Tapi, Petrus ntah trima dahan manjawab, ''Sekali pan aku harus mati sasama agan Duan, aku tidak akan manyangkal Duan!" Dahan, sia samua bapanir bunyi inyan jam. ³² Jadi inyan, sia sampaiam di sabuah tompat namanya Getsmani dahan Inya bapanir ka bala murid-Nya, "Duduk tam hunin di sini aku ija hona badoa," ³³ Dahan,Inya mambaba Petrus dahan Yakobus, dahan Yohanes sasama agan-Inya lalu Sia cocat nyadi maha gola dahan sosak. ³⁴ Lalu, ujai-Nya ka sia, "Jiwa-Ku maha sedih, mahapan hampir matiam asanya. Totap di sini am dahan bajaga-jaga tam." ³⁵ Lalu, pas manjauh sadikit, Inya manyomah di tanah dahan badoa, ongka ulih waktu inyan jangan sampai kona ka-Inya. ³⁶ Dahan, Inya bapanir, "Abba, Bapa, bala jolu mungkin bagi-Duan. Kuti ba cangkir di-Aku ni.Tapi, Bilanya Aku kahonaai, tapi apa nya Duan kahona nam." ³⁷ Lalu, Inya babali manomu'ai bala murid-Nya tongahan tiu, dahan Inya bapanir ka Petrus, "Simon, ma'apa kolai tiu nan? Ntah ulih kolai bai bajaga-jaga barang sa jam? ³⁸ Bajaga-jaga tam dahan badoa tam akai kolai ntah jatu ka dalam pancobaan. Roh memang panurut tapi daging lomah" ³⁹ Dahan, Inya tula badoa lagi lalu mamaniran pakata'an nya sama. ⁴⁰ Dahan inya pan babali udi,dahan manomuai sia tongahan tiu obai mata sia maha borat, dahan sia ntah tahu harus manjawab apa ka-Inya. ⁴¹ Habis inyan, Yesus datang untuk ka tiga kalinya dahan bapanir agan sia, "Kolai ija tiu istirahat? Cukup am, waktunya datakam. Tiat, Anak Mansia disorahan ka tangan bala urang badosa. ⁴² Huas tam, tam kita tula'am. Tiat, nya manyorahan Aku hampir datakam." ⁴³ Pas jadi inyan, waktu Yesus ija bapanir, Yudas, salah siku dari kedua bolas murid, datang agan urang banyak mambaba manau dahan cancatu, diprintahan bala imam kapala, bala ahli Taurat, dahan bala tuha bangsa Yahudi. ⁴⁴ Inya nya manyorahan jadi mangonyuai kode, ujainya, "Urang nya paca'an aku cium, Inyanam urangnya. Tangkap tam Inya nan lalu baba tam kaping dikawal." ⁴⁵ Dahan, pas Yudas datang inya langsung mahampikai Yesus dahan bapanir, "Guru!" lalu, inya mancium Yesus. ⁴⁶ Lalu, sia mamigap Yesus dahan managkap-Nya. ⁴⁷ Tapi, salah siku dari sia nya badiri mancabut manaunya dahan manyorang palayan Imam Bosar, lalu manimpas poningnya. ⁴⁸ Dahan, Yesus bapanir ka sia, "Maapa kolai datang mambaba manau agan cancatu manangkap Aku uba urang parampok ni? ⁴⁹ Satiap ari Aku sasama agan kolai di Bait Allah kaping mangajar, tapi kolai ntah manangkap aku. Tapi, kajadian ini akai Kitab Suci dapat digenap'ai.'' ⁵⁰ Lalu, sia samua maningalan-Nya dahan malarian diri. ⁵¹ Ada siku pamuda nya nyurut'an Yesus, baya makai kain lenan di badannya. Dahan, sia manangkapnya jam. ⁵² Tapi inya malopasan kain lenan inyan dahan malarian diri batalanyang. ⁵³ Lalu, sia mambaba Yesus ka Imam Bosar. Dahan, samua imam kapala dahan bala tuha dahan bala ahli Taurat bakumpul samua. ⁵⁴ Dahan, Petrus manyurut'an Yesus dari jauh, sampai ka halaman rumah Imam Bosar. Di nuhun, inya duduk sasama agan bala pangawal kaping batinu di parapian. ⁵⁵ Bala imam kapala dahan samua Mahkamah Agama trus goyap saksi akai malawan Yesus akai sia dapat mambunuhnya, tapi sia ntah manomuan apa-apa. ⁵⁶ Sobab, banyak urang nya manjawat kesah pabula'an akai malawan-Nya, tapi kesah sia siku agan nya bukai tidak sasuai. ⁵⁷ Lalu, bala urang badiri dahan ba'ada bajawat manuduh Yesus, ujainya, ⁵⁸ "kami mandinga Inya bapanir, 'Aku paca'an marobahan Bait Allah jawatan manusia, dahan dalam tiga ari, aku paca'an ninyakkan nya bukai, nya antah dijawat agan tangan." ⁵⁹ Tapi, agan hal ini pan kesah sia siku agan nya bukai tidak sasuai. ⁶⁰ Lalu, Imam Bosar badiri di tongah sia dahan batanya ka Yesus, "Maapa Duan ntah manjawab bala saksi nya manuduh Duan nan?'' ⁶¹ Tapi, Inya totap diam dahan ntah manjawab. Imam Bosar batanya lagi ka Yesus ujainya, "Bonar bai duan ni Masias, Anak Allah nya dipuji?" ⁶² Dahan, Yesus bapanir, "Aku niam Inya ni, dahan kolai paca'an maniat Anak Mansia duduk di sabolah kanan nya maha kuasa dahan datang sasama agan bala awan di langit." ⁶³ Lalu, kaping mambirat jubahnya Imam Bosar bapanir, "Maapa kita ija perlu saksi lagi? 64kolai udah maninga hujat'an. Apa kaputusan kolai?" Lalu, sia samua mahukum-Nya agan hukuman mati. ⁶⁵ Bala urang lalu maigahai Inya, dahan manutup muha-Nya, dahan maninyu-Nya dahan bapanir ka Inya, "Banubuat tam!" Bala pangawal manyamut-Nya dahan manampar-Nya. ⁶⁶ Dahan,samantara Petrus ija di halaman rumah Imam Bosar, salah siku palayan batina Imam Bosar datang. ⁶⁷ Dahan, maniat Petrus batinu, dahan palayan inyan barotiannya lalu bapanir, "Kolai ni pan sasama agan Yesus urang Nazaret inyan jam." ⁶⁸ Tapi, Petrus manyangkal lalu bapanir, "Aku ntah tahu dahan ntah ngaroti agan panir kolai nan," Lalu, inya pan bajalan ka pintu gerbang,lalu manu bakuku. ⁶⁹ Palayan batina inyan maniat Petrus skali lagi dahan lalu mamanirannya ka bala urang nya badiri, "Urang inini salah siku dari sia." ⁷⁰ Tapi, inya manyangkalnya lagi dahan ntah manah jadi inyan, bala urang nya badiri tai bapanir lagi ka Petrus, "Kolai ni pasti salah siku dari sia'an obai kolai nan urang Galilea." ⁷¹ Tapi, inya totap manyangkal dahan basumpah, "Aku ntah kenal agan urang inyan!" ⁷² Habis inyan, manu bakuku nya kadua kalinya dahan Petrus taingat agan apa nya jadi kala Yesus paniran agan inya, "Sabolum manu bakuku dua kali kolai paca'an manyangkal aku tiga kali." Lalu, Petrus pan manangis.