¹ Pas Tuhan tahu kalau bala urang Farisi jadi ningaam bahawa Inya mahasilan dahan mambaptis lobih banyak murid daripada Yohanes, ² [biarpan Yesus siku ntah mambaptis, tapi bala muridNya], ³ Inya maningalan Yudea dahan babalik ka Galilea. ⁴ Tapi, Inya harus malaluai wilayah Samaria. ⁵ Sampailah Yesus di Samaria, di sabuah kota nya banama Sikhar, nya talotak di tanah nya holu tai dikonyu Yakub ka anaknya, Yusuf. ⁶ Sumur Yakub ada di sian. Lalu, Yesus nya kahoraan obai pajalatan, duduk di pingir sumur inyan. Waktu inyan, kira-kira jam ka onam. ⁷ Datakam siku batina Samaria honak mancauk. Yesus bapanir ka inya, "Konyuai ba Aku minum." ⁸ (Sobab, bala muridNya jadi hingkasam ka kota akai mamboli makatan.) ⁹ Batina Samaria inyan bapanir ka Yesus, "Uba apa mungkin Duan ni, urang Yahudi, minta arai minum ka aku nya batina Samaria?" (Sobab, urang Yahudi ntah batoguran agan urang Samaria). ¹⁰ Yesus manjawab, "Amun kolai tahu mangonaai karunia Allah dahan tahu sopa nya bapanir ka kolai ni, 'Konyuai Aku minum', kolai pasti pacaan minta ka Inya, dahan Inya pacaan mangonyuai kolai arai hidup." ¹¹ Batina inyan bapanir ka Inya, " Tuan, Duan Nta ada pancedok obai sumur ni maha dalam, dari muna Duan dapat arai hidup inyan tai? ¹² Apa Duan ni lobih bosar dari upuy ninik kami Yakub, nya mangonyu sumur ini ka kami dahan sia pan holu tai makai sumur ini jam agan samua bala anak dahan bala inguannya?" ¹³ Yesus manjawab dahan bapaniar ka inya, "Satiap urang nya minum dari arai ini ni pacaan haus lagian, ¹⁴ tapi urang nya minum dari arai nya Kukonyuai tai tidak akan kala haus lagi; tapi arai nya Kukonyu ka inya inyan pacaan nyadi mata arai nya pacaan trus mamancar sampai ka hidup nya kekal." ¹⁵ Batina inyan bapanir ka Yesus, "Tuan, konyuai aku arai inyan akai aku tidak akan haus lagi dahan aku ntah perlu lagi datang ka sini akai mancauk." ¹⁶ Yesus bapanir ka inya, "Hingkas tam, tingkau laki kolai tai dahan balik ka koni lagi." ¹⁷ Batina inya manjawab, "Aku ntah balaki." Kata Yesus ka inya, "Panir kolai bonar, 'Aku ntah balaki'. ¹⁸ Obai kolai jadi kala balaki lima lalaki am, dahan nya diap sasama agan kolai inini bilanya laki kolai. Dalam hal ini, kolai bapanir bonar." ¹⁹ Kata batina inyan ka Inya, "Tuan, inini aku tahu am Duan ni Nabi. ²⁰ Upuy ninik kami manyomah di gunung iniam, tapi bangsa Duan mangataan kalau Yerusalem nam tompat urang harus manyomah." ²¹ Kata Yesus ka inya, "Percaya ja agan Aku ni, oy batina! Pacaan datang waktunya kalau bukainya di gunung ini ataupan di Yerusalem urang manyomah Bapa. ²² Kolai manyomah nya tidak kolai kenal, tapi kami manyemah nya kami kenal obai kasalamatan datang dari bangsa Yahudi. ²³ Tapi, pacaan datang waktunya, inyaam inini, bala panyomah bonar pacaan manyomah Bapa dalam Roh dahan kabonaran; sobab Bapa maharusan nya uba inyan akai manyomah Inya. ²⁴ Allah inyanan Roh dahan sia nya manyomah harus manyomahNya dalam Roh dahan kabonaran." ²⁵ Batina inyan bapanir ka Inya, "Aku tahu ma amun Mesias pacaan datang (Inya nya disobut Kristus). Pas Inya datang, Inya pacaan mamboritahuan bala jolu ka kami." ²⁶ Jawab Yesus ka inya, "Aku nya tongahan bapanir agan kolai ni inyanam Inya." ²⁷ Waktu inyan, inyan datanglah bala muridNya dahan haeran maniat Yesus bakesah agan batina. Tapi, ntah ada siku pan nya batanta ka Inya, "Apa nya Duan goyap nan?" atau "Maapa Duan bakesah agan inya nan?" ²⁸ Udahan, batina inyan maningalan kendi arainya dahan hingkas ka kota lalu mamanirannya ka bala urang di sian, ²⁹ "Ayuam, maniatnya ada Sikuurang nya mangataan ka aku bala jolu nya jadi kulabuhan. Mungkin bi Inya nan Mesias inyan?" ³⁰ Sia pan hingkas ka luar kota dahan manomuai Yesus. ³¹ Samantara inyan, Bala muridNya mandesak Yesus dahan bapanir, Rabi, makan tam." ³² Tapi, Yesus bapanir, "Aku ada makatan nya ntah hunin katahuai." ³³ Lalu, bala murid batanya siku agan nya bukai,"Apa ntah ada urang nya mambabaan pamakatan akaiNya makan?" ³⁴ Yesus bapanir, "MakatanKu inyaam malabuhan kahonak Inya nya mautus Aku dahan manjadiai pakarojaanNya. ³⁵ Maka kolai ma bapanir,'Ompat bulan lagi musim panen datang'? Tiat am, Aku bakata ka hunin, buka mata hunin dahan tiat tam bala huma jadi manguning akai dihanyi. ³⁶ Inini pan inya nya mahanyi jadi manarima upahnya dahan mangumpulan buah akai hidup kekal sahinga nya mahanyi dahan nya manabur sasama bahagia. ³⁷ Dalam hal ini pamaniran ini bonar, 'Nya siku manabur dahan nya bukai mahanyi.' ³⁸ Aku mautus hunin akai mahanyi jolu nya ntah hunin krojaan; urang bukai nya jadi mangarojaannya dahan hunin pan jumpat mansuk jam dalam pakarojaan sia." ³⁹ Banyak urang Samaria di kota inyan nyadi percaya agan Yesus obai kesah batina inyan, nya mambori kasaksian, "Inya mamadahan ka aku samua jolu nya jadi aku lakuan." ⁴⁰ Jadi, pas bala urang Samaria inyan sampai ka Yesus, sia mambabaNya akai diap sasama agan lalu Yesus pan badiap di sian samanah dua ari. ⁴¹ Dahan, malah lobih banyak lagi nya percaya karna pamaniran Yesus siku. ⁴² Sia bapanir ka batina inyan, "Bukainya obai kesah kolai lagi kami percaya ni, tapi obai kami jadi mandinga siku am, dahan kami pan tahu kalau Inya ni bona-bonar Juru Slamat dunia." ⁴³ Lopas 2 ari, Yesus maningalan tompat inyan dahan hingkas lagi ka Galilea. ⁴⁴ (Sabolumnya, Yesus siku jadi basaksi bahawa saurang nabi tidak dihormatai di negrinya siku.) ⁴⁵ Pas Yesus sampai di Galilea, bala urang Galilea manyamutNya obai siaan jadi niat am bala jolu nya jadi dilabuhan Yesus dalam parayaan Paskah di Yerusalem obai sia pan pogi jam ka parayaan inyan. ⁴⁶ Karna inyan, Yesus datang lagi ka Kana, Galilea, tompat Inya kala maubah arai nyadi arai angur. Di Kapernaum ada siku pagawai istana nya anak lalakinya tongahan sakit. ⁴⁷ Pas pagawai istana inyan mandinga kalau Yesus dari Yudea, honak ka galilea, inya hingkas manomuai dahan mamohon ka Yesus akai datanag manyemuhan anaknya nya hampir matiam. ⁴⁸ Lalu, Yesus bapanir ka inya, "Kalau kolai ntah maniat bala tana dahan bala jolu ajaib, kolai ntah honak percaya." ⁴⁹ Pagawai istana inyan bapanir, "Tuan, datakai ba sabolum anakku mati." ⁵⁰ Yesus bapanir ka inya, "Pulang tam, anak kolai nan hidup ma!" Urang inyan percaya agan pamaniran nya di kataan Yesus agan inya lalu urang inyan Pan pulang. ⁵¹ Waktu pagawai istana inyan ija dalam pajalatan, inya batomu agan bala budaknya dahan sia mamboritahu bahawa anak lalakinya tai hidup. ⁵² Pagawai istana inyan batanya ka sia mangonaai jam baropa kaadaan anaknya mulai mambaik. Dahan, jawab sia, "Malapan tai kira-kira jam ka tujuh goring nya hilakam." ⁵³ Bapa anak inyan tahu, pas waktu inyanam Yesus bapanir ka inya, "Anak kolai hidup." Jadi, pagawai istana inyan dahan samua kaluarganya nyadi percaya agan Yesus. ⁵⁴ Inyanam tana ajaib nya kadua nya dilakuan Yesus pas pulang dari Yudea ka Galilea.