¹ Jadi samua inyan, ada parayaan ari raya urang Yahudi dahan Yesus naik ka Yerusalem. ² Di Yerusalem, di damping Pintu Gerbang Domba ada sabuah kolam amun dalam bahasa Ibrani disobut Betesda, di sian tai ada lima palantaran. ³ Di bala palantaran inyan tai, banyak urang sakit barobah: urang buta, urang timpang, dahan urang lumpuh (sia manantian arai kolam bagalumang. ⁴ Sobab, di saat-saat tatontu, malaikat Tuhan pacaan turun dahan manggoraan arai inyan. Urang nya pertama kali mansuk ka kolam pas jadi arainya bagalumang, pacaan disemuhan dari panyakit apa pan nya dihidapnya). ⁵ Di sian, ada urang nya jadi 38 tahun am sakit. ⁶ Pas Yesus maniat inya barobah di sian dahan mangatahuai kalau inya maha manaham mandrita sakit, Yesus batanya ka inya, "Honak ntah kolai disemuhan?" ⁷ Urang sakit inyan manjawab, "Tuan, ntah ada urang nya manurutan aku ka dalam kolam pas arainya bagalumang, tapi samantara aku bausaha urang bukai jadi turutam mandaholuaiku." ⁸ Kata Yesus ka inya, "Badiriam! Angkat tilam kolai nan dahan bajalan tam." ⁹ Waktu inyan jam, urang inyan di semuhan, inya maangkat tilamnya, lalu bajalatam. Tapi, ari inyan tai pas ari Sabat. ¹⁰ Karna inyan, bala urang Yahudi bapanir ka urang nya disemuhan inyan, "Ari ini ni ari Sabat, kolai ntah ulih maangkat tilam kolai nan." ¹¹ Tapi, inya manjawab, "Urang nya manyemuhanku tai, Inya nam nya manyuruhku, " Angkat tilam kolai nan dahan bajalan tam."' ¹² Sia batanya ka inya, "Sopa bi nya bapanir ka kolai tai, 'Angkat tilam kolai nan dahan bajalan tam'?" ¹³ Tapi, urang nya jadi disemuhan inyan tai ntah tahu sopa Inya obai Yesus jadi manyalinap am dari urang banyak di tompat inyan. ¹⁴ Jadi inyan, Yesus batomu lagi agan urang inyan tai di Bait Allah dahan bapanir ka inya, "Dinga am, kolai nan jadi semuham. Jangan babuat dosa lagi supaya ntah terjadi lagi jolu nya lobih buruk lagian agan kolai!" ¹⁵ Urang inyan pan locut am dahan mangesahannya ka bala urang Yahudi obai Yesuslah nya jadi manyemuhannya. ¹⁶ Karna inyan, bala urang Yahudi maaniaya Yesus obai Inya malakuan samua inyan di ari Sabat. ¹⁷ Tapi, Yesus bapanir ka sia, "BapaKu ija bakaroja sampai waktu ini ni, makanya Aku pan ija bakaroja jam." ¹⁸ Jawaban inyan manjawat bala urang Yahudi bausaha lobih kuat lagi akai mambunuh Yesus, bilanya baya obai Yesus malangar ari Sabat, tapi obai Inya pan manyobut Allah sabagai BapaNya siku, nya baarti manyamaan diriNya siku agan Allah. ¹⁹ Lalu, Yesus manjawab siaan, ujaiNya, "Sabonarnya, sabonarnya, kataKu agan hunin, Anak ntah dapat mangarojaan jolu nya dari diriNya siku, amun Inya ntah maniat Bapa mangarojaannya; obai apa nya dikrojaan Bapa, inyanam nya dikrojaan Anak. ²⁰ Sobab, Bapa mangasihai Anak dahan manampaan ka Anak sagala jolu nya Inya siku labuhan, dahan Bapa pan pacaan manampaan ka Inya bala pakarojaan nya lobih bosar lagi akai hunin kagum. ²¹ Sobab, sama uba Bapa mambangkitan urang mati dahan mambori kahidupan, uba inyan jam Anak mambori kahidupan ka sopa nya Inya kahonaai. ²² Bapa ntah mahakipai sopa pan, tapi jadi manyorahan saluruh penghakipan inyan ka Anak, ²³ supaya smua urang mahormatai Anak sama uba sia mahormatai Bapa. Orang nya ntah mahormatai Anak, ntah mahormatai Bapa nya mautus Inya. ²⁴ Maha sabonarnya kataKu agan hunin, urang nya mandingaan pamaniranKu dahan percaya agan Inya nya mautus Aku maungkuai hidup kekal, dahan ntah mansuk ka dalam penghakipan obai inya jadi pinah dari kamatian ka kahidupan. ²⁵ Maha sabonarnya kataKu agan hunin, waktunya pacaan datang dahan jadi datakam inini, waktu bala urang mati pacaan mandinga suara Anak Allah dahan nya mandinga inyan pacaan hidup. ²⁶ Obai ubanya Bapa umpu hidup di dalam diriNya siku, uba inyan jam Inya mangonyuai Anak hidup di dalam diriNya siku, ²⁷ dahan Bapa mangonyuai kuasa ka Anak akai manjalatan penghakipan karna Inya nam Anak Mansia. ²⁸ Jangan heran ma agan jolu ini ni obai waktunya pacaan datang pas samua uraang nya ada di dalam kuburan pacaan mandinga suaraNya ²⁹ dahan pacaan kaluar, inyaam sia nya jadi babuat baik pacaan manuju kabangkitan hidup. Sodakan sia nya babuat jahai, manuju kabangkitan penghakipan. ³⁰ Aku ntah dapat babuat apa-apa dari diriKu siku. Aku mahakipai sasuai nya Aku dinga dahan penghakipanKu adil obai Aku ntah manggoyap kahonakKu siku. Tapi kahonak Inya nya mautus Aku." Kasaksian mangonaai Yesus Baasal dari Allah Bapa ³¹ " Amun Aku basaksi mangonaai diriKu siku, kasaksianKu ntah bonar. ³² Tapi, ada nya bukai nya basaksi mangonaai Aku, dahan Aku tahu ma kalau kasaksiannya mangonaai Aku inyan bonar. ³³ Hunin jadi mautus Yohanes dahan inya jadi mambori kasaksian mangonaai kabonaran. ³⁴ Tapi, kasaksian nya Aku trima bilanya dari mansia. Aku mangataan ini supaya hunin dislamatan. ³⁵ Yohanes nan palita nya manyala dahan bacahaya, dahan hunin honak basukacita dalam cahayanya. ³⁶ Tapi, kasaksian umpu Aku ni lobih bosar daripada kasaksian Yohanes. Sobab, pakarojaan nya disorahan Bapa ka Aku akai Kuselesaian, inyaam bala pakarojaan nya tongahan Kulabuhan ini ni, mambori kasaksian mangonaai Aku bahawa Bapa nam nya mautus Aku. ³⁷ Dahan, Bapa nya mautus Aku inyan siku, nya mambori kasaksian mangonaai Aku. Tapi, hunin ntah kala mandinga suaraNya ataupan maniat rupaNya. ³⁸ Dahan, firmanNya ntah badiap dalam hati hunin obai hunin ntah percaya agan Inya nya diutusNya. ³⁹ Hunin mampalajarai Kitab suci obai hunin manyangka kalau di dalam Kitab Suci hunin pacaan mandapatan hidup nya kekal; dahan Kitab Suci inyan pan mambori kasaksian mangonaai Aku, ⁴⁰ tapi hunin ntah honak datang ka Aku supaya hunin hidup. ⁴¹ Aku ntah manarima kamuliaan dari mansia. ⁴² Tapi, Aku mangenal hunin, obai hunin nan antah ada kasih Allah dalam diri hunin. ⁴³ Aku datang atas nama BapaKu, tapi hunin ntah manarima Aku. Amun sia datang atas nama sia siku, hunin manarimanya. ⁴⁴ Uba apa hunin suba percaya, amun hunin manarima pujian dari siku urang agan nya bukainya dahan ntah manggoyap pujian nya datang dari Allah nya Esa? ⁴⁵ Jangan mangira kalau Aku pacaan mandakwa hunin di hadapan Bapa; nya mandakwa hunin nan Musa, inyaam urang nya tompat hunin baharap. ⁴⁶ Sobab, amun hunin percaya agan Musa, hunin harus percaya agan Aku obai Musa manulis mangonaai Aku. ⁴⁷ Tapi, amun hunin ntah percaya agan apa nya Musa tulis, uba apa mungkin hunin percaya agan perkataanKu?"